ਕੈਨੇਡਾ ਦੇ ਸ਼ਹਿਰ ਡੈਲਟਾ ਵਿੱਚ ਲੁਧਿਆਣਾ ਦੀ 30 ਸਾਲਾ ਮਨਦੀਪ ਕੌਰ ਦੇ ਕਤਲ ਮਾਮਲੇ ਵਿੱਚ ਵੱਡਾ ਖੁਲਾਸਾ ਹੋਇਆ ਹੈ। ਪੁਲਿਸ ਨੇ ਮਨਦੀਪ ਦੇ ਦਿਓਰ ਗੁਰਜੋਤ ਸਿੰਘ (ਸਿੱਧਵਾਂ ਬੇਟ, ਪਿੰਡ ਲੋਧੀਵਾਲ) ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਜਾਂਚ ਵਿੱਚ ਪਤਾ ਲੱਗਾ ਹੈ ਕਿ ਗੁਰਜੋਤ ਨੇ ਪਹਿਲਾਂ ਭਾਬੀ ਮਨਦੀਪ ਕੌਰ ਦੀ ਕਾਰ ਦਾ ਜਾਣਬੁੱਝ ਕੇ ਐਕਸੀਡੈਂਟ ਕੀਤਾ ਅਤੇ ਫਿਰ ਉਸ ਨੂੰ ਅੱਗ ਲਗਾ ਦਿੱਤੀ, ਜਿਸ ਨਾਲ ਮਨਦੀਪ ਦੀ ਜਿੰਦਾ ਸੜ ਕੇ ਮੌਤ ਹੋ ਗਈ।
26 ਅਕਤੂਬਰ 2025 ਦੀ ਰਾਤ 11:20 ਵਜੇ ਹਾਈਵੇਅ-17 ’ਤੇ ਕਾਰ ਹਾਦਸੇ ਦੀ ਸੂਚਨਾ ਮਿਲੀ ਸੀ। ਪੁਲਿਸ ਨੇ ਮੌਕੇ ’ਤੇ ਪਹੁੰਚ ਕੇ ਸੜੀ ਹੋਈ ਕਾਰ ਵਿੱਚੋਂ ਮਨਦੀਪ ਕੌਰ ਦੀ ਲਾਸ਼ ਬਰਾਮਦ ਕੀਤੀ। ਸ਼ੁਰੂ ਵਿੱਚ ਇਸ ਨੂੰ ਹਾਦਸਾ ਸਮਝਿਆ ਗਿਆ ਪਰ ਡੈਲਟਾ ਪੁਲਿਸ ਦੀ ਮੇਜਰ ਕ੍ਰਾਈਮ ਸੈਕਸ਼ਨ, ਟ੍ਰੈਫਿਕ ਯੂਨਿਟ ਅਤੇ ਕੇ-9 ਟੀਮ ਦੀ ਸਾਂਝੀ ਜਾਂਚ ਤੋਂ ਬਾਅਦ ਮਾਮਲਾ ਕਤਲ ਸਾਬਤ ਹੋਇਆ।
25 ਨਵੰਬਰ ਨੂੰ ਪੁਲਿਸ ਨੇ ਗੁਰਜੋਤ ਸਿੰਘ ਵਿਰੁੱਧ ਦੂਜੇ ਦਰਜੇ ਦਾ ਕਤਲ (ਸੈਕਸ਼ਨ 235(1)) ਅਤੇ ਮਨੁੱਖੀ ਅਵਸ਼ੇਸ਼ਾਂ ਨਾਲ ਅਣਮਨੁੱਖੀ ਵਿਵਹਾਰ (ਸੈਕਸ਼ਨ 182(b)) ਦੇ ਦੋਸ਼ ਲਗਾ ਕੇ ਅਦਾਲਤ ਵਿੱਚ ਚਾਰਜਸ਼ੀਟ ਪੇਸ਼ ਕੀਤੀ।ਮਨਦੀਪ ਕੌਰ ਦਾ ਵਿਆਹ ਇਸੇ ਸਾਲ 7 ਮਾਰਚ ਨੂੰ ਅਨਮੋਲ ਜੀਤ ਨਾਲ ਹੋਇਆ ਸੀ ਅਤੇ ਉਹ ਐਡਮਿੰਟਨ ਤੋਂ ਸਹੁਰੇ ਪਰਿਵਾਰ ਨਾਲ ਡੈਲਟਾ ਰਹਿਣ ਆਈ ਸੀ।
ਮਨਦੀਪ ਦੇ ਪਿਤਾ ਜਗਦੇਵ ਸਿੰਘ ਨੇ ਦੱਸਿਆ ਕਿ ਸਹੁਰਿਆਂ ਨੇ ਅੰਤਿਮ ਸਸਕਾਰ ਜਲਦੀ ਕਰਨ ਦੀ ਕੋਸ਼ਿਸ਼ ਕੀਤੀ ਪਰ ਉਨ੍ਹਾਂ ਦੇ ਪੁੱਤਰ ਹੈਰੀ ਨੇ ਪੁਲਿਸ ਰਿਪੋਰਟ ਦਰਜ ਕਰਵਾਈ, ਜਿਸ ਕਾਰਨ ਪੁਲਿਸ ਨੇ ਅੰਤਿਮ ਸਸਕਾਰ ਰੋਕ ਕੇ ਜਾਂਚ ਸ਼ੁਰੂ ਕੀਤੀ। ਅੰਤਿਮ ਅਰਦਾਸ 16 ਨਵੰਬਰ ਨੂੰ ਹੋਈ।ਕਤਲ ਦਾ ਮਕਸਦ ਅਜੇ ਸਪੱਸ਼ਟ ਨਹੀਂ ਹੋਇਆ ਹੈ ਪਰ ਪਰਿਵਾਰ ਨੂੰ ਉਮੀਦ ਹੈ ਕਿ ਮਨਦੀਪ ਨੂੰ ਇਨਸਾਫ਼ ਜ਼ਰੂਰ ਮਿਲੇਗਾ।
