ਬਿਊਰੋ ਰਿਪੋਰਟ: ਕੈਨੇਡਾ ਜਿੱਥੇ ਬਹੁ-ਗੁਣਤੀ ਪੰਜਾਬੀ ਵੱਸਦੇ ਹਨ, ਵਿੱਚ ਇੱਕ ਪੰਜਾਬੀ ਕਵੀ ਉੱਤੇ ਨਸਲੀ ਹਮਲੇ ਦੀ ਘਟਨਾ ਸਾਹਮਣੇ ਆਈ ਹੈ। ਇੱਥੇ ਸਿੱਖਾਂ ਦੀ ਆਬਾਦੀ ਵਾਲੇ ਖੇਤਰ ਸਰੀ ਵਿੱਚ ਇੱਕ ਮਸ਼ਹੂਰ ਪੰਜਾਬੀ ਕਵੀ ਗੁਰਦਰਸ਼ਨ ਸਿੰਘ ਬਾਦਲ ’ਤੇ ਨਸਲੀ ਹਮਲਾ ਹੋਇਆ ਹੈ। ਘਟਨਾ ਸ਼ਾਮ ਨੂੰ ਵਾਪਰੀ ਜਦੋਂ ਗੁਰਦਰਸ਼ਨ ਸਿੰਘ ਸੈਰ ਲਈ ਨਿਊਟਨ ਐਥਲੈਟਿਕਸ ਪਾਰਕ ਪਹੁੰਚੇ ਹੋਏ ਸਨ।
ਇੱਥੇ ਥੋੜ੍ਹਾ ਥੱਕੇ ਹੋਣ ਕਰਕੇ ਉਹ ਇਕ ਕੰਧ ਉੱਤੇ ਬੈਠ ਗਏ, ਜਿੱਥੇ ਹੋਰ ਬਜ਼ੁਰਗ ਵੀ ਮੌਜੂਦ ਸਨ। ਅਚਾਨਕ 5 ਤੋਂ 6 ਨੌਜਵਾਨ ਉੱਥੇ ਆਏ ਤੇ ਕਾਲੀ ਮਿੱਟੀ ਦੇ ਗੋਲ਼ੇ ਉਨ੍ਹਾਂ ਦੇ ਚਿਹਰੇ ’ਤੇ ਸੁੱਟ ਦਿੱਤੇ। ਇਹ ਨੌਜਵਾਨ ਉਨ੍ਹਾਂ ਨੂੰ ਅੰਗਰੇਜ਼ੀ ਭਾਸ਼ਾ ਵਿੱਚ ਮੰਦੀ ਸ਼ਬਦਾਵਲੀ ਕਹਿ ਕੇ ਦੇਸ਼ ਛੱਡਣ ਵਾਸਤੇ ਕਹਿ ਰਹੇ ਸਨ।
ਇਸ ਨਸਲੀ ਹਮਲੇ ਤੋਂ ਹੈਰਾਨ ਗੁਰਦਰਸ਼ਨ ਸਿੰਘ ਬਾਦਲ ਨੇ ਮਦਦ ਗੁਹਾਰ ਲਗਾਈ। ਆਲੇ ਦੁਆਲੇ ਬੈਠੇ ਲੋਕਾਂ ਨੇ ਜਦ ਤੱਕ ਕੁਝ ਕੀਤਾ, ਤਦ ਤੱਕ ਨੌਜਵਾਨ ਉੱਥੋਂ ਭੱਜ ਚੁੱਕੇ ਸਨ। ਇਸ ਹਮਲੇ ਤੋਂ ਉਨ੍ਹਾਂ ਨੂੰ ਭਾਵੇਂ ਸੱਟ ਨਹੀਂ ਲੱਗੀ ਹੈ, ਪਰ ਮਾਨਸਿਕ ਤੌਰ ’ਤੇ ਉਨ੍ਹਾਂ ਨੂੰ ਬਹੁਤ ਵੱਡਾ ਝਟਕਾ ਲੱਗਾ ਹੈ।
ਗੁਰਦਰਸ਼ਨ ਸਿੰਘ ਨੇ ਦੱਸਿਆ ਕਿ ਇਹ ਪਹਿਲੀ ਵਾਰ ਨਹੀਂ ਕਿ ਉਨ੍ਹਾਂ ਨੂੰ ਨਸਲੀ ਹਮਲੇ ਦਾ ਸਾਹਮਣਾ ਕਰਨਾ ਪਿਆ ਹੋਵੇ। ਲਗਭਗ 25 ਸਾਲ ਪਹਿਲਾਂ ਵੀ ਉਨ੍ਹਾਂ ਨੂੰ ਕੁਝ ਗੋਰੇ ਨੌਜਵਾਨਾਂ ਵੱਲੋਂ ਹਮਲੇ ਦਾ ਸ਼ਿਕਾਰ ਹੋਣਾ ਪਿਆ ਸੀ, ਜਦੋਂ ਉਨ੍ਹਾਂ ਦੀ ਪੱਗ ‘ਤੇ ਟਿੱਪਣੀਆਂ ਕਰਕੇ ਪਟਾਕੇ ਸੁੱਟੇ ਗਏ ਸਨ ਤੇ ਉਨ੍ਹਾਂ ਦੀ ਪੱਗ ਸੜ ਗਈ ਸੀ।
