ਵਾਸ਼ਿੰਗਟਨ (15 ਅਪ੍ਰੈਲ, 2026): ਇਰਾਨ ਨਾਲ ਵਧਦੇ ਤਣਾਅ ਦੇ ਵਿਚਕਾਰ ਅਮਰੀਕਾ ਨੇ ਇੰਡੋਨੇਸ਼ੀਆ ਨਾਲ ਇੱਕ ਅਹਿਮ ਰੱਖਿਆ ਸਮਝੌਤਾ ਕੀਤਾ ਹੈ। 13 ਅਪ੍ਰੈਲ ਨੂੰ ਹੋਏ ਇਸ ਕਰਾਰ ਤਹਿਤ ਹੁਣ ਅਮਰੀਕੀ ਫ਼ੌਜੀ ਜਹਾਜ਼ ਇੰਡੋਨੇਸ਼ੀਆ ਦੇ ਹਵਾਈ ਖੇਤਰ ਦੀ ਵਰਤੋਂ ਕਰ ਸਕਣਗੇ। ਮਾਹਿਰਾਂ ਅਨੁਸਾਰ, ਇਹ ਕਦਮ ਦੁਨੀਆ ਦੇ ਸਭ ਤੋਂ ਵਿਅਸਤ ਸਮੁੰਦਰੀ ਰਸਤੇ ‘ਮਲੱਕਾ ਸਟ੍ਰੇਟ’ ’ਤੇ ਨਿਗਰਾਨੀ ਵਧਾਉਣ ਲਈ ਚੁੱਕਿਆ ਗਿਆ ਹੈ।
ਚੀਨ ਦੀ ਦੁੱਖਦੀ ਰਗ਼ ਹੈ ਮਲੱਕਾ
ਮਲੱਕਾ ਸਟ੍ਰੇਟ ਚੀਨ ਲਈ ਸਭ ਤੋਂ ਵੱਡੀ ਰਣਨੀਤਕ ਕਮਜ਼ੋਰੀ ਹੈ। ਚੀਨ ਦਾ ਲਗਭਗ 80% ਤੇਲ ਆਯਾਤ ਇਸੇ ਰਸਤੇ ਰਾਹੀਂ ਹੁੰਦਾ ਹੈ। ਅਮਰੀਕਾ ਦੀ ਇਸ ਇਲਾਕੇ ਵਿੱਚ ਵਧਦੀ ਸਰਗਰਮੀ ਚੀਨ ਦੀ ਆਰਥਿਕਤਾ ਅਤੇ ਸਪਲਾਈ ਲਾਈਨ ਲਈ ਵੱਡਾ ਖ਼ਤਰਾ ਬਣ ਸਕਦੀ ਹੈ। ਇਸੇ ਕਾਰਨ ਚੀਨ ਇਸ ਸਥਿਤੀ ਨੂੰ ‘ਮਲੱਕਾ ਡਿਲੇਮਾ’ (Malacca Dilemma) ਵਜੋਂ ਦੇਖਦਾ ਹੈ।
ਭਾਰਤ ਲਈ ਅਹਿਮੀਅਤ
ਭਾਰਤ ਦਾ ਲਗਭਗ 55% ਵਪਾਰ ਇਸੇ ਰਸਤੇ ਰਾਹੀਂ ਹੁੰਦਾ ਹੈ। ਅੰਡੇਮਾਨ ਅਤੇ ਨਿਕੋਬਾਰ ਟਾਪੂਆਂ ਦੀ ਭੂਗੋਲਿਕ ਸਥਿਤੀ ਕਾਰਨ ਭਾਰਤ ਇਸ ਇਲਾਕੇ ਵਿੱਚ ਮਜ਼ਬੂਤ ਸਥਿਤੀ ਵਿੱਚ ਹੈ। ਭਾਰਤ ਦਾ ‘ਆਈ.ਐਨ.ਐਸ. ਬਾਜ਼’ (INS Baaz) ਏਅਰ ਸਟੇਸ਼ਨ ਇਸ ਰਸਤੇ ’ਤੇ ਨਜ਼ਰ ਰੱਖਣ ਵਿੱਚ ਅਹਿਮ ਭੂਮਿਕਾ ਨਿਭਾਉਂਦਾ ਹੈ। ਆਉਣ ਵਾਲੇ ਦਿਨਾਂ ਵਿੱਚ ਇਸ ਖੇਤਰ ਵਿੱਚ ਅਮਰੀਕਾ ਅਤੇ ਭਾਰਤ ਦਾ ਸਹਿਯੋਗ ਹੋਰ ਵਧ ਸਕਦਾ ਹੈ।
