ਬਿਊਰੋ ਰਿਪੋਰਟ : ਕਾਂਗਰਸ ਦੇ ਸੀਨੀਅਰ ਵਿਧਾਇਕ ਸੁਖਪਾਲ ਸਿੰਘ ਖਹਿਰਾ ਨੇ ਮਾਨ ਸਰਕਾਰ ਦੀ ਕੱਚੇ ਮੁਲਾਜ਼ਮਾਂ ਨੂੰ ਪੱਕਾ ਕਰਨ ਦੇ ਦਾਅਵੇ ‘ਤੇ ਸਵਾਲ ਖੜੇ ਕੀਤੇ ਹਨ । ਕੁਝ ਦਿਨ ਪਹਿਲਾਂ ਹੀ ਮਾਨ ਕੈਬਨਿਟ ਨੇ 14 ਹਜ਼ਾਰ ਤੋਂ ਵੱਧ ਕੱਚੇ ਮੁਲਾਜ਼ਮਾਂ ਨੂੰ ਪੱਕਾ ਕਰਨ ਨੂੰ ਮਨਜ਼ੂਰੀ ਦਿੱਤੀ ਸੀ । ਇਸ ਦੌਰਾਨ ਮੁੱਖ ਮੰਤਰੀ ਨੇ ਕਿਹਾ ਸੀ ‘ਕੱਚਾ ਸ਼ਬਦ’ ਅਸੀਂ ਪੰਜਾਬ ਦੇ ਸਰਕਾਰੀ ਮੁਲਾਜ਼ਮਾਂ ਦੇ ਸ਼ਬਦ ਕੋਸ਼ ਤੋਂ ਕੱਢ ਦੇਵਾਂਗੇ। ਉਨ੍ਹਾਂ ਕਿਹਾ ਸੀ ਕਿ ਮੁਲਾਜ਼ਮ ਕੱਚਾ-ਪੱਕਾ ਨਹੀਂ ਹੁੰਦਾ ਹੈ । ਜਦਕਿ ਹੁਣ ਮਾਨ ਸਰਕਾਰ ਡਾਕਟਰਾਂ ਅਤੇ ਮੈਡੀਕਲ ਸਟਾਫ ਨੂੰ ਡੇਲੀ ਵੇਜ ‘ਤੇ ਰੱਖਣ ਦੀ ਗੱਲ ਕਹਿ ਰਹੀ ਹੈ । ਇਸੇ ਨੂੰ ਲੈਕੇ ਸੁਖਪਾਲ ਸਿੰਘ ਖਹਿਰਾ ਨੇ ਸਵਾਲ ਚੁੱਕੇ ਹਨ ।
ਸੁਖਪਾਲ ਸਿੰਘ ਖਹਿਰਾ ਨੇ ਤੰਜ ਕੱਸ ਦੇ ਹੋਏ ਲਿਖਿਆ ‘ਕੀ ਇਹ ਹੀ ਬਦਲਾਅ ਹੈ । ਪੰਜਾਬ ਸਰਕਾਰ ਦੇ ਮੈਡੀਕਲ ਅਫਸਰ (MBBS), ਫਾਰਮਾਸਿਸਟ ਅਤੇ ਕਲੀਨਿਕ ਅਸਿਸਟੈਂਟ ਦੇ 83-83 ਅਹੁਦਿਆਂ ‘ਤੇ ਡੇਲੀਵੇਜ ਨਿਯੁਕਤ ਕਰਨ ਸਬੰਧੀ ਇਸ਼ਤਿਆਰ ਕੱਢਿਆ ਗਿਆ ਹੈ । ਇਹ ਹੀ ਕਾਰਨ ਹੈ ਕਿ ਕਾਂਗਰਸੀ ਵਿਧਾਇਕ ਨੇ ਮਾਨ ਸਰਕਾਰ ਦੇ ਰੈਗੂਲਰ ਨੌਕਰੀ ਦੇਣ ਦੇ ਦਾਅਵੇ ‘ਤੇ ਸਵਾਲ ਖੜੇ ਕੀਤੇ ਹਨ।
–@BhagwantMann has been daily claiming to give regular jobs citing Delhi Model repeatedly but now he’s engaging docs & other medics on daily wages! What a Badlav! @INCIndia pic.twitter.com/nHRGtUN9Dn
— Sukhpal Singh Khaira (@SukhpalKhaira) February 27, 2023
NHM ਦੇ ਤਹਿਤ ਹੋਣੀ ਹੈ ਨਿਯੁਕਤੀ
ਕੌਮੀ ਸਿਹਤ ਮਿਸ਼ਨ (NHM) ਦੇ ਤਹਿਤ ਡਾਕਟਰ ਅਤੇ ਮੈਡੀਕਲ ਸਟਾਫ ਦੀ ਨਿਯੁਕਤੀ ਕੀਤੀ ਜਾਵੇਗੀ । ਇਸ ਦੇ ਸਬੰਧ ਵਿੱਚ ਸਾਰੀਆਂ ਸ਼ਰਤਾਂ ਅਤੇ ਜਾਣਕਾਰੀ https://nhm.punjab.gov.in ‘ਤੇ ਦਿੱਤੀ ਗਈ ਹੈ । ਪੰਜਾਬ ਸਰਕਾਰ ਨੇ ਡੇਲੀ ਵੇਜ ‘ਤੇ ਇੰਨਾਂ ਭਰਤੀਆਂ ਲਈ ਅਰਜ਼ੀਆਂ ਦੇਣ ਦੀ ਅਖੀਰਲੀ ਤਰੀਕ 10 ਮਾਰਚ ਰੱਖੀ ਹੈ ।
ਇੱਕ ਮਰੀਜ਼ ਨੂੰ ਵੇਖਣ ਲਈ 50 ਰੁਪਏ ਦਿੱਤੇ ਜਾਣਗੇ
ਪੰਜਾਬ ਸਰਕਾਰ ਦੇ ਨਿਰਦੇਸ਼ਾਂ ਮੁਤਾਬਿਕ ਇੱਕ ਮੈਡੀਕਲ ਅਫਸਰ (MBBS) ਨੂੰ ਰੋਜ਼ਾਨਾ ਘੱਟੋ-ਘੱਟ 50 ਮਰੀਜ਼ ਵੇਖਣੇ ਹੋਣਗੇ ਅਤੇ ਇੱਕ ਮਰੀਜ਼ ਦੇ 50 ਰੁਪਏ ਦਿੱਤੇ ਜਾਣਗੇ । ਹਰ ਮਰੀਜ਼ ਨੂੰ ਅਟੈਂਡ ਕਰਨ ਦੇ ਲਈ 12 ਰੁਪਏ ਦਿੱਤੇ ਜਾਣਗੇ । ਇਸ ਤੋਂ ਇਲਾਵਾ ਕਲੀਨਿਕ ਸਹਾਇਕ ਨੂੰ 11 ਰੁਪਏ ਪ੍ਰਤੀ ਮਰੀਜ਼ ਦਿੱਤਾ ਜਾਵੇਗਾ ਉਸ ਨੂੰ ਵੀ ਘੱਟੋ-ਘੱਟ 50 ਮਰੀਜ਼ਾਂ ਨੂੰ ਅਟੈਂਡ ਕਰਨਾ ਹੋਵੇਗਾ ।
ਪੰਜ ਜ਼ਿਲ੍ਹਿਆਂ ਵਿੱਚ ਨਿਯੁਕਤੀ ਕੀਤੇ ਜਾਣਗੇ MO ਅਤੇ ਸਟਾਫ
ਡੇਲੀ ਵੇਜ ‘ਤੇ ਨਿਯੁਕਤ ਕੀਤੇ ਜਾਣ ਵਾਲੇ ਮੈਡੀਕਲ ਅਫਸਰ,ਫਾਰਮਾਸਿਸਟ ਅਤੇ ਕਲੀਨਿਕ ਅਸਿਸਟੈਂਟ ਨੂੰ ਪੰਜਾਬ ਦੇ 5 ਜ਼ਿਲ੍ਹਿਆਂ ਵਿੱਚ ਨਿਯੁਕਤ ਕੀਤਾ ਜਾਏਗਾ । ਇੰਨਾਂ ਨੂੰ ਅੰਮ੍ਰਿਤਸਰ,ਜਲੰਧਰ,ਲੁਧਿਆਣਾ,ਪਟਿਆਲਾ,ਫਗਵਾੜਾ,ਕਪੂਰਥਲਾ ਵਿੱਚ ਨਿਯੁਕਤ ਕੀਾਤ ਜਾਵੇਗਾ ।
