ਮੋਹਾਲੀ ਨਗਰ ਨਿਗਮ (Mohali Municipal Corporation) ਦਾ ਖੇਤਰਫਲ ਵੱਡੀ ਤਰ੍ਹਾਂ ਵਧਾ ਦਿੱਤਾ ਗਿਆ ਹੈ। ਪੰਜਾਬ ਸਰਕਾਰ ਨੇ ਨੋਟੀਫਿਕੇਸ਼ਨ ਜਾਰੀ ਕਰਕੇ 14 ਪਿੰਡਾਂ ਅਤੇ 22 ਨਵੇਂ ਸੈਕਟਰਾਂ ਨੂੰ ਨਗਰ ਨਿਗਮ ਵਿੱਚ ਸ਼ਾਮਲ ਕਰ ਦਿੱਤਾ ਹੈ। ਇਸ ਨਾਲ ਨਗਰ ਨਿਗਮ ਦੀ ਆਬਾਦੀ ਤੇ ਖੇਤਰਫਲ ਦੋਵੇਂ ਕਾਫ਼ੀ ਵਧਣਗੇ ਅਤੇ ਵਾਰਡਾਂ ਦੀ ਗਿਣਤੀ 50 ਤੋਂ ਵਧ ਕੇ ਲਗਭਗ 75 ਹੋ ਜਾਵੇਗੀ।
ਅਗਲੀਆਂ ਨਗਰ ਨਿਗਮ ਚੋਣਾਂ ਇਨ੍ਹਾਂ ਨਵੀਆਂ ਹੱਦਬੰਦੀਆਂ ਅਨੁਸਾਰ ਹੀ ਹੋਣਗੀਆਂ।ਸ਼ਾਮਲ ਕੀਤੇ ਗਏ ਮੁੱਖ ਪਿੰਡ ਹਨ: ਬਲੌਂਗੀ, ਬੱਲੋਮਾਜਰਾ, ਬਲਿਆਲੀ, ਲਾਂਡਰਾਂ, ਲਖਨੌਰ, ਚੱਪੜਚਿੜੀ ਖੁਰਦ, ਚੱਪੜਚਿੜੀ ਕਲਾਂ, ਮੌਲੀ ਬੈਦਵਾਨ, ਕੰਬਲੀ, ਰੁੜਕਾ, ਸੰਭਲਕੀ, ਚਿੱਲਾ, ਨਾਨੂਮਾਜਰਾ ਆਦਿ।
ਨਵੇਂ ਸੈਕਟਰਾਂ ਵਿੱਚ ਸੈਕਟਰ 66-A, 66-B, ਆਈ.ਟੀ. ਸਿਟੀ, ਏਅਰੋਸਿਟੀ, 80, 81, 82, 83, 85, 86, 88-89, 90-91, 93, 94, ਸੈਕਟਰ 116 (ਚੱਪੜਚਿੜੀ ਤੇ ਲਾਂਡਰਾਂ ਸਮੇਤ), ਸੈਕਟਰ 74-A, 92 ਅਲਫ਼ਾ, ਟੀ.ਡੀ.ਆਈ. ਸੈਕਟਰ 117-118, ਏ.ਟੀ.ਐਸ. ਤੇ ਲਾਂਡਰਾਂ ਗੋਲਫ ਕੋਰਸ ਵਰਗੇ ਖੇਤਰ ਸ਼ਾਮਲ ਹਨ।
20 ਨਵੰਬਰ ਨੂੰ ਸੁਣਵਾਈ ਹੋਈ ਜਿਸ ਵਿੱਚ ਕਈ ਪਿੰਡਾਂ ਨੇ ਇਤਰਾਜ਼ ਦਰਜ ਕੀਤੇ ਸਨ, ਪਰ ਜ਼ਮੀਨ ਦੀ ਨਿਰੰਤਰਤਾ ਦੇ ਸਿਧਾਂਤ ਮੁਤਾਬਕ ਸਾਰੇ ਇਤਰਾਜ਼ ਖਾਰਿਜ ਕਰ ਦਿੱਤੇ ਗਏ। ਵਧੀਕ ਮੁੱਖ ਸਕੱਤਰ ਤੇਜਵੀਰ ਸਿੰਘ ਨੇ ਅੰਤਿਮ ਆਦੇਸ਼ ਜਾਰੀ ਕੀਤੇ।ਨਿਵਾਸੀਆਂ ਨੇ ਇਸ ਫੈਸਲੇ ਦਾ ਸਵਾਗਤ ਕੀਤਾ ਹੈ। ਉਨ੍ਹਾਂ ਮੁਤਾਬਕ ਹੁਣ ਸੀਵਰੇਜ, ਸੜਕਾਂ, ਸਟਰੀਟ ਲਾਈਟਾਂ, ਕੂੜਾ ਪ੍ਰਬੰਧਨ ਵਰਗੇ ਲੰਬੇ ਸਮੇਂ ਤੋਂ ਰੁਕੇ ਪ੍ਰੋਜੈਕਟ ਤੇਜ਼ੀ ਨਾਲ ਪੂਰੇ ਹੋਣਗੇ। ਵਿਧਾਇਕ ਕੁਲਵੰਤ ਸਿੰਘ ਨੇ ਕਿਹਾ ਕਿ ਇਸ ਨਾਲ ਮੋਹਾਲੀ ਦਾ ਯੋਜਨਾਬੱਧ ਵਿਕਾਸ ਹੋਵੇਗਾ ਅਤੇ ਸ਼ਹਿਰੀ ਸਹੂਲਤਾਂ ਸ ਲਈ ਵੱਡਾ ਫਾਇਦਾ ਹੋਵੇਗਾ।ਹਾਲਾਂਕਿ, ਚੋਣਾਂ ਨੂੰ ਲੈ ਕੇ ਅਨਿਸ਼ਚਾਰਤਾ ਬਣੀ ਹੋਈ ਹੈ।
ਯੂਥ ਅਕਾਲੀ ਦਲ ਦੇ ਜ਼ਿਲ੍ਹਾ ਪ੍ਰਧਾਨ ਪਰਵਿੰਦਰ ਸਿੰਘ ਸੋਹਾਣਾ ਨੇ ਸਰਕਾਰ ਤੋਂ ਸਪੱਸ਼ਟੀਕਰਨ ਮੰਗਿਆ ਹੈ ਕਿ ਨਵੇਂ ਸ਼ਾਮਲ ਪਿੰਡਾਂ ਦੇ ਲੋਕ ਹੁਣ ਜ਼ਿਲ੍ਹਾ ਪ੍ਰੀਸ਼ਦ/ਬਲਾਕ ਚੋਣਾਂ ਲੜਨਗੇ ਜਾਂ ਸਿੱਧੇ ਨਗਰ ਨਿਗਮ ਚੋਣਾਂ ਵਿੱਚ ਹਿੱਸਾ ਲੈ ਸਕਣਗੇ। ਉਨ੍ਹਾਂ ਕਿਹਾ ਕਿ ਇੱਕੋ ਦਿਨ ਦੋ ਵੱਖਰੇ ਨੋਟੀਫਿਕੇਸ਼ਨ ਜਾਰੀ ਹੋਣ ਨਾਲ ਪਿੰਡਾਂ ਵਿੱਚ ਭੰਬਲਭੂਸਾ ਪੈਦਾ ਹੋ ਗਿਆ ਹੈ ਤੇ ਸਰਕਾਰ ਨੂੰ ਤੁਰੰਤ ਸਪੱਸ਼ਟ ਆਦੇਸ਼ ਜਾਰੀ ਕਰਨੇ ਚਾਹੀਦੇ ਹਨ।
ਕੁੱਲ ਮਿਲਾ ਕੇ, ਮੋਹਾਲੀ ਨਗਰ ਨਿਗਮ ਦਾ ਵਿਸਥਾਰ ਸ਼ਹਿਰੀ ਵਿਕਾਸ ਲਈ ਵੱਡਾ ਕਦਮ ਹੈ ਪਰ ਚੋਣ ਪ੍ਰਕਿਰਿਆ ਬਾਰੇ ਸਪੱਸ਼ਟਤਾ ਦੀ ਲੋੜ ਅਜੇ ਬਾਕੀ ਹੈ।
