ਦਿੱਲੀ : ਮੈਡੀਕਲ ਦਾਖਲਾ ਪ੍ਰੀਖਿਆ NEET ਪੇਪਰ ਲੀਕ ਮਾਮਲੇ ਨੂੰ ਲੈ ਕੇ ਲਗਾਤਾਰ ਨਵੇਂ ਖੁਲਾਸੇ ਹੋ ਰਹੇ ਹਨ। ਪੇਪਰ ਲੀਕ ਮਾਮਲੇ ‘ਚ ਗ੍ਰਿਫਤਾਰ ਕੀਤੇ ਗਏ ਵਿਅਕਤੀ ਨੇ ਪੁੱਛਗਿੱਛ ਦੌਰਾਨ ਮੰਨਿਆ ਹੈ ਕਿ ਉਨ੍ਹਾਂ ਨੇ ਪ੍ਰੀਖਿਆ ਤੋਂ ਪਹਿਲਾਂ ਪੇਪਰ ਪ੍ਰਾਪਤ ਕੀਤਾ ਸੀ ਅਤੇ ਪ੍ਰੀਖਿਆ ਦੇਣ ਤੋਂ ਪਹਿਲਾਂ ਸਾਰੇ ਵਿਦਿਆਰਥੀਆਂ ਨੂੰ ਸਵਾਲ-ਜਵਾਬ ਯਾਦ ਕਰਵਾਏ ਗਏ ਸਨ। ਇਕ ਦੋਸ਼ੀ ਨੇ ਦੱਸਿਆ ਕਿ ਪੇਪਰ ਲੀਕ ਕਰਨ ਦੇ ਬਦਲੇ ਹਰ ਵਿਦਿਆਰਥੀ ਤੋਂ 30 ਤੋਂ 32 ਲੱਖ ਰੁਪਏ ਲਏ ਗਏ। ਜਦੋਂਕਿ ਸਿਕੰਦਰ ਨਾਮ ਦੇ ਇੱਕ ਮੁਲਜ਼ਮ ਨੇ ਦੱਸਿਆ ਕਿ ਏਜੰਟ ਨੇ ਹਰ ਵਿਦਿਆਰਥੀ ਤੋਂ 32 ਲੱਖ ਰੁਪਏ ਮੰਗੇ ਸਨ ਪਰ ਹੋਰ ਕਮਾਉਣ ਲਈ ਉਸ ਨੇ ਹਰੇਕ ਵਿਦਿਆਰਥੀ ਤੋਂ 40 ਲੱਖ ਰੁਪਏ ਲੈ ਲਏ।
ਵਿਦਿਆਰਥੀ ਦਾ ਨਾਂ ਅਨੁਰਾਗ ਯਾਦਵ ਹੈ। ਅਨੁਰਾਗ ਯਾਦਵ ਨੇ NEET UG 2024 ਦੀ ਪ੍ਰੀਖਿਆ ਦਿੱਤੀ ਸੀ। ਉਹ ਸਮਸਤੀਪੁਰ, ਬਿਹਾਰ ਦਾ ਰਹਿਣ ਵਾਲਾ ਹੈ। ਹੁਣ ਅਨੁਰਾਗ ਨੇ ਪਟਨਾ ਪੁਲਿਸ ਨੂੰ ਇੱਕ ਬਿਆਨ ਦਿੱਤਾ ਹੈ ਜਿਸ ਵਿਚ ਉਸ ਦਾ ਕਬੂਲਨਾਮਾ ਵੀ ਹੈ। ਜਿਸ ਵਿਚ ਉਸ ਨੇ NEET ਪੇਪਰ ਲੀਕ ਸਕੈਂਡਲ ਦੀ ਪੂਰੀ ਬਲੈਕ ਬੁੱਕ ਦਾ ਪਰਦਾਫਾਸ਼ ਕੀਤਾ ਹੈ।
ਅਨੁਰਾਗ ਨੇ ਦੱਸਿਆ ਕਿ ‘ਮੈਂ ਕੋਟਾ ਦੇ ਐਲਨ ਕੋਚਿੰਗ ਸੈਂਟਰ ‘ਚ ਰਹਿ ਕੇ NEET ਪ੍ਰੀਖਿਆ ਦੀ ਤਿਆਰੀ ਕਰ ਰਿਹਾ ਸੀ। ਮੇਰੇ ਚਾਚਾ ਸਿਕੰਦਰ ਪ੍ਰਸਾਦ ਯਾਦਵੇਂਦੂ ਨਗਰ ਕੌਂਸਲ, ਦਾਨਾਪੁਰ ਵਿਚ ਜੂਨੀਅਰ ਇੰਜੀਨੀਅਰ ਹਨ। ਉਸ ਨੇ ਮੈਨੂੰ ਕੋਟਾ ਤੋਂ ਵਾਪਸ ਆਉਣ ਲਈ ਕਿਹਾ। NEET ਪ੍ਰੀਖਿਆ ਲਈ ਸੈਟਿੰਗ ਹੋ ਗਈ ਹੈ। ਮੈਂ ਕੋਟਾ ਤੋਂ ਵਾਪਸ ਆਇਆ। 4 ਮਈ ਦੀ ਰਾਤ ਨੂੰ ਮੇਰਾ ਚਾਚਾ ਮੈਨੂੰ ਅਮਿਤ ਆਨੰਦ ਅਤੇ ਨਿਤੀਸ਼ ਕੁਮਾਰ ਕੋਲ ਛੱਡ ਗਿਆ।
ਜਿੱਥੇ ਮੈਨੂੰ NEET ਪ੍ਰੀਖਿਆ ਦੇ ਪ੍ਰਸ਼ਨ ਪੱਤਰ ਅਤੇ ਉੱਤਰ ਪੱਤਰ ਦਿੱਤੇ ਗਏ ਸਨ। ਰਾਤ ਵੇਲੇ ਮੈਨੂੰ ਇਹ ਪੱਤਰ ਪੂਰਾ ਯਾਦ ਕਰਵਾਇਆ ਗਿਆ। ਵਿਦਿਆਰਥੀ ਨੇ ਕਿਹਾ, ‘ਮੇਰਾ NEET ਪ੍ਰੀਖਿਆ ਕੇਂਦਰ ਡੀਵਾਈ ਪਾਟਿਲ ਸਕੂਲ ਸੀ। ਜਦੋਂ ਮੈਂ ਇਮਤਿਹਾਨ ਦੇਣ ਗਿਆ ਤਾਂ ਜੋ ਪ੍ਰਸ਼ਨ ਪੱਤਰ ਮੈਨੂੰ ਯਾਦ ਕਰਵਾਇਆ ਗਿਆ ਸੀ, ਉਹੀ ਸਾਰੇ ਪ੍ਰਸ਼ਨ ਇਮਤਿਹਾਨ ਵਿਚ ਸਹੀ ਢੰਗ ਨਾਲ ਆਏ ਸਨ। ਇਮਤਿਹਾਨ ਤੋਂ ਬਾਅਦ ਅਚਾਨਕ ਪੁਲਿਸ ਨੇ ਆ ਕੇ ਮੈਨੂੰ ਫੜ ਲਿਆ। ਮੈਂ ਆਪਣਾ ਗੁਨਾਹ ਕਬੂਲ ਕਰਦਾ ਹਾਂ।
