ਬਿਉਰੋ ਰਿਪੋਰਟ: ਹੁਣ ਚੰਡੀਗੜ੍ਹ ਵਿੱਚ ਪੀਜੀਆਈ ਦੀ ਨਵੀਂ OPD ਦਾ ਕਾਰਡ ਬਣਵਾਉਣ ਲਈ ਲੰਬੀਆਂ ਲਾਈਨਾਂ ਵਿੱਚ ਖੜ੍ਹਨ ਦੀ ਲੋੜ ਨਹੀਂ ਪਵੇਗੀ। ਜਲਦ ਹੀ ਪੀਜੀਆਈ ਮੈਨੇਜਮੈਂਟ ਨਵੀਂ ਸਕੀਮ ਤਹਿਤ ਸੰਪਰਕ ਕੇਂਦਰ ਰਾਹੀਂ ਕਾਰਡ ਬਣਾਉਣ ਦੀ ਪ੍ਰਕਿਰਿਆ ਸ਼ੁਰੂ ਕਰਨ ਜਾ ਰਹੀ ਹੈ। ਇਸ ਪ੍ਰਕਿਰਿਆ ਦਾ ਉਦੇਸ਼ ਮਰੀਜ਼ਾਂ ਨੂੰ ਸਹੂਲਤ ਪ੍ਰਦਾਨ ਕਰਨਾ ਅਤੇ ਭੀੜ ਨੂੰ ਕੰਟਰੋਲ ਕਰਨਾ ਹੈ।
PGI ਦੇ ਡਿਪਟੀ ਡਾਇਰੈਕਟਰ ਪੰਕਜ ਰਾਏ ਨੇ ਦੱਸਿਆ ਕਿ ਪੀਜੀਆਈ ਨੇ ਹਾਲ ਹੀ ਵਿੱਚ HIS (ਹਸਪਤਾਲ ਸੂਚਨਾ ਪ੍ਰਣਾਲੀ) ਸੰਸਕਰਣ 2 ਨੂੰ ਅਪਗ੍ਰੇਡ ਕੀਤਾ ਹੈ, ਜੋ ਆਨਲਾਈਨ ਰਜਿਸਟ੍ਰੇਸ਼ਨ ਨੂੰ ਉਤਸ਼ਾਹਿਤ ਕਰੇਗਾ। ਇਹ ਸਹੂਲਤ ਉਨ੍ਹਾਂ ਮਰੀਜ਼ਾਂ ਲਈ ਲਾਹੇਵੰਦ ਹੋਵੇਗੀ ਜੋ ਦੂਰ-ਦੁਰਾਡੇ ਦੇ ਇਲਾਕਿਆਂ ਤੋਂ ਆਉਂਦੇ ਹਨ ਅਤੇ ਕਾਰਡ ਬਣਵਾਉਣ ਲਈ ਲੰਬੀਆਂ ਕਤਾਰਾਂ ਵਿੱਚ ਖੜ੍ਹੇ ਹੋਣ ਤੋਂ ਬਚਣਾ ਚਾਹੁੰਦੇ ਹਨ।
ਉਨ੍ਹਾਂ ਦੱਸਿਆ ਕਿ ਸੰਪਰਕ ਕੇਂਦਰ ਤੋਂ ਕਾਰਡ ਬਣਾਉਣ ਦੀ ਸਹੂਲਤ ਤਕਨੀਕੀ ਗਿਆਨ ਪੱਖੋਂ ਕਮਜ਼ੋਰ ਲੋਕਾਂ ਲਈ ਵਧੇਰੇ ਲਾਹੇਵੰਦ ਹੋਵੇਗੀ। ਇਸ ਉਪਰਾਲੇ ਨਾਲ ਨਾ ਸਿਰਫ਼ ਪੀਜੀਆਈ ਵਿੱਚ ਭੀੜ ਘਟੇਗੀ, ਸਗੋਂ ਮਰੀਜ਼ਾਂ ਦਾ ਸਮਾਂ ਵੀ ਬਚੇਗਾ।
GMSH ਸੈਕਟਰ-16 ਵਿੱਚ ਵੀ ਸਹੂਲਤ
ਦੱਸ ਦੇਈਏ ਸਾਲ 2023 ਵਿੱਚ ਸੈਕਟਰ-16 ਸਥਿਤ ਜੀਐਮਐਸਐਚ ਹਸਪਤਾਲ ਵਿੱਚ ਸੰਪਰਕ ਕੇਂਦਰ ਤੋਂ ਕਾਰਡ ਬਣਾਉਣ ਦੀ ਸਹੂਲਤ ਵੀ ਸ਼ੁਰੂ ਕੀਤੀ ਗਈ ਸੀ। ਹਾਲਾਂਕਿ ਸਿਹਤ ਨਿਰਦੇਸ਼ਕ ਡਾ: ਸੁਮਨ ਸਿੰਘ ਅਨੁਸਾਰ ਹਸਪਤਾਲ ਵਿੱਚ ਇਹ ਸਹੂਲਤ ਓਨੀ ਪ੍ਰਭਾਵੀ ਨਹੀਂ ਸੀ। ਇਸ ਦਾ ਕਾਰਨ ਇਹ ਹੈ ਕਿ ਸੰਪਰਕ ਕੇਂਦਰ ’ਤੇ ਕਾਰਡ ਬਣਾਉਣ ਲਈ 10 ਰੁਪਏ ਦੀ ਫੀਸ ਵਸੂਲੀ ਜਾਂਦੀ ਹੈ, ਜਦੋਂ ਕਿ ਹਸਪਤਾਲ ਵਿਚ ਇਹ ਸੇਵਾ ਮੁਫ਼ਤ ਹੈ।
