ਮੁਕਤਸਰ ਦੇ ਸ਼ਹਿਰ ਦੋਦਾ ਦੇ ਨੇੜਲੇ ਪਿੰਡ ਗੂੜੀਸੰਘਰ ਤੋਂ ਇੱਕ ਹੈਰਾਨ ਕਰ ਦੇਣ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ ਜਿੱਥੇ ਨੌਂ ਮਹੀਨੇ ਪਹਿਲਾਂ ਅਗਵਾ ਕੀਤੇ ਗਏ ਨੌਜਵਾਨ ਨਿਰਮਲ ਸਿੰਘ ਪੁੱਤਰ ਮਨਜੀਤ ਸਿੰਘ ਦਾ ਪਿੰਜਰ ਦੋਦਾ ਕੋਲੋਂ ਲੰਘਦੇ ਚੰਦਭਾਨ ਸੇਮ ਨਾਲੇ ’ਚੋਂ ਮਿਲਿਆ ਹੈ।
ਬੀਤੇ ਦਿਨੀਂ ਕੋਟਭਾਈ ਦੇ ਹਰਮਨਜੀਤ ਸਿੰਘ ਦਾ ਕਤਲ ਕਰਨ ਵਾਲਿਆਂ ਨੇ ਹੀ ਨਿਰਮਲ ਸਿੰਘ ਨੂੰ ਅਗਵਾ ਕੀਤਾ ਸੀ। ਕੋਟਭਾਈ ਅਗਵਾ ਕਾਂਡ ਵਿੱਚ ਫੜੇ ਗਏ ਮੁਲਜ਼ਮ ਮਲਕੀਤ ਸਿੰਘ ਨੇ ਪੁੱਛ-ਪੜਤਾਲ ਦੌਰਾਨ ਮੰਨਿਆ ਹੈ ਕਿ ਉਸ ਦਾ ਸਾਥੀ ਨਵਜੋਤ ਸਿੰਘ ਪੀੜਤ ਨਿਰਮਲ ਸਿੰਘ ਦੀ ਮਾਂ ਦੀ ਮਾਸੀ ਦਾ ਮੁੰਡਾ (ਪੀੜਤ ਦਾ ਮਾਮਾ) ਹੈ। ਉਹ ਨਿਰਮਲ ਨੂੰ ਬੀਤੀ 19 ਮਾਰਚ ਨੂੰ ਘਰੋਂ ਕਰੀਬ 6.15 ਵਜੇ ਲੈ ਕੇ ਗਿਆ ਸੀ ਤੇ ਸਾਥੀਆਂ ਦੀ ਮਦਦ ਨਾਲ ਉਸੇ ਸ਼ਾਮ ਉਸ ਦਾ ਕਤਲ ਕਰ ਕੇ ਚੰਦਭਾਨ ਸੇਮ ਨਾਲੇ ਵਿੱਚ ਸੁੱਟ ਦਿੱਤਾ ਸੀ।
ਹੁਣ ਕੋਟਭਾਈ ਦੇ ਹਰਮਨਜੀਤ ਨੂੰ ਅਗਵਾ ਕਰ ਕੇ ਕਤਲ ਕਰਨ ਦੇ ਦੋਸ਼ ਹੇਠ ਗ੍ਰਿਫ਼ਤਾਰ ਕੀਤੇ ਗਏ ਮੁਲਜ਼ਮਾਂ ਤੋਂ ਉਕਤ ਜਾਣਕਾਰੀ ਹਾਸਲ ਹੋਈ ਹੈ। ਪੁਲੀਸ ਅਧਿਕਾਰੀ ਨੇ ਦੱਸਿਆ ਕਿ ਮੁਲਜ਼ਮ ਜਗਮੀਤ ਸਿੰਘ ਮੂਸ਼ੀ ਦੀ ਨਿਸ਼ਾਨਦੇਹੀ ’ਤੇ ਡਿਊਟੀ ਮੈਜਿਸਟਰੇਟ ਨਾਇਬ ਤਹਿਸੀਲਦਾਰ ਦੋਦਾ ਬਲਜਿੰਦਰ ਸਿੰਘ ਦੀ ਹਾਜ਼ਰੀ ਵਿੱਚ ਨਿਰਮਲ ਸਿੰਘ ਦਾ ਪਿੰਜਰ, ਉਸ ਦਾ ਇੱਕ ਬੂਟ, ਅੰਦਰੂਨੀ ਕੱਪੜਿਆਂ ਦਾ ਟੁਕੜਾ, ਇਕ ਗੰਡਾਸੀ ਤੇ ਰੱਸੀ ਆਦਿ ਬਰਾਮਦ ਹੋਏ ਹਨ।
