ਸਰਹਿੰਦ ਵਿੱਚ ਮਾਲ ਗੱਡੀ ਦੀ ਟੱਕਰ ਤੋਂ ਚਾਰ ਦਿਨ ਬਾਅਦ, ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਲੋਕੋ ਪਾਇਲਟ ਤੇ ਉਸਦਾ ਸਹਾਇਕ ਗੱਡੀ ਚਲਾਉਂਦੇ ਸਮੇਂ ਸੌਂ ਗਏ ਅਤੇ ਲਾਲ ਸਿਗਨਲ ‘ਤੇ ਬ੍ਰੇਕ ਲਗਾਉਣ ਵਿੱਚ ਅਸਫ਼ਲ ਰਹੇ। ਰੇਲਵੇ ਦੇ ਇਕ ਅਧਿਕਾਰੀ ਨੇ ਇਹ ਜਾਣਕਾਰੀ ਦਿੱਤੀ ਹੈ।
ਜਾਂਚ ਰਿਪੋਰਟ ਦੇ ਅਨੁਸਾਰ ਇਹ ਘਟਨਾ 2 ਜੂਨ ਨੂੰ ਸਰਹਿੰਦ ਜੰਕਸ਼ਨ ਅਤੇ ਸਾਧੂਗੜ੍ਹ ਰੇਲਵੇ ਸਟੇਸ਼ਨ ਦੇ ਵਿਚਕਾਰ ਤੜਕੇ 3.15 ਵਜੇ ਵਾਪਰੀ ਜਦੋਂ ਯੂਪੀ ਜੀਵੀਜੀਐਨ (UP GVGN) ਦਾ ਇੰਜਣ ਪਟੜੀ ਤੋਂ ਉਤਰ ਗਿਆ ਅਤੇ ਮੁੱਖ ਯਾਤਰੀ ਲਾਈਨ ‘ਤੇ ਉਲਟ ਗਿਆ।
ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਇਤਫ਼ਾਕ ਨਾਲ, ਜੰਮੂ ਤਵੀ ਸਮਰ ਸਪੈਸ਼ਲ (Jammu Tawi Summer Special) ਵੀ ਇਸ ਸਮੇਂ ਨੇੜੇ ਦੀ ਲਾਈਨ ਤੋਂ ਗੁਜ਼ਰ ਰਹੀ ਸੀ, ਉਹ ਵੀ ਟ੍ਰੈਕ ਦੇ ਨੇੜੇ ਪਈ ਮਾਲ ਗੱਡੀ ਦੇ ਇੰਜਣ ਨਾਲ ਟਕਰਾ ਗਈ ਅਤੇ ਇਸ ਦੇ ਸਾਰੇ ਪਹੀਏ ਪਟੜੀ ਤੋਂ ਉਤਰ ਗਏ।
ਜਾਂਚ ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਸੈਂਕੜੇ ਯਾਤਰੀ ਮਸਾਂ-ਮਸਾਂ ਬਚੇ ਕਿਉਂਕਿ ਜੰਮੂ ਤਵੀ 46 ਕਿਲੋਮੀਟਰ ਪ੍ਰਤੀ ਘੰਟਾ (ਕਿ.ਮੀ. ਪ੍ਰਤੀ ਘੰਟਾ) ਦੀ ਘੱਟ ਰਫ਼ਤਾਰ ਨਾਲ ਚੱਲ ਰਹੀ ਸੀ ਕਿਉਂਕਿ ਪੀਲਾ ਸਿਗਨਲ ਨੇੜੇ ਆ ਰਿਹਾ ਸੀ। ਜੇ ਇੱਥੇ ਪੀਲਾ ਸਿਗਨਲ ਨਾ ਹੁੰਦਾ, ਤੇ ਗੱਡੀ ਰਫ਼ਤਾਰ ਘੱਟ ਨਾ ਕਰਦੀ ਤਾਂ ਇੱਥੇ ਭਿਆਨਕ ਹਾਦਸਾ ਹੋ ਸਕਦਾ ਸੀ।
ਰੇਲਵੇ ਵਿੱਚ, ਪੀਲੇ ਰੰਗ ਦਾ ਇੱਕ ਸਿਗਨਲ ਸਾਵਧਾਨੀ ਦਾ ਪ੍ਰਤੀਕ ਹੁੰਦਾ ਹੈ, ਜਿੱਥੇ ਲੋਕੋ ਪਾਇਲਟਾਂ ਨੂੰ ਇਸ ਉਮੀਦ ਵਿੱਚ ਰੇਲਗੱਡੀ ਦੀ ਗਤੀ ਨੂੰ ਘਟਾਉਣਾ ਚਾਹੀਦਾ ਹੈ ਕਿ ਅਗਲਾ ਸਿਗਨਲ ਲਾਲ ਹੋ ਸਕਦਾ ਹੈ।
ਪਰ UP GVGN ਦਾ ਲੋਕੋ ਪਾਇਲਟ ਅਤੇ ਸਹਾਇਕ ਲੋਕੋ ਪਾਇਲਟ ਟੁੱਟੇ ਹੋਏ ਇੰਜਣ ਦੇ ਅੰਦਰ ਫਸ ਗਏ ਸਨ ਅਤੇ ਮੌਕੇ ‘ਤੇ ਮੌਜੂਦ ਰੇਲਵੇ ਕਰਮਚਾਰੀਆਂ ਨੂੰ ਉਨ੍ਹਾਂ ਨੂੰ ਬਚਾਉਣ ਲਈ ਵਿੰਡਸ਼ੀਲਡ ਨੂੰ ਤੋੜਨਾ ਪਿਆ। ਦੋਵਾਂ ਨੂੰ ਜ਼ਖਮੀ ਹਾਲਤ ‘ਚ ਹਸਪਤਾਲ ‘ਚ ਭਰਤੀ ਕਰਵਾਇਆ ਗਿਆ। ਗਨੀਮਤ ਹੈ ਕਿ ਇਸ ਘਟਨਾ ‘ਚ ਕੋਈ ਯਾਤਰੀ ਜ਼ਖਮੀ ਨਹੀਂ ਹੋਇਆ।
ਹਾਲਾਂਕਿ ਜਾਂਚ ਟੀਮ ਨੇ ਕਿਹਾ ਹੈ ਕਿ ਉਨ੍ਹਾਂ ਨੇ ਦੋਵਾਂ ਡਰਾਈਵਰਾਂ ਦੇ ਬਿਆਨ ਨਹੀਂ ਲਏ ਕਿਉਂਕਿ ਉਹ ਜ਼ਖਮੀ ਸਨ ਅਤੇ ਹਸਪਤਾਲ ਵਿੱਚ ਦਾਖਲ ਸਨ, ਹਾਲਾਂਕਿ, ਯੂਪੀ ਜੀਵੀਜੀਐਨ ਦੇ ਰੇਲ ਮੈਨੇਜਰ ਨੇ ਆਪਣੇ ਲਿਖਤੀ ਬਿਆਨ ਵਿੱਚ ਕਿਹਾ ਕਿ ਜਦੋਂ ਉਨ੍ਹਾਂ ਨੂੰ ਇੰਜਣ ਤੋਂ ਬਚਾਇਆ ਗਿਆ ਸੀ, ਉਨ੍ਹਾਂ ਨੇ ਕਬੂਲ ਕੀਤਾ ਕਿ ਉਹ ਗੱਡੀ ਚਲਾਉਂਦੇ ਹੋਏ ਸੌਂ ਗਏ ਸਨ।
ਰੇਲ ਮੈਨੇਜਰ ਨੇ ਜਾਂਚ ਟੀਮ ਨੂੰ ਲਿਖਤੀ ਰੂਪ ਵਿੱਚ ਕਿਹਾ, “ਜੇਕਰ ਐਲਪੀ (ਲੋਕੋ ਪਾਇਲਟ) ਅਤੇ ਏਐਲਪੀ (ਸਹਾਇਕ ਲੋਕੋ ਪਾਇਲਟ) ਪੂਰੀ ਤਰ੍ਹਾਂ ਆਰਾਮ ਕਰਨ ਤੋਂ ਬਾਅਦ ਡਿਊਟੀ ਵਿੱਚ ਸ਼ਾਮਲ ਹੁੰਦੇ ਅਤੇ ਡਰਾਈਵਿੰਗ ਕਰਦੇ ਸਮੇਂ ਚੌਕਸ ਰਹਿੰਦੇ, ਤਾਂ ਇਹ ਘਟਨਾ ਟਲ ਸਕਦੀ ਸੀ।”
ਉੱਧਰ ਲੋਕੋ ਪਾਇਲਟਾਂ ਦੇ ਸੰਗਠਨ ਨੇ ਰੇਲਵੇ ‘ਤੇ ਇਲਜ਼ਾਮ ਲਗਾਇਆ ਕਿ ਉਨ੍ਹਾਂ ਦੀ ਕਮੀ ਕਾਰਨ ਰੇਲ ਡਰਾਈਵਰਾਂ ਨੂੰ ਜ਼ਿਆਦਾ ਕੰਮ ਕਰਨਾ ਪੈਂਦਾ ਹੈ।