ਮੁੰਬਈ : ਅੱਜ ਦੇ ਦੌਰ ਵਿੱਚ ਹਰ ਮਾਪੇ ਆਪਣੇ ਬੱਚੇ ਤੋਂ ਵੱਡੀਆਂ ਉਮੀਦਾਂ ਕਰਦੇ ਹਨ। ਉਹ ਬੱਚੇ ਦੇ 90 ਫੀਸਦੀ ਨੰਬਰ ਆਉਣ ਤੇ ਵੀ ਖੁਸ਼ ਨਹੀਂ ਹੁੰਦੇ, ਕਿਉਂ ਉਹ 95 ਫੀਸਦੀ ਨੰਬਰਾਂ ਦੀ ਉਮੀਦ ਲਾਈ ਬੈਠੇ ਹੁੰਦੇ ਹਨ। ਇਸੇ ਭਾਵਨਾ ਸਕਦਾ ਕਈ ਬੱਚੇ ਮਾਪਿਆਂ ਦੀਆਂ ਉਮੀਦਾਂ ਉੱਤੇ ਖਰਾ ਨਾ ਉਤਰਨ ਕਾਰਨ ਨਿਰਾਸ਼ ਹੋ ਕੇ ਆਪਣੀ ਜ਼ਿੰਦਗੀ ਤੋਂ ਹੀ ਹੱਥ ਧੋ ਲੈਂਦੇ ਹਨ। ਪਰ ਇਸ ਦੇ ਨਾਲ ਹੀ ਬਹੁਤ ਘੱਟ ਮਾਪੇ ਅਜਿਹੇ ਵੀ ਹੁੰਦੇ ਹਨ, ਜੋ ਆਪਣੇ ਬੱਚੇ ਦੇ ਪਾਸ ਹੋਣ ‘ਤੇ ਵੀ ਖੁਸ਼ੀਆਂ ਮਨਾਉਂਦੇ ਹਨ। ਠਾਣੇ ਵਿੱਚ ਰਹਿਣ ਵਾਲਾ ਕਰਾੜ ਪਰਿਵਾਰ ਵੀ ਇਨ੍ਹਾਂ ਵਿੱਚ ਸ਼ਾਮਲ ਹੈ।
ਹਾਲ ਹੀ ਵਿੱਚ ਜਾਰੀ ਮਹਾਰਾਸ਼ਟਰ 10ਵੀਂ ਦੀ ਪ੍ਰੀਖਿਆ ਵਿੱਚ, ਉਸਦਾ ਪੁੱਤਰ ਵਿਸ਼ਾਲ ਕਰਾੜ 35% ਅੰਕਾਂ ਨਾਲ ਪਾਸ ਹੋਇਆ ਹੈ। ਉਨ੍ਹਾਂ ਨੇ ਆਪਣੇ ਬੇਟੇ ਦੇ 10ਵੀਂ ਪਾਸ ਹੋਣ ‘ਤੇ ਖੁਸ਼ੀ ਮਨਾਈ ਅਤੇ ਲੋਕਾਂ ‘ਚ ਮਠਿਆਈਆਂ ਵੰਡੀਆਂ। ਵਿਸ਼ਾਲ ਦੇ ਪਿਤਾ ਇੱਕ ਆਟੋ ਡਰਾਈਵਰ ਹਨ ਅਤੇ ਮਾਂ ਘਰ ਵਿੱਚ ਕੰਮ ਕਰਦੀ ਹੈ। ਗਰੀਬ ਹੋਣ ਕਾਰਨ ਉਸ ਨੂੰ ਆਪਣੇ ਬੇਟੇ ਨੂੰ ਪੜ੍ਹਾਉਣ ਵਿਚ ਬਹੁਤ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਸੀ ਪਰ ਉਸ ਨੇ ਆਪਣੇ ਪੁੱਤਰ ਦੀ ਪੜ੍ਹਾਈ ਜਾਰੀ ਰੱਖੀ। ਇਸ ਦੇ ਲਈ ਉਹ ਸ਼ਿਵਾਈ ਨਗਰ ਤੋਂ ਉਥਲਸਰ ਸ਼ਿਫਟ ਹੋ ਗਿਆ।
ਵਿਸ਼ਾਲ ਨੂੰ ਪਹਿਲਾਂ ਤਾਂ ਯਕੀਨ ਨਹੀਂ ਸੀ ਕਿ ਉਹ ਪਾਸ ਹੋਵੇਗਾ, ਪਰ ਜਦੋਂ ਨਤੀਜਾ ਆਇਆ ਤਾਂ ਉਹ ਹੈਰਾਨ ਰਹਿ ਗਿਆ। ਉਸਨੇ ਸਾਰੇ 6 ਵਿਸ਼ਿਆਂ ਵਿੱਚ ਪਾਸਿੰਗ ਅੰਕ ਪ੍ਰਾਪਤ ਕੀਤੇ। ਭਾਵ ਉਸ ਨੇ ਹਰ ਵਿਸ਼ੇ ਵਿੱਚ 35 ਅੰਕ ਪ੍ਰਾਪਤ ਕੀਤੇ। ਮਰਾਠੀ ਮਾਧਿਅਮ ਦੇ ਵਿਦਿਆਰਥੀ ਵਿਸ਼ਾਲ ਨੇ ਜਦੋਂ ਇਹ ਗੱਲ ਆਪਣੇ ਮਾਪਿਆਂ ਨੂੰ ਦੱਸੀ ਤਾਂ ਉਹ ਵੀ ਖ਼ੁਸ਼ ਹੋ ਗਏ।
ਉਸ ਦੇ ਪਿਤਾ ਨੇ ਕਿਹਾ ਕਿ ਪੁੱਤਰ ਨੇ ਐਸਐਸਸੀ ਦੀ ਪ੍ਰੀਖਿਆ ਪਾਸ ਕਰਕੇ ਸਾਡਾ ਮਾਣ ਵਧਾਇਆ ਹੈ, ਇਸ ਤੋਂ ਵੱਡੀ ਖੁਸ਼ੀ ਹੋਰ ਕੀ ਹੋਵੇਗੀ। ਆਰਥਿਕ ਤੰਗੀ ਦੇ ਬਾਵਜੂਦ ਵਿਸ਼ਾਲ ਨੇ ਆਪਣੇ ਮਾਪਿਆਂ ਦੇ ਸਹਿਯੋਗ ਅਤੇ ਹੱਲਾਸ਼ੇਰੀ ਨਾਲ ਹੀ ਇਹ ਪ੍ਰੀਖਿਆ ਪਾਸ ਕੀਤੀ ਹੈ। ਵਿਸ਼ਾਲ ਦਾ ਕਹਿਣਾ ਹੈ ਕਿ ਉਹ ਆਪਣੀ ਪੜ੍ਹਾਈ ਜਾਰੀ ਰੱਖੇਗਾ ਅਤੇ ਆਪਣੇ ਮਾਪਿਆਂ ਨੂੰ ਚੰਗੀ ਜ਼ਿੰਦਗੀ ਦੇਣ ਦੀ ਕੋਸ਼ਿਸ਼ ਕਰੇਗਾ।
