ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਇੱਕ ਪੱਤਰਕਾਰੀ ਗੱਲਬਾਤ ਦੌਰਾਨ ਮੂਲ ਅਮਰੀਕੀਆਂ (Native Americans) ਲਈ “ਭਾਰਤੀ” (Indian) ਸ਼ਬਦ ਦੀ ਵਰਤੋਂ ’ਤੇ ਟਿੱਪਣੀ ਕਰਦਿਆਂ ਕਿਹਾ ਕਿ ਹੁਣ ਅਮਰੀਕਾ ਵਿੱਚ ਇਹ ਸ਼ਬਦ ਵਰਤਣਾ ਬੰਦ ਕਰ ਦੇਣਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ, “ਤੁਸੀਂ ‘ਭਾਰਤੀ’ ਸ਼ਬਦ ਦੀ ਵਰਤੋਂ ਨਹੀਂ ਕਰ ਸਕਦੇ। ਸਿਰਫ਼ ਭਾਰਤੀ ਹੀ ਚਾਹੁੰਦੇ ਹਨ ਕਿ ਤੁਸੀਂ ਇਸਦੀ ਵਰਤੋਂ ਕਰੋ।” ਟਰੰਪ ਦਾ ਇਸ਼ਾਰਾ ਸੀ ਕਿ ਇਹ ਸ਼ਬਦ ਹੁਣ ਸਿਰਫ਼ ਭਾਰਤ ਦੇ ਲੋਕਾਂ ਲਈ ਹੀ ਵਰਤਿਆ ਜਾਵੇ, ਜਦਕਿ ਮੂਲ ਅਮਰੀਕੀਆਂ ਨੂੰ ਇਸ ਨਾਲ ਜੋੜਨਾ ਗਲਤ ਹੈ।
ਇਹ ਸ਼ਬਦ ਕ੍ਰਿਸਟੋਫਰ ਕੋਲੰਬਸ ਦੀ 1492 ਵਿੱਚ ਕੀਤੀ ਗਈ ਭਾਰੀ ਗਲਤੀ ਕਾਰਨ ਪੈਦਾ ਹੋਇਆ ਸੀ। ਕੋਲੰਬਸ ਨੂੰ ਲੱਗਿਆ ਸੀ ਕਿ ਉਹ ਭਾਰਤ ਪਹੁੰਚ ਗਿਆ ਹੈ, ਇਸ ਲਈ ਉਸ ਨੇ ਸਥਾਨਕ ਕਬੀਲਿਆਂ ਨੂੰ “ਇੰਡੀਅਨਜ਼” ਕਹਿਣਾ ਸ਼ੁਰੂ ਕਰ ਦਿੱਤਾ। ਬਾਅਦ ਵਿੱਚ ਪਤਾ ਲੱਗਾ ਕਿ ਇਹ ਇੱਕ ਨਵਾਂ ਮਹਾਂਦੀਪ ਹੈ, ਪਰ ਇਹ ਗਲਤ ਨਾਂ ਸਦੀਆਂ ਤੱਕ ਚੱਲਿਆ ਆਇਆ। ਅੱਜ ਵੀ ਕਈ ਮੂਲ ਅਮਰੀਕੀ ਇਸ ਸ਼ਬਦ ਨੂੰ ਅਪਮਾਨਜਨਕ ਅਤੇ ਨਸਲਵਾਦੀ ਮੰਨਦੇ ਹਨ, ਜਦਕਿ ਕੁਝ ਕਬੀਲੇ ਇਸ ਨੂੰ ਸਵੀਕਾਰ ਕਰਦੇ ਹਨ।
View this post on Instagram
ਟਰੰਪ ਦੇ ਬਿਆਨ ਦਾ ਵੀਡੀਓ ਸੋਸ਼ਲ ਮੀਡੀਆ ’ਤੇ ਤੇਜ਼ੀ ਨਾਲ ਵਾਇਰਲ ਹੋ ਗਿਆ। ਉਸੇ ਗੱਲਬਾਤ ਵਿੱਚ ਉਨ੍ਹਾਂ ਨੇ “ਟੋਮਾਹਾਕ ਚੋਪ” ਵਰਗਾ ਹੱਥ ਦਾ ਇਸ਼ਾਰਾ ਵੀ ਕੀਤਾ, ਜਿਸ ਨੂੰ ਮੂਲ ਅਮਰੀਕੀ ਭਾਈਚਾਰੇ ਲੰਬੇ ਸਮੇਂ ਤੋਂ ਰੂੜ੍ਹੀਵਾਦੀ ਅਤੇ ਅਪਮਾਨਜਨਕ ਮੰਨਦੇ ਆਏ ਹਨ।
ਮੂਲ ਅਮਰੀਕੀਆਂ ਨਾਲ ਟਰੰਪ ਦਾ ਵਿਵਾਦ ਪੁਰਾਣਾ ਹੈ। ਇਸ ਸਾਲ ਉਨ੍ਹਾਂ ਨੇ ਵਾਸ਼ਿੰਗਟਨ ਦੀ NFL ਟੀਮ ਨੂੰ ਧਮਕੀ ਦਿੱਤੀ ਕਿ ਜੇ ਉਹ ਪੁਰਾਣਾ ਨਾਂ “ਰੈੱਡਸਕਿਨਜ਼” ਵਾਪਸ ਨਹੀਂ ਲੈਂਦੇ (ਜਿਸ ਨੂੰ 2020 ਵਿੱਚ ਨਸਲਵਾਦੀ ਕਾਰਨ ਬਦਲਿਆ ਗਿਆ ਸੀ) ਤਾਂ ਨਵਾਂ ਸਟੇਡੀਅਮ ਨਹੀਂ ਬਣਨ ਦਿੱਤਾ ਜਾਵੇਗਾ। ਇਸੇ ਤਰ੍ਹਾਂ ਕਲੀਵਲੈਂਡ ਦੀ ਬੇਸਬਾਲ ਟੀਮ ਨੂੰ ਵੀ “ਇੰਡੀਅਨਜ਼” ਨਾਂ ਵਾਪਸ ਲੈਣ ਲਈ ਦਬਾਅ ਪਾਇਆ, ਪਰ ਮੂਲ ਅਮਰੀਕੀ ਸੰਗਠਨਾਂ ਨੇ ਸਪੱਸ਼ਟ ਕਿਹਾ ਕਿ ਅਜਿਹੇ ਨਾਮ ਤੇ ਮਾਸਕੌਟ ਉਨ੍ਹਾਂ ਦੀ ਸੱਭਿਆਚਾਰ ਨੂੰ ਕਾਰਟੂਨ ਬਣਾਉਂਦੇ ਹਨ ਅਤੇ ਬੇਇੱਜ਼ਤੀ ਕਰਦੇ ਹਨ।
