ਸੋਨਭੱਦਰ : ਪ੍ਰਾਇਮਰੀ ਸਕੂਲ ਦਾ ਗੇਟ ਖੰਭੇ ਸਮੇਤ ਡਿੱਗਣ ਨਾਲ ਸਕੂਲ ‘ਚ ਪੜ੍ਹ ਰਹੇ 7 ਸਾਲਾ ਵਿਦਿਆਰਥੀ ਦੀ ਮੌਤ ਹੋ ਗਈ। ਇਹ ਦਿਲ ਦਹਿਲਾਉਣ ਵਾਲਾ ਹਾਦਸਾ ਉੱਤਰ ਪ੍ਰਦੇਸ਼ ਦੇ ਦੁਧੀ ਜ਼ਿਲੇ ਦੇ ਪਕਡੇਵਾ ਦੇ ਪ੍ਰਾਇਮਰੀ ਸਕੂਲ ਵਿੱਚ ਵਾਪਰਿਆ ਹੈ। ਗੇਟ ਡਿੱਗਣ ਕਾਰਨ ਬੱਚਾ ਉਸ ਵਿੱਚ ਦੱਬ ਕੇ ਗੰਭੀਰ ਜ਼ਖ਼ਮੀ ਹੋ ਗਿਆ। ਜਲਦਬਾਜ਼ੀ ‘ਚ ਸਥਾਨਕ ਲੋਕਾਂ ਨੇ ਉਸ ਨੂੰ ਸੀ.ਐੱਚ.ਸੀ. ‘ਚ ਦਾਖਲ ਕਰਵਾਇਆ, ਜਿੱਥੇ ਡਾਕਟਰਾਂ ਨੇ ਬੱਚੇ ਦੀ ਗੰਭੀਰ ਹਾਲਤ ਨੂੰ ਦੇਖਦੇ ਹੋਏ ਉਸ ਨੂੰ ਟਰਾਮਾ ਸੈਂਟਰ ਲਈ ਰੈਫਰ ਕਰ ਦਿੱਤਾ, ਪਰ ਵਾਰਾਣਸੀ ਦੇ ਟਰਾਮਾ ਸੈਂਟਰ ‘ਚ ਇਲਾਜ ਦੌਰਾਨ ਬੱਚੇ ਦੀ ਮੌਤ ਹੋ ਗਈ।
ਪਰਿਵਾਰ ਸਮੇਤ ਪਿੰਡ ਵਾਸੀਆਂ ਦਾ ਦੋਸ਼ ਹੈ ਕਿ ਪਿਛਲੇ ਦਿਨੀਂ ਸਕੂਲ ਦੀ ਖਸਤਾ ਹਾਲਤ ਨੂੰ ਦੇਖਦਿਆਂ ਚਾਰਦੀਵਾਰੀ ਅਤੇ ਗੇਟ ਦੀ ਉਸਾਰੀ ਦੇ ਹਿੱਸੇ ਵਜੋਂ ਨਵੀਨੀਕਰਨ ਕੀਤਾ ਗਿਆ ਸੀ ਪਰ ਫਿਰ ਵੀ ਸਕੂਲ ਦੀ ਇਮਾਰਤ ਪੂਰੀ ਤਰ੍ਹਾਂ ਖਸਤਾ ਹੋ ਚੁੱਕੀ। ਹਾਲਤ ਇਹ ਹੈ ਚਾਰਦੀਵਾਰੀ ਵੀ ਹੱਥਾਂ ਨਾਲ ਹੀ ਹਿੱਲ ਰਹੀ ਹੈ। ਇਸ ਸਕੂਲ ਵਿੱਚ ਪੜ੍ਹਦੇ ਬੱਚਿਆਂ ਦੀ ਜਾਨ ਖ਼ਤਰੇ ਵਿੱਚ ਹੈ। ਇੱਥੇ ਸਕੂਲ ਦੀ ਕਾਇਆ ਕਲਪ ਦੇ ਨਾਂ ‘ਤੇ ਕੁਝ ਨਹੀਂ ਹੋਇਆ ਅਤੇ ਇਹ ਘਟਨਾ ਇਸੇ ਦਾ ਨਤੀਜਾ ਹੈ।
ਇੰਝ ਵਾਪਰਿਆ ਹਾਦਸਾ
ਨਿਊਜ਼ 18 ਦੀ ਰਿਪੋਰਟ ਮੁਤਾਬਿਕ ਦਰਅਸਲ ਸ਼ੁੱਕਰਵਾਰ ਨੂੰ ਪਹਿਲੀ ਜਮਾਤ ‘ਚ ਪੜ੍ਹਦਾ 7 ਸਾਲਾ ਸ਼ਲੋਕ ਪਟੇਲ ਰੋਜ਼ਾਨਾ ਦੀ ਤਰ੍ਹਾਂ ਸਕੂਲ ਜਾਣ ਲਈ ਪਕਦੇਵਾ ਪ੍ਰਾਇਮਰੀ ਸਕੂਲ ਗਿਆ ਸੀ। ਇਸੇ ਦੌਰਾਨ ਦੁਪਹਿਰ ਇਕ ਵਜੇ ਸਕੂਲ ਦੇ ਗੇਟ ’ਤੇ ਚੜ੍ਹ ਕੇ ਝੂਲ ਰਿਹਾ ਸੀ ਕਿ ਅਚਾਨਕ ਸਕੂਲ ਦਾ ਗੇਟ ਸਮੇਤ ਪਿੱਲਰ ਉਸ ’ਤੇ ਡਿੱਗ ਗਿਆ ਅਤੇ ਬੱਚਾ ਉਸ ਹੇਠਾਂ ਦੱਬ ਗਿਆ।
ਬੀਐਚਯੂ ਪ੍ਰਸ਼ਾਸਨ ਨੇ ਬੱਚੇ ਦਾ ਪੋਸਟਮਾਰਟਮ ਕਰਵਾ ਕੇ ਲਾਸ਼ ਵਾਰਸਾਂ ਨੂੰ ਸੌਂਪ ਦਿੱਤੀ। ਗੁੱਸਾ ਜ਼ਾਹਰ ਕਰਦਿਆਂ ਪਿੰਡ ਵਾਸੀਆਂ ਅਤੇ ਪਰਿਵਾਰਕ ਮੈਂਬਰਾਂ ਨਾਲ ਘੰਟਿਆਂਬੱਧੀ ਹੰਗਾਮਾ ਕੀਤਾ। ਦੋਸ਼ ਹੈ ਕਿ ਸਕੂਲ ਦੇ ਅਧਿਆਪਕ ਵਿਦਿਅਕ ਕੰਮਾਂ ਦੌਰਾਨ ਹੀ ਸਕੂਲ ਛੱਡ ਕੇ ਕਿਤੇ ਚਲੇ ਗਏ ਸਨ। ਸਕੂਲ ਜਾਣ ਸਮੇਂ ਅਧਿਆਪਕ ਵੀ ਗੈਰਹਾਜ਼ਰ ਰਹਿੰਦੇ ਹਨ, ਜਿਸ ਕਾਰਨ ਇੱਕ ਬੱਚੇ ਨਾਲ ਇਹ ਘਟਨਾ ਵਾਪਰੀ ਹੈ।
ਪਰਿਵਾਰ ਵੱਲੋਂ ਦੋਸ਼ੀਆਂ ਖਿਲਾਫ ਸਖ਼ਤ ਕਾਰਵਾਈ ਦੀ ਮੰਗ
ਮ੍ਰਿਤਕ ਦੇ ਪਿਤਾ ਸੁਰਿੰਦਰ ਪਟੇਲ ਨੇ ਦੋਸ਼ ਲਾਇਆ ਕਿ ਇਹ ਹਾਦਸਾ ਪ੍ਰਿੰਸੀਪਲ ਤੇ ਸਕੱਤਰ ਦੀ ਲਾਪਰਵਾਹੀ ਕਾਰਨ ਵਾਪਰਿਆ ਹੈ। ਉਨ੍ਹਾਂ ਮੁਆਵਜ਼ੇ ਦੀ ਮੰਗ ਕਰਦਿਆਂ ਦੋਸ਼ੀਆਂ ਖ਼ਿਲਾਫ਼ ਕਾਰਵਾਈ ਦੀ ਮੰਗ ਕੀਤੀ। ਉਨ੍ਹਾਂ ਜ਼ਿਲ੍ਹਾ ਮੈਜਿਸਟਰੇਟ ਪਾਸੋਂ ਪਕਡੇਵਾ ਸਕੂਲ ਦੀ ਨਵੀਨੀਕਰਨ ਦੇ ਨਾਂ ’ਤੇ ਕੀਤੀਆਂ ਗਈਆਂ ਅਦਾਇਗੀਆਂ ਅਤੇ ਕੀਤੇ ਕੰਮਾਂ ਦੀ ਮੌਕੇ ’ਤੇ ਜਾ ਕੇ ਜਾਂਚ ਕਰਕੇ ਦੋਸ਼ੀਆਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ ਹੈ।
ਇਸ ਮਾਮਲੇ ‘ਚ ਸਪੱਸ਼ਟੀਕਰਨ ਦਿੰਦਿਆਂ ਦਲਾਲਪੁਰ ਦੇ ਪਿ੍ੰਸੀਪਲ ਪ੍ਰਤੀਨਿਧੀ ਅੰਟੂ ਨੇ ਦੱਸਿਆ ਕਿ ਸਕੱਤਰ ਨੂੰ ਵਾਰ-ਵਾਰ ਬੇਨਤੀ ਕਰਨ ਦੇ ਬਾਵਜੂਦ ਸਪਲਾਇਰ ਨੂੰ ਅਦਾਇਗੀ ਨਹੀਂ ਹੋ ਰਹੀ। ਜਿਸ ਵਜ੍ਹਾ ਕਾਰਨ ਉਹ ਸੀਮਿੰਗ ਨਹੀਂ ਦੇ ਰਿਹਾ ਹੈ, ਜਿਸ ਕਾਰਨ ਸਕੂਲ ਦੀ ਪੁਰਾਣੀ ਛੱਤ ਸਮੇਤ ਚਾਰਦੀਵਾਰੀ ਦੀ ਮੁਰੰਮਤ ਨਹੀਂ ਹੋ ਰਹੀ।
