ਪੰਜਾਬੀ ਗਾਇਕ ਰਣਜੀਤ ਬਾਵਾ ਨੇ 5 ਸਾਲ ਪੁਰਾਣੇ ਗੀਤ “ਮੇਰਾ ਕੀ ਕਸੂਰ” ਨਾਲ ਜੁੜੇ ਵਿਵਾਦ ਨੂੰ ਲੈ ਕੇ ਆਲੋਚਕਾਂ ਨੂੰ ਖੁੱਲ੍ਹ ਕੇ ਜਵਾਬ ਦਿੱਤਾ ਹੈ। ਬਾਵਾ ਨੇ ਸੋਸ਼ਲ ਮੀਡੀਆ ’ਤੇ ਲਾਈਵ ਆ ਕੇ ਕਿਹਾ ਕਿ ਉਸ ਨੇ ਪੰਜ ਸਾਲ ਪਹਿਲਾਂ ਹੀ ਇਹ ਗੀਤ ਆਪਣੇ ਅਧਿਕਾਰਤ ਯੂਟਿਊਬ ਚੈਨਲ ਤੋਂ ਪੂਰੀ ਤਰ੍ਹਾਂ ਡਿਲੀਟ ਕਰ ਦਿੱਤਾ ਸੀ ਅਤੇ ਉਦੋਂ ਤੋਂ ਬਾਅਦ ਇਸ ਨੂੰ ਕਦੇ ਨਹੀਂ ਗਾਇਆ।
ਗਾਇਕ ਨੇ ਦੋਸ਼ ਲਾਇਆ ਕਿ ਕੁਝ ਲੋਕ ਟੀਆਰਪੀ ਅਤੇ ਖੋਖਲੀ ਪ੍ਰਸਿੱਧੀ ਲਈ ਇਸ ਪੁਰਾਣੇ ਮੁੱਦੇ ਨੂੰ ਜਾਣਬੁੱਝ ਕੇ ਜਿਊਂਦਾ ਰੱਖ ਰਹੇ ਹਨ ਤਾਂ ਜੋ ਉਸ ਦੇ ਸ਼ੋਅ ਰੱਦ ਕਰਵਾਏ ਜਾ ਸਕਣ। “ਜਿਹੜੇ ਲੋਕ ਮੇਰੇ ਵਿਰੁੱਧ ਪਰਚੇ ਦਰਜ ਕਰਵਾਏ ਸਨ, ਅੱਜ ਉਹੀ ਲੋਕ ਇਸ ਗੀਤ ਨੂੰ ਆਪਣੇ ਪੇਜਾਂ ’ਤੇ ਪਾ ਕੇ ਦੁਨੀਆ ਭਰ ’ਚ ਪ੍ਰਚਾਰ ਕਰ ਰਹੇ ਨੇ,” ਤੇ ਮੈਨੂੰ ਹੀ ਦੋਸ਼ੀ ਠਹਿਰਾ ਰਹੇ ਨੇ,” ਬਾਵਾ ਨੇ ਕਿਹਾ।
ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਸਾਰੇ ਧਰਮ ਉਨ੍ਹਾਂ ਨੂੰ ਬਰਾਬਰ ਪਿਆਰੇ ਹਨ ਅਤੇ ਉਹ ਕਦੇ ਵੀ ਕਿਸੇ ਧਰਮ ਦਾ ਮਜ਼ਾਕ ਨਹੀਂ ਉਡਾਉਂਦੇ। ਉਨ੍ਹਾਂ ਕਿਹਾ “ਹਿੰਦੂ ਧਰਮ ਸਾਡਾ ਹੈ, ਸਿੱਖ ਧਰਮ ਸਾਡਾ ਹੈ – ਸਾਰੇ ਧਰਮ ਸਾਂਝੇ ਹਨ। ਖੁਸ਼ ਰਹੋ, ਪਿਆਰ ਕਰੋ” ।
ਦਰਅਸਲ, 2020 ਵਿੱਚ ਰਿਲੀਜ਼ ਹੋਏ ਇਸ ਗੀਤ ਨੂੰ ਵਿਸ਼ਵ ਹਿੰਦੂ ਪ੍ਰੀਸ਼ਦ ਅਤੇ ਬਜਰੰਗ ਦਲ ਨੇ ਹਿੰਦੂ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣ ਦਾ ਦੋਸ਼ ਲਾਇਆ ਸੀ। ਜਲੰਧਰ ਵਿੱਚ ਐਡਵੋਕੇਟ ਅਸ਼ੋਕ ਸਰੀਨ ਹਿੱਕੀ ਵੱਲੋਂ ਪਰਚਾ ਦਰਜ ਕਰਵਾਇਆ ਗਿਆ ਸੀ। ਹੁਣ ਹਿਮਾਚਲ ਦੇ ਬੱਦੀ ਵਿੱਚ ਵੀ ਉਸ ਦਾ ਸ਼ੋਅ ਇਸੇ ਵਿਵਾਦ ਕਾਰਨ ਰੱਦ ਕਰ ਦਿੱਤਾ ਗਿਆ ਹੈ।
ਬਾਵਾ ਨੇ ਅਪੀਲ ਕੀਤੀ, “5 ਸਾਲ ਪੁਰਾਣਾ ਮੁੱਦਾ ਨਾ ਉਛਾਲੋ। ਤੁਸੀਂ ਹੀ ਇਸ ਨੂੰ ਵਾਰ-ਵਾਰ ਪੋਸਟ ਕਰਕੇ ਵਿਵਾਦ ਪੈਦਾ ਕਰਦੇ ਓ ਤੇ ਫਿਰ ਪੈਂਫਲੈਟ ਵੰਡਦੇ ਓ। ਬੇਲੋੜੀ ਪਰੇਸ਼ਾਨੀ ਨਾ ਪੈਦਾ ਕਰੋ।”