ਸ੍ਰੀ ਗੁਰੂ ਤੇਗ ਬਹਾਦਰ ਜੀ ਦੇ 400ਵੇਂ ਪ੍ਰਕਾਸ਼ ਪੁਰਬ ਮੌਕੇ ਸ੍ਰੀਨਗਰ ਤੋਂ ਸ਼ੁਰੂ ਹੋਇਆ ਨਗਰ ਕੀਰਤਨ ਅੱਜ ਪਠਾਨਕੋਟ ਪਹੁੰਚ ਗਿਆ ਹੈ। ਇਸ ਪਵਿੱਤਰ ਨਗਰ ਕੀਰਤਨ ਦੇ ਸਤਿਕਾਰ ਵਜੋਂ ਪੰਜਾਬ ਦੇ ਸਾਰੇ ਰੂਟ ਵਾਲੇ ਇਲਾਕਿਆਂ ’ਚ ਸਖ਼ਤ ਪਵਿੱਤਰਤਾ ਯਕੀਨੀ ਬਣਾਈ ਜਾ ਰਹੀ ਹੈ ਅਤੇ ‘‘ਡਰਾਈ ਡੇ’’ ਲਾਗੂ ਕੀਤੇ ਜਾ ਰਹੇ ਹਨ।ਪਠਾਨਕੋਟ ’ਚ 20 ਨਵੰਬਰ ਦੁਪਹਿਰ 12 ਵਜੇ ਤੋਂ 21 ਨਵੰਬਰ ਦੁਪਹਿਰ 12 ਵਜੇ ਤੱਕ ਪੂਰਾ ਜ਼ਿਲ੍ਹਾ ‘‘ਡਰਾਈ ਦਿਨ’’ ਰਹੇਗਾ।
ਇਸ ਦੌਰਾਨ ਸਾਰੀਆਂ ਸ਼ਰਾਬ ਦੀਆਂ ਦੁਕਾਨਾਂ, ਮੀਟ ਦੀਆਂ ਦੁਕਾਨਾਂ, ਬੀੜੀ-ਸਿਗਰਟ ਤੇ ਤੰਬਾਕੂ ਦੀਆਂ ਦੁਕਾਨਾਂ ਬੰਦ ਰਹਿਣਗੀਆਂ। ਹੋਟਲ, ਰੈਸਟੋਰੈਂਟ, ਕਲੱਬ, ਬੀਅਰ ਬਾਰ ਤੇ ਜਨਤਕ ਥਾਵਾਂ ’ਤੇ ਵੀ ਸ਼ਰਾਬ ਵੇਚਣ ਤੇ ਪਰੋਸਣ ’ਤੇ ਸਖ਼ਤ ਪਾਬੰਦੀ ਹੋਵੇਗੀ। ਜ਼ਿਲ੍ਹਾ ਮੈਜਿਸਟ੍ਰੇਟ ਨੇ ਅਧਿਕਾਰੀਆਂ ਨੂੰ ਸਖ਼ਤੀ ਨਾਲ ਲਾਗੂ ਕਰਨ ਦੇ ਹੁਕਮ ਦਿੱਤੇ ਹਨ।
ਅੱਜ (20 ਨਵੰਬਰ) ਨਗਰ ਕੀਰਤਨ ਮਾਧੋਪੁਰ, ਸੁਜਾਨਪੁਰ, ਮਲਿਕਪੁਰ, ਟੈਂਕ ਚੌਕ, ਬੱਸ ਸਟੈਂਡ, ਲਾਈਟਨ ਚੌਕ ਤੇ ਮਿਸ਼ਨ ਚੌਕ ਵਿੱਚੋਂ ਲੰਘੇਗਾ ਤੇ ਰਾਤ ਨੂੰ ਸ੍ਰੀ ਗੁਰੂ ਹਰਕ੍ਰਿਸ਼ਨ ਪਬਲਿਕ ਸਕੂਲ, ਮਿਸ਼ਨ ਰੋਡ ’ਤੇ ਰੁਕੇਗਾ। 21 ਨੂੰ ਸਵੇਰੇ ਸਿੰਗਲ ਚੌਕ, ਚੱਕੀ ਪੁਲ, ਦਮਤਲ, ਮੀਰਥਲ ਰਾਹੀਂ ਹੁਸ਼ਿਆਰਪੁਰ ਵੱਲ ਰਵਾਨਾ ਹੋਵੇਗਾ।
22 ਨਵੰਬਰ ਨੂੰ ਸ੍ਰੀ ਆਨੰਦਪੁਰ ਸਾਹਿਬ ’ਚ ਵਿਸ਼ਾਲ ਸਮਾਗਮ ਹੋਣਗੇ। ਉੱਥੇ ਵੀ ਡਰਾਈ ਡੇ ਲਾਗੂ ਹੋਵੇਗਾ। ਸਰਬ-ਧਰਮ ਸੰਮੇਲਨ, ਸਾਰੇ ਰਾਜਾਂ ਦੇ ਮੁੱਖ ਮੰਤਰੀਆਂ ਤੇ ਰਾਸ਼ਟਰਪਤੀ ਨੂੰ ਸੱਦਾ ਦਿੱਤਾ ਗਿਆ ਹੈ। ਅੱਜ ਸ਼ਾਮ ਚਰਨ ਗੰਗਾ ਸਟੇਡੀਅਮ ’ਚ ਸ਼ਾਨਦਾਰ ਲਾਈਟ ਐਂਡ ਸਾਊਂਡ ਸ਼ੋਅ ਹੋਵੇਗਾ। ਸਾਰੇ ਪਿੰਡਾਂ ਤੋਂ ਸੰਗਤਾਂ ਬੱਸਾਂ ’ਚ ਪਹੁੰਚ ਰਹੀਆਂ ਹਨ।