ਰੋਹਤਕ ਦੇ ਲਖਨਮਾਜਰਾ ਪਿੰਡ ਦੇ 16 ਸਾਲਾ ਬਾਸਕਟਬਾਲ ਖਿਡਾਰੀ ਹਾਰਦਿਕ ਦੀ 25 ਨਵੰਬਰ 2025 ਨੂੰ ਅਭਿਆਸ ਦੌਰਾਨ ਭਿਆਨਕ ਮੌਤ ਹੋ ਗਈ। ਅਭਿਆਸ ਵੇਲੇ 750 ਕਿਲੋਗ੍ਰਾਮ ਭਾਰ ਵਾਲਾ ਲੋਹੇ ਦਾ ਖੰਭਾ ਉਸ ਦੀ ਛਾਤੀ ’ਤੇ ਡਿੱਗ ਪਿਆ, ਜਿਸ ਕਾਰਨ ਮੌਕੇ ’ਤੇ ਹੀ ਮੌਤ ਹੋ ਗਈ। ਹਾਰਦਿਕ ਨੇ ਤਿੰਨ ਰਾਸ਼ਟਰੀ ਚੈਂਪੀਅਨਸ਼ਿਪਾਂ ’ਚ ਚਾਂਦੀ ਤੇ ਕਾਂਸੀ ਦੇ ਤਗ਼ਮੇ ਜਿੱਤੇ ਸਨ।
ਇਸ ਦੁਖਦਾਈ ਘਟਨਾ ਨੇ ਪੰਜਾਬ ਤੇ ਹਰਿਆਣਾ ਦੇ ਮੁੱਖ ਮੰਤਰੀਆਂ ਵਿਚਕਾਰ ਤਿੱਖੀ ਰਾਜਨੀਤਿਕ ਬਹਿਸ ਛੇੜ ਦਿੱਤੀ। ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਖ਼ੁਦ ਰੋਹਤਕ ਪਹੁੰਚੇ ਤੇ ਹਰਿਆਣਾ ਸਰਕਾਰ ਦੀ ਖੇਡ ਨੀਤੀ ’ਤੇ ਸਵਾਲ ਚੁੱਕੇ। ਮਾਨ ਨੇ ਕਿਹਾ ਕਿ “ਇਹ ਕੋਈ ਹਾਦਸਾ ਨਹੀਂ, ਸਗੋਂ ਮਨੁਲਖੀ ਲਾਪਰਵਾਹੀ ਹੈ। ਬੱਚੇ ਦੀ ਲਾਸ਼ ਸਟੇਡੀਅਮ ਤੋਂ ਘਰ ਜਾ ਰਹੀ ਹੈ। 5-10 ਲੱਖ ਰੁਪਏ ਦੇ ਕੇ ਬੱਚਾ ਵਾਪਸ ਨਹੀਂ ਆਉਂਦਾ। ਮੈਂ ਖੇਡ ਮੰਤਰੀ ਵੀ ਹਾਂ – ਕੇਂਦਰ ਨੂੰ ਲਿਖਾਂਗਾ ਕਿ ਸਾਰੇ ਸਟੇਡੀਅਮਾਂ ਦੀ ਜਾਂਚ ਹੋਵੇ। ਬੱਚਿਆਂ ਨੇ ਖ਼ੁਦ ਮੈਦਾਨ ਦੀ ਮਾੜੀ ਹਾਲਤ ਬਾਰੇ ਪੱਤਰ ਲਿਖਿਆ ਸੀ।”
ਜਵਾਬ ’ਚ ਹਰਿਆਣਾ ਦੇ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਨੇ ਤਿੱਖਾ ਪਲਟਵਾਰ ਕੀਤਾ। ਉਨ੍ਹਾਂ ਕਿਹਾ ਕਿ ਬੱਚੇ ਦੀ ਮੌਤ ਅਚਾਨਕ ਹੋਈ। ਪੰਜਾਬ ’ਚ ਨਸ਼ੇ ਨਾਲ ਨੌਜਵਾਨ ਮਰ ਰਹੇ ਨੇ, ਉੱਥੇ ਤਾਂ ਇੱਕ ਮਹੀਨੇ ’ਚ ਨਸ਼ਾ ਖ਼ਤਮ ਕਰਨ ਦਾ ਵਾਅਦਾ ਕੀਤਾ ਸੀ। ਕੇਜਰੀਵਾਲ ਨੇ ਹਰੀ ਝੰਡੀ ਦੇ ਕੇ ਰੋਹਤਕ ਆ ਗਏ। ਪਹਿਲਾਂ ਆਪਣੇ ਘਰ ਸੰਭਾਲੋ।
ਅਸਲ ’ਚ ਇਹ ਝਗੜਾ ਸਿਰਫ਼ ਖਿਡਾਰੀ ਦੀ ਮੌਤ ਤੱਕ ਸੀਮਤ ਨਹੀਂ। ਪਿੱਛੇ ਲੰਮੇ ਸਮੇਂ ਤੋਂ ਚੱਲ ਰਿਹਾ ਰਾਜਨੀਤਿਕ ਤਣਾਅ ਹੈ:
- ਸੈਣੀ ਅਕਸਰ ਪੰਜਾਬ ’ਚ ਭਾਜਪਾ ਪ੍ਰੋਗਰਾਮਾਂ ’ਚ ਜਾਂਦੇ ਨੇ ਤੇ ‘ਆਪ’ ਸਰਕਾਰ ’ਤੇ ਹਮਲੇ ਕਰਦੇ ਨੇ।
- ਭਾਖੜਾ ਪਾਣੀ ਮਾਮਲੇ ’ਚ ਮਾਨ ਨੇ ਹਰਿਆਣਾ ਦੇ ਹਿੱਸੇ ’ਚ ਕਟੌਤੀ ਕੀਤੀ ਸੀ।
- ਗੁਰੂ ਤੇਗ ਬਹਾਦਰ ਜੀ ਦੀ 350ਵੀਂ ਸ਼ਹੀਦੀ ’ਤੇ ਪ੍ਰਧਾਨ ਮੰਤਰੀ ਨੇ ਕੁਰੂਕਸ਼ੇਤਰ ’ਚ ਪ੍ਰੋਗਰਾਮ ਕੀਤਾ, ਜਦਕਿ ਮਾਨ ਚਾਹੁੰਦੇ ਸਨ ਕਿ ਆਨੰਦਪੁਰ ਸਾਹਿਬ ’ਚ ਹੋਵੇ।
ਇਸ ਤਰ੍ਹਾਂ ਇੱਕ ਨੌਜਵਾਨ ਖਿਡਾਰੀ ਦੀ ਦਰਦਨਾਕ ਮੌਤ ਰਾਜਨੀਤੀ ਦੀ ਭੇਂਟ ਚੜ੍ਹ ਗਈ। ਦੋਵੇਂ ਮੁੱਖ ਮੰਤਰੀ ਆਪਣੀਆਂ ਰਾਜਨੀਤਿਕ ਰੋਟੀਆਂ ਖਾਤਰ ਇੱਕ ਦੂਜੇ ’ਤੇ ਵਿਅੰਗ ਕੱਸ ਰਹੇ ਨੇ, ਜਦਕਿ ਪਰਿਵਾਰ ਅੱਜ ਵੀ ਆਪਣੇ ਪੁੱਤਰ ਦੇ ਸੁਪਨਿਆਂ ਦਾ ਮਾਤਮ ਮਨਾ ਰਿਹਾ ਹੈ।
