ਲੁਧਿਆਣੇ ਦੇ ਪੱਖੋਵਾਲ ਰੋਡ ਸਥਿਤ ਬਾਥ ਕੈਸਲ ਪੈਲੇਸ ਵਿੱਚ ਦੇਰ ਰਾਤ ਇੱਕ ਵਿਆਹ ਸਮਾਰੋਹ ਦੌਰਾਨ ਅੰਕੁਰ ਗੈਂਗ ਤੇ ਸ਼ੁਭਮ ਮੋਟਾ ਗੈਂਗ ਵਿਚਕਾਰ ਭਿਆਨਕ ਗੋਲੀਬਾਰੀ ਹੋ ਗਈ। ਪੁਰਾਣੇ ਵੈਰ-ਵਿਰੋਧ ਕਾਰਨ ਸ਼ੁਰੂ ਹੋਇਆ ਝਗੜਾ ਮਿੰਟਾਂ ਵਿੱਚ ਹੀ ਤਾਬੜਤੋੜ ਫਾਇਰਿੰਗ ਵਿੱਚ ਬਦਲ ਗਿਆ। 20-25 ਰਾਉਂਡ ਗੋਲੀਆਂ ਚੱਲੀਆਂ।ਗੋਲੀਬਾਰੀ ਵਿੱਚ ਦੋ ਵਿਅਕਤੀਆਂ ਦੀ ਮੌਤ ਹੋ ਗਈ ਜਦਕਿ ਇੱਕ ਗੰਭੀਰ ਜ਼ਖ਼ਮੀ ਹੈ।
ਮ੍ਰਿਤਕਾਂ ਵਿੱਚ ਠੇਕੇਦਾਰ ਦੀ ਰਿਸ਼ਤੇਦਾਰ ਨੀਰੂ ਛਾਬੜਾ (ਗਲੋਬਲ ਹਸਪਤਾਲ ਵਿੱਚ ਮੌਤ) ਤੇ ਵਾਸੂ ਚੋਪੜਾ ਸ਼ਾਮਲ ਦੱਸੇ ਜਾ ਰਹੇ ਹਨ। ਇੱਕ ਹੋਰ ਜ਼ਖ਼ਮੀ ਨੂੰ ਡੀਐਮਸੀ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ ਹੈ। ਹਾਲਾਂਕਿ ਮੌਤਾਂ ਦੀ ਅਧਿਕਾਰਤ ਪੁਸ਼ਟੀ ਅਜੇ ਬਾਕੀ ਹੈ।
ਵਿਆਹ ਇੱਕ ਝੂਲੇ ਦੇ ਠੇਕੇਦਾਰ ਦੇ ਪਰਿਵਾਰ ਵਿੱਚ ਸੀ। ਸਮਾਗਮ ਵਿੱਚ ਉੱਤਰੀ ਹਲਕੇ ਦੇ ਵਿਧਾਇਕ ਮਦਨ ਲਾਲ ਬੱਗਾ, ਜੇਕੇ ਡਾਵਰ ਸਮੇਤ ਕਈ ਰਾਜਨੀਤਿਕ ਹਸਤੀਆਂ ਮੌਜੂਦ ਸਨ। ਗੋਲੀਬਾਰੀ ਤੋਂ ਬਾਅਦ ਪੈਲੇਸ ਵਿੱਚ ਭਗਦੜ ਮੱਚ ਗਈ ਤੇ ਮਹਿਮਾਨ ਇਧਰ-ਉਧਰ ਭੱਜਣ ਲੱਗੇ।
ਸੂਚਨਾ ਮਿਲਦਿਆਂ ਹੀ ਪੁਲਿਸ ਨੇ ਮੌਕੇ ’ਤੇ ਪਹੁੰਚ ਕੇ ਇਲਾਕਾ ਘੇਰ ਲਿਆ। ਹਮਲਾਵਰ ਫਾਇਰਿੰਗ ਕਰਕੇ ਫ਼ਰਾਰ ਹੋ ਗਏ। ਪੁਲਿਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਤੇ ਪੂਰੇ ਇਲਾਕੇ ਵਿੱਚ ਸੁਰੱਖਿਆ ਵਧਾ ਦਿੱਤੀ ਗਈ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਜਲਦ ਹੀ ਮ੍ਰਿਤਕਾਂ-ਜ਼ਖ਼ਮੀਆਂ ਦੀ ਸਹੀ ਗਿਣਤੀ ਤੇ ਗੋਲੀਬਾਰੀ ਦੇ ਕਾਰਨਾਂ ਦੀ ਅਧਿਕਾਰਤ ਜਾਣਕਾਰੀ ਜਾਰੀ ਕੀਤੀ ਜਾਵੇਗੀ।