ਬਿਊਰੋ ਰਿਪੋਰਟ (17 ਦਸੰਬਰ, 2025): ਭਾਰਤੀ ਸਰਾਫ਼ਾ ਬਾਜ਼ਾਰ ਵਿੱਚ ਅੱਜ ਚਾਂਦੀ ਦੀਆਂ ਕੀਮਤਾਂ ਨੇ ਸਾਰੇ ਪੁਰਾਣੇ ਰਿਕਾਰਡ ਤੋੜ ਦਿੱਤੇ ਹਨ। ਇੰਡੀਆ ਬੁਲੀਅਨ ਐਂਡ ਜਵੈਲਰਜ਼ ਐਸੋਸੀਏਸ਼ਨ (IBJA) ਦੇ ਅੰਕੜਿਆਂ ਅਨੁਸਾਰ, ਅੱਜ ਯਾਨੀ 17 ਦਸੰਬਰ ਨੂੰ ਚਾਂਦੀ ਦੀ ਕੀਮਤ ਪਹਿਲੀ ਵਾਰ 2 ਲੱਖ ਰੁਪਏ ਪ੍ਰਤੀ ਕਿਲੋ ਦੇ ਅੰਕੜੇ ਨੂੰ ਪਾਰ ਕਰ ਗਈ ਹੈ।
ਅੱਜ ਸਵੇਰੇ ਬਾਜ਼ਾਰ ਖੁੱਲ੍ਹਦੇ ਹੀ ਇੱਕ ਕਿਲੋ ਚਾਂਦੀ ਦੀ ਕੀਮਤ 2,00,750 ਰੁਪਏ ‘ਤੇ ਪਹੁੰਚ ਗਈ। ਹਾਲਾਂਕਿ ਬਾਅਦ ਵਿੱਚ ਮਾਮੂਲੀ ਗਿਰਾਵਟ ਦੇ ਨਾਲ ਇਹ 1,99,641 ਰੁਪਏ ਪ੍ਰਤੀ ਕਿਲੋ ‘ਤੇ ਬੰਦ ਹੋਈ, ਜੋ ਕਿ ਪਿਛਲੇ ਦਿਨ ਦੀ ਕੀਮਤ (1,91,977 ਰੁਪਏ) ਨਾਲੋਂ 7,664 ਰੁਪਏ ਦਾ ਵੱਡਾ ਉਛਾਲ ਹੈ। ਮੌਜੂਦਾ ਕੀਮਤਾਂ ਦੇ ਨਾਲ ਚਾਂਦੀ ਆਪਣੇ ਹੁਣ ਤੱਕ ਦੇ ਸਭ ਤੋਂ ਉੱਚੇ ਪੱਧਰ (All-time High) ’ਤੇ ਹੈ।
9 ਮਹੀਨਿਆਂ ਵਿੱਚ ਦੁੱਗਣੀ ਹੋਈ ਕੀਮਤ
ਚਾਂਦੀ ਦੀ ਕੀਮਤ ਵਿੱਚ ਆਈ ਇਹ ਤੇਜ਼ੀ ਹੈਰਾਨੀਜਨਕ ਹੈ। ਜ਼ਿਕਰਯੋਗ ਹੈ ਕਿ 18 ਮਾਰਚ ਨੂੰ ਚਾਂਦੀ ਪਹਿਲੀ ਵਾਰ 1 ਲੱਖ ਰੁਪਏ ਦੇ ਪਾਰ ਪਹੁੰਚੀ ਸੀ। ਚਾਂਦੀ ਨੂੰ 1 ਲੱਖ ਤੋਂ 2 ਲੱਖ ਰੁਪਏ ਤੱਕ ਪਹੁੰਚਣ ਵਿੱਚ ਸਿਰਫ਼ 9 ਮਹੀਨਿਆਂ ਦਾ ਸਮਾਂ ਲੱਗਾ, ਜਦਕਿ 50 ਹਜ਼ਾਰ ਤੋਂ 1 ਲੱਖ ਰੁਪਏ ਤੱਕ ਪਹੁੰਚਣ ਵਿੱਚ ਇਸ ਨੂੰ 14 ਸਾਲ ਲੱਗੇ ਸਨ।
ਸੋਨੇ ਦੀਆਂ ਕੀਮਤਾਂ ਵਿੱਚ ਵੀ ਭਾਰੀ ਵਾਧਾ
ਸਿਰਫ਼ ਚਾਂਦੀ ਹੀ ਨਹੀਂ, ਸਗੋਂ ਸੋਨੇ ਦੀਆਂ ਕੀਮਤਾਂ ਨੇ ਵੀ ਇਸ ਸਾਲ ਅਸਮਾਨ ਨੂੰ ਛੂਹਿਆ ਹੈ।
31 ਦਸੰਬਰ 2024 ਨੂੰ 10 ਗ੍ਰਾਮ (24 ਕੈਰੇਟ) ਸੋਨੇ ਦੀ ਕੀਮਤ 76,162 ਰੁਪਏ ਸੀ, ਜੋ ਹੁਣ ਵਧ ਕੇ 1,32,317 ਰੁਪਏ ਹੋ ਗਈ ਹੈ। ਇਸ ਸਾਲ ਹੁਣ ਤੱਕ ਸੋਨੇ ਦੀ ਕੀਮਤ ਵਿੱਚ 56,155 ਰੁਪਏ ਦਾ ਵਾਧਾ ਹੋਇਆ ਹੈ।
ਇਸੇ ਦੌਰਾਨ ਚਾਂਦੀ ਦੀ ਕੀਮਤ ਵਿੱਚ ਕੁੱਲ 1,13,624 ਰੁਪਏ ਦਾ ਵਾਧਾ ਦਰਜ ਕੀਤਾ ਗਿਆ ਹੈ, ਜੋ 31 ਦਸੰਬਰ 2024 ਨੂੰ 86,017 ਰੁਪਏ ਪ੍ਰਤੀ ਕਿਲੋ ਸੀ।
