ਬਿਉਰੋ ਰਿਪੋਰਟ: ਪੈਰਿਸ ਗਈ ਭਾਰਤੀ ਟੀਮ ਦੇ ਇੱਕ ਸੂਤਰ ਨੇ ਪੀਟੀਆਈ ਨੂੰ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਪਹਿਲਵਾਨ ਅੰਤਿਮ ਪੰਘਾਲ ’ਤੇ ਅਨੁਸ਼ਾਸਨਹੀਣਤਾ ਲਈ IOA ਵੱਲੋਂ ਤਿੰਨ ਸਾਲ ਦੀ ਪਾਬੰਦੀ ਲਗਾਈ ਜਾਵੇਗੀ। ਦਰਅਸਲ, ਅੰਤਿਮ ਨੇ ਪੈਰਿਸ ਓਲੰਪਿਕ ਵਿੱਚ ਔਰਤਾਂ ਦੇ 53 ਕਿਲੋਗ੍ਰਾਮ ਕੁਸ਼ਤੀ ਮੁਕਾਬਲੇ ਵਿਚ ਹਿੱਸਾ ਲਿਆ ਸੀ।
ਇਹ ਉਹੀ ਭਾਰ ਵਰਗ ਹੈ ਜਿਸ ਵਿੱਚ ਵਿਨੇਸ਼ ਪਹਿਲਾਂ ਹਿੱਸਾ ਲੈਂਦੀ ਸੀ। ਹੈਰਾਨੀ ਦੀ ਗੱਲ ਹੈ ਕਿ ਅੰਤਿਮ ਵੀ ਵਿਵਾਦਾਂ ਵਿੱਚ ਫਸ ਗਈ ਹੈ। ਨੌਜਵਾਨ ਪਹਿਲਵਾਨ ਅੰਤਿਮ ਅਤੇ ਉਸਦੀ ਭੈਣ ਨੂੰ ਪੈਰਿਸ ਤੋਂ ਦੇਸ਼ ਨਿਕਾਲੇ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਅੰਤਿਮ ਨੇ ਖੇਡ ਪਿੰਡ ਤੋਂ ਆਪਣਾ ਨਿੱਜੀ ਸਮਾਨ ਇਕੱਠਾ ਕਰਨ ਲਈ ਆਪਣੀ ਛੋਟੀ ਭੈਣ ਨੂੰ ਆਪਣਾ ਅਧਿਕਾਰਤ ਮਾਨਤਾ ਕਾਰਡ ਸੌਂਪਿਆ ਪਰ ਪੈਰਿਸ ਦੇ ਸੁਰੱਖਿਆ ਕਰਮਚਾਰੀਆਂ ਨੇ ਉਸ ਨੂੰ ਕਾਰਡ ਸਮੇਤ ਫੜ ਲਿਆ।
ਅਜਿਹੇ ’ਚ ਫਰਾਂਸ ਦੇ ਅਧਿਕਾਰੀਆਂ ਵੱਲੋਂ ਅੰਤਿਮ ’ਤੇ ਅਨੁਸ਼ਾਸਨ ਦੀ ਉਲੰਘਣਾ ਦਾ ਇਲਜ਼ਾਮ ਲੱਗਣ ਤੋਂ ਬਾਅਦ ਭਾਰਤੀ ਓਲੰਪਿਕ ਸੰਘ ਨੇ ਨੋਟਿਸ ਲਿਆ ਹੈ। ਆਖਿਰਕਾਰ ਭਾਰਤੀ ਪਹਿਲਵਾਨ, ਉਸਦੀ ਭੈਣ ਅਤੇ ਉਸਦੇ ਸਹਿਯੋਗੀ ਸਟਾਫ ਨੂੰ ਭਾਰਤ ਵਾਪਸ ਭੇਜਣ ਦਾ ਫੈਸਲਾ ਕੀਤਾ ਗਿਆ ਹੈ।
