ਚੰਡੀਗੜ੍ਹ ਦੇ ਪੋਸਟ ਗ੍ਰੈਜੂਏਟ ਇੰਸਟੀਚਿਊਟ ਆਫ਼ ਮੈਡੀਕਲ ਐਜੂਕੇਸ਼ਨ ਐਂਡ ਰਿਸਰਚ (ਪੀਜੀਆਈ) ਨੇ ਗੁਰਦੇ ਟ੍ਰਾਂਸਪਲਾਂਟ ਕਰਵਾਉਣ ਵਾਲੇ ਮਰੀਜ਼ਾਂ ਲਈ ਇੱਕ ਨਵੀਂ ਤਕਨੀਕੀ ਸਹੂਲਤ ਸ਼ੁਰੂ ਕੀਤੀ ਹੈ। ਇਸ ਸਹੂਲਤ ਅਧੀਨ, ਮਰੀਜ਼ਾਂ ਨੂੰ ਉਨ੍ਹਾਂ ਦੇ ਮੋਬਾਈਲ ਫੋਨਾਂ ‘ਤੇ ਫਾਲੋ-ਅੱਪ ਚੈੱਕਅਪ ਦੇ ਰੀਮਾਈਂਡਰ ਸੁਨੇਹੇ ਭੇਜੇ ਜਾਣਗੇ, ਜਿਸ ਨਾਲ ਉਹ ਸਮੇਂ ਸਿਰ ਡਾਕਟਰਾਂ ਨੂੰ ਮਿਲ ਸਕਣਗੇ।
ਇਹ ਪਹਿਲਕਦਮੀ ਪੀਜੀਆਈ ਦੇ ਵੇਟਿੰਗ ਲਿਸਟ ਮੈਨੇਜਮੈਂਟ ਸਿਸਟਮ ਵਿੱਚ ਜੋੜੇ ਗਏ ਨਵੇਂ ਸਾਫਟਵੇਅਰ ਫੀਚਰ ਦਾ ਹਿੱਸਾ ਹੈ, ਜੋ ਖਾਸ ਤੌਰ ‘ਤੇ ਬ੍ਰੇਨ ਡੈੱਡ ਡੋਨਰ ਪ੍ਰੋਗਰਾਮ ਵਿੱਚ ਰਜਿਸਟਰਡ ਮਰੀਜ਼ਾਂ ਲਈ ਤਿਆਰ ਕੀਤਾ ਗਿਆ ਹੈ। ਇਸ ਸਾਫਟਵੇਅਰ ਵਿੱਚ ਮਰੀਜ਼ਾਂ ਦੀ ਸਾਰੀ ਜਾਣਕਾਰੀ, ਜਿਵੇਂ ਕਿ ਹਸਪਤਾਲ ਪਹੁੰਚਣ ਦੀ ਮਿਤੀ ਅਤੇ ਸਮਾਂ, ਦਰਜ ਹੁੰਦੀ ਹੈ। ਨਵਾਂ ਫੀਚਰ ਆਟੋ-ਜਨਰੇਟ ਸੁਨੇਹਿਆਂ ਰਾਹੀਂ ਮਰੀਜ਼ਾਂ ਨੂੰ ਉਨ੍ਹਾਂ ਦੀ ਅਗਲੀ ਅਪੌਇੰਟਮੈਂਟ ਦੀ ਯਾਦ ਦਿਵਾਉਂਦਾ ਹੈ, ਜਿਸ ਨਾਲ ਇਲਾਜ ਵਿੱਚ ਰੁਕਾਵਟਾਂ ਘੱਟ ਹੋਣਗੀਆਂ।
ਪੀਜੀਆਈ ਦੇ ਨੇਫਰੋਲੋਜੀ ਵਿਭਾਗ ਦੇ ਮੁਖੀ ਡਾ. ਐਚਐਸ ਕੋਹਲੀ ਦੇ ਅਨੁਸਾਰ, ਇਹ ਸਹੂਲਤ ਖਾਸ ਤੌਰ ‘ਤੇ ਉਨ੍ਹਾਂ ਮਰੀਜ਼ਾਂ ਲਈ ਲਾਭਦਾਇਕ ਹੈ, ਜੋ ਇਲਾਜ ਅੱਧ ਵਿਚਕਾਰ ਛੱਡ ਦਿੰਦੇ ਹਨ ਜਾਂ ਕਿਤੇ ਹੋਰ ਟ੍ਰਾਂਸਪਲਾਂਟ ਕਰਵਾਉਂਦੇ ਹਨ। ਇਸ ਨਾਲ ਮਰੀਜ਼ਾਂ ਦੀ ਸਿਹਤ ਸੰਬੰਧੀ ਪੇਚੀਦਗੀਆਂ ਨੂੰ ਘਟਾਉਣ ਵਿੱਚ ਮਦਦ ਮਿਲੇਗੀ। ਪੀਜੀਆਈ ਵਿੱਚ ਲਗਭਗ 8800 ਮਰੀਜ਼ ਕੈਡੇਵਰ ਵੇਟਿੰਗ ਲਿਸਟ ਵਿੱਚ ਰਜਿਸਟਰਡ ਹਨ, ਅਤੇ ਹਰ ਮਰੀਜ਼ ਨੂੰ ਸਮੇਂ ਸਿਰ ਜਾਣਕਾਰੀ ਦੇਣਾ ਪਹਿਲਾਂ ਚੁਣੌਤੀਪੂਰਨ ਸੀ।
ਇਸ ਨਵੀਂ ਸਿਸਟਮ ਨੇ ਇਸ ਸਮੱਸਿਆ ਨੂੰ ਕਾਫ਼ੀ ਹੱਦ ਤੱਕ ਹੱਲ ਕਰ ਦਿੱਤਾ ਹੈ। ਪਹਿਲਾਂ ਮਰੀਜ਼ਾਂ ਨੂੰ ਟ੍ਰਾਂਸਪਲਾਂਟ ਲਈ 12 ਤੋਂ 16 ਮਹੀਨੇ ਉਡੀਕ ਕਰਨੀ ਪੈਂਦੀ ਸੀ, ਪਰ ਯੂਰੋਲੋਜੀ ਵਿਭਾਗ ਨੂੰ ਲਾਇਸੈਂਸ ਮਿਲਣ ਤੋਂ ਬਾਅਦ ਇਹ ਮਿਆਦ ਘਟ ਕੇ 3 ਮਹੀਨੇ ਰਹਿ ਗਈ ਹੈ। ਪਿਛਲੇ ਸਾਲ, ਪੀਜੀਆਈ ਵਿੱਚ 350 ਤੋਂ ਵੱਧ ਗੁਰਦੇ ਟ੍ਰਾਂਸਪਲਾਂਟ ਕੀਤੇ ਗਏ ਸਨ।ਪੀਜੀਆਈ ਨੇ 1973 ਵਿੱਚ ਪਹਿਲਾ ਗੁਰਦਾ ਟ੍ਰਾਂਸਪਲਾਂਟ ਕੀਤਾ ਸੀ ਅਤੇ ਹੁਣ ਤੱਕ ਹਜ਼ਾਰਾਂ ਮਰੀਜ਼ਾਂ ਨੂੰ ਨਵੀਂ ਜ਼ਿੰਦਗੀ ਦਿੱਤੀ ਹੈ।
ਸੰਸਥਾ ਨੂੰ ਰਾਸ਼ਟਰੀ ਅੰਗ ਅਤੇ ਟਿਸ਼ੂ ਟ੍ਰਾਂਸਪਲਾਂਟ ਸੰਗਠਨ ਦੇ ਤਹਿਤ ਖੇਤਰੀ ਦਰਜਾ ਵੀ ਪ੍ਰਾਪਤ ਹੈ। ਇਹ ਨਵੀਂ ਤਕਨੀਕੀ ਪਹਿਲਕਦਮੀ ਮਰੀਜ਼ਾਂ ਦੀ ਸੁਵਿਧਾ ਅਤੇ ਸਿਹਤ ਸੰਭਾਲ ਨੂੰ ਹੋਰ ਬਿਹਤਰ ਬਣਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਏਗੀ।
