India

Indigo ਫਲਾਈਟ ‘ਚ ਨੌਜਵਾਨ ਨੂੰ ਆਇਆ ਪੈਨਿਕ ਅਟੈਕ, ਗੁੱਸੇ ‘ਚ ਆਏ ਦੂਸਰੇ ਯਾਤਰੀ ਨੇ ਜੜ ਦਿੱਤਾ ਥੱਪੜ

ਮੁੰਬਈ-ਕੋਲਕਾਤਾ ਇੰਡੀਗੋ ਉਡਾਣ ਦੌਰਾਨ ਹੋਈ ਇੱਕ ਘਟਨਾ ਦਾ ਵੀਡੀਓ ਵਾਇਰਲ ਹੋ ਰਿਹਾ ਹੈ, ਜਿਸ ਵਿੱਚ ਇੱਕ ਯਾਤਰੀ ਨੇ ਸਾਥੀ ਯਾਤਰੀ ਨੂੰ ਥੱਪੜ ਮਾਰਿਆ। ਮੀਡੀਆ ਰਿਪੋਰਟਾਂ ਅਨੁਸਾਰ, ਇੱਕ ਮੁਸਲਿਮ ਵਿਅਕਤੀ ਨੂੰ ਪੈਨਿਕ ਅਟੈਕ ਆਇਆ, ਜਿਸ ਕਾਰਨ ਉਸ ਨੇ ਗੈਲਰੀ ਵਿੱਚ ਹੰਗਾਮਾ ਸ਼ੁਰੂ ਕਰ ਦਿੱਤਾ। ਇਸ ਤੋਂ ਨਾਰਾਜ਼ ਹੋ ਕੇ, ਸੀਟ ‘ਤੇ ਬੈਠੇ ਇੱਕ ਹੋਰ ਯਾਤਰੀ ਨੇ ਉਸ ਨੂੰ ਜ਼ੋਰਦਾਰ ਥੱਪੜ ਮਾਰ ਦਿੱਤਾ।

ਵੀਡੀਓ ਵਿੱਚ ਦਿਖਾਈ ਦਿੰਦਾ ਹੈ ਕਿ ਏਅਰ ਹੋਸਟੇਸ ਪੀੜਤ ਵਿਅਕਤੀ ਦੀ ਮਦਦ ਕਰ ਰਹੀਆਂ ਸਨ, ਪਰ ਥੱਪੜ ਮਾਰਨ ਦੀ ਘਟਨਾ ਨੇ ਸਥਿਤੀ ਨੂੰ ਹੋਰ ਵਿਗਾੜ ਦਿੱਤਾ। ਥੱਪੜ ਖਾਣ ਵਾਲਾ ਵਿਅਕਤੀ ਹੋਰ ਘਬਰਾ ਗਿਆ ਅਤੇ ਉੱਚੀ-ਉੱਚੀ ਰੋਣ ਲੱਗ ਪਿਆ। ਏਅਰ ਹੋਸਟੇਸ ਨੇ ਥੱਪੜ ਮਾਰਨ ਵਾਲੇ ਯਾਤਰੀ ਨੂੰ ਉਸ ਦੇ ਵਿਵਹਾਰ ਬਾਰੇ ਪੁੱਛਿਆ, ਜਦਕਿ ਹੋਰ ਯਾਤਰੀਆਂ ਨੇ ਵੀ ਉਸ ਨੂੰ ਝਿੜਕਿਆ।

ਥੱਪੜ ਮਾਰਨ ਵਾਲੇ ਵਿਅਕਤੀ ਨੇ ਕਿਹਾ ਕਿ ਉਸ ਨੂੰ ਹੰਗਾਮੇ ਕਾਰਨ ਪਰੇਸ਼ਾਨੀ ਹੋ ਰਹੀ ਸੀ। ਸਥਿਤੀ ਨੂੰ ਸੰਭਾਲਣ ਲਈ, ਏਅਰ ਹੋਸਟੇਸ ਨੇ ਪੀੜਤ ਵਿਅਕਤੀ ਨੂੰ ਦੂਜੀ ਸੀਟ ‘ਤੇ ਬਿਠਾਇਆ ਅਤੇ ਥੱਪੜ ਮਾਰਨ ਵਾਲੇ ਦੀ ਸੀਟ ਬਦਲ ਦਿੱਤੀ।

ਇੰਡੀਗੋ ਨੇ ਇਸ ਘਟਨਾ ‘ਤੇ ਮੁਆਫੀ ਮੰਗੀ ਹੈ ਅਤੇ ਆਪਣੀ ਪੋਸਟ ਵਿੱਚ ਕਿਹਾ ਕਿ ਅਜਿਹਾ ਵਿਵਹਾਰ ਅਸਵੀਕਾਰਨਯੋਗ ਹੈ। ਏਅਰਲਾਈਨ ਨੇ ਸਖ਼ਤ ਨਿੰਦਾ ਕਰਦਿਆਂ ਕਿਹਾ ਕਿ ਉਹ ਯਾਤਰੀਆਂ ਅਤੇ ਚਾਲਕ ਦਲ ਦੀ ਸੁਰੱਖਿਆ ਨਾਲ ਸਮਝੌਤਾ ਕਰਨ ਵਾਲੀਆਂ ਕਾਰਵਾਈਆਂ ਦੀ ਮਨਜ਼ੂਰੀ ਨਹੀਂ ਦਿੰਦੀ।

ਉਡਾਣ ਦੇ ਕੋਲਕਾਤਾ ਪਹੁੰਚਣ ‘ਤੇ ਥੱਪੜ ਮਾਰਨ ਵਾਲੇ ਵਿਅਕਤੀ ਨੂੰ ਸੁਰੱਖਿਆ ਏਜੰਸੀਆਂ ਦੇ ਹਵਾਲੇ ਕਰ ਦਿੱਤਾ ਗਿਆ। ਇਸ ਘਟਨਾ ਨੇ ਸੋਸ਼ਲ ਮੀਡੀਆ ‘ਤੇ ਵਿਆਪਕ ਚਰਚਾ ਛੇੜ ਦਿੱਤੀ ਹੈ, ਜਿਸ ਵਿੱਚ ਲੋਕ ਅਜਿਹੇ ਵਿਵਹਾਰ ਦੀ ਨਿੰਦਾ ਕਰ ਰਹੇ ਹਨ ਅਤੇ ਪੈਨਿਕ ਅਟੈਕ ਵਰਗੀ ਸਥਿਤੀ ਵਿੱਚ ਸਹਾਨੁਭੂਤੀ ਅਤੇ ਸਹੀ ਪ੍ਰਬੰਧ ਦੀ ਮੰਗ ਕਰ ਰਹੇ ਹਨ।