ਬਿਊਰੋ ਰਿਪੋਰਟ (ਲੁਧਿਆਣਾ, 2 ਜਨਵਰੀ 2026): ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਅਤੇ ਲੁਧਿਆਣਾ ਦੇ ਸੰਸਦ ਮੈਂਬਰ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਅਤੇ ਪੰਜਾਬ ਦੇ ਸਾਬਕਾ ਕੈਬਨਿਟ ਮੰਤਰੀ ਭਾਰਤ ਭੂਸ਼ਣ ਆਸ਼ੂ ਵਿਚਾਲੇ ਸਿਆਸੀ ਜੰਗ ਤੇਜ਼ ਹੋ ਗਈ ਹੈ। ਦੋਵਾਂ ਆਗੂਆਂ ਵਿਚਾਲੇ ਵਧਦੀ ਦੂਰੀ ਕਾਰਨ ਲੁਧਿਆਣਾ ਕਾਂਗਰਸ ਹੁਣ ਦੋ ਧੜਿਆਂ ਵਿੱਚ ਵੰਡੀ ਨਜ਼ਰ ਆ ਰਹੀ ਹੈ, ਜਿਸ ਦਾ ਅਸਰ ਆਉਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ’ਤੇ ਪੈ ਸਕਦਾ ਹੈ।
ਵੜਿੰਗ ਨੇ ਆਸ਼ੂ ਨੂੰ ਦੱਸਿਆ ‘ਵਿਰੋਧੀ’
ਰਾਜਾ ਵੜਿੰਗ ਨੇ ਭਾਰਤ ਭੂਸ਼ਣ ਆਸ਼ੂ ’ਤੇ ਸਿੱਧਾ ਹਮਲਾ ਕਰਦਿਆਂ ਉਨ੍ਹਾਂ ਨੂੰ ਪਾਰਟੀ ਵਿਰੋਧੀ ਤੱਕ ਕਹਿ ਦਿੱਤਾ ਹੈ। ਦਰਅਸਲ, ਪਿਛਲੇ ਦਿਨੀਂ ਆਸ਼ੂ ਨੇ ਵੜਿੰਗ ’ਤੇ ਵਰਕਰਾਂ ਨਾਲ ਨਾ ਖੜ੍ਹਨ ਦੇ ਦੋਸ਼ ਲਾਏ ਸਨ। ਇਸ ਦੇ ਜਵਾਬ ਵਿੱਚ ਵੜਿੰਗ ਨੇ ਕਿਹਾ, “ਪ੍ਰਧਾਨ ਦੇ ਖਿਲਾਫ਼ ਬੋਲਣ ਵਾਲਾ ਵਿਰੋਧੀ ਹੀ ਹੁੰਦਾ ਹੈ। ਮੈਂ ਵਰਕਰਾਂ ਲਈ ਲੜਿਆ ਹਾਂ, ਇਸੇ ਲਈ ਅੱਜ ਇਸ ਮੁਕਾਮ ‘ਤੇ ਹਾਂ, ਜਿਹੜੇ ਨਹੀਂ ਲੜੇ ਉਨ੍ਹਾਂ ਨੂੰ ਲੋਕਾਂ ਨੇ ਘਰ ਬਿਠਾ ਦਿੱਤਾ।”
4 ਵਿਧਾਨ ਸਭਾ ਹਲਕਿਆਂ ’ਚ ਗੁੱਟਬੰਦੀ ਤੇਜ਼
ਲੁਧਿਆਣਾ ਦੇ ਚਾਰ ਪ੍ਰਮੁੱਖ ਹਲਕਿਆਂ ਵਿੱਚ ਦੋਵਾਂ ਗੁੱਟਾਂ ਦੇ ਆਗੂ ਇੱਕ-ਦੂਜੇ ਦੇ ਸਾਹਮਣੇ ਡਟ ਗਏ ਹਨ:
- ਆਤਮ ਨਗਰ (ਬੈਂਸ ਬਨਾਮ ਕੜਵਲ): ਲੋਕ ਸਭਾ ਚੋਣਾਂ ਦੌਰਾਨ ਵੜਿੰਗ ਨੇ ਸਿਮਰਜੀਤ ਸਿੰਘ ਬੈਂਸ ਨੂੰ ਕਾਂਗਰਸ ਵਿੱਚ ਸ਼ਾਮਲ ਕਰਵਾਇਆ ਅਤੇ ਉਨ੍ਹਾਂ ਨੂੰ ਇਸ ਹਲਕੇ ਤੋਂ ਤਿਆਰੀ ਕਰਨ ਲਈ ਕਿਹਾ। ਦੂਜੇ ਪਾਸੇ, ਆਸ਼ੂ ਗੁੱਟ ਦੇ ਕਮਲਜੀਤ ਸਿੰਘ ਕੜਵਲ ਨੇ ਨਵੇਂ ਸਾਲ ਦੇ ਪੋਸਟਰਾਂ ਵਿੱਚ ਖੁਦ ਨੂੰ ‘ਹਲਕਾ ਇੰਚਾਰਜ’ ਦੱਸ ਕੇ ਬੈਂਸ ਨੂੰ ਚੁਣੌਤੀ ਦਿੱਤੀ ਹੈ।
- ਲੁਧਿਆਣਾ ਦੱਖਣੀ (ਬਲਵਿੰਦਰ ਬੈਂਸ ਬਨਾਮ ਈਸ਼ਵਰ ਜੋਤ ਚੀਮਾ): ਇੱਥੇ ਆਸ਼ੂ ਗੁੱਟ ਦੇ ਈਸ਼ਵਰ ਜੋਤ ਸਿੰਘ ਚੀਮਾ ਪਹਿਲਾਂ ਹੀ ਸਰਗਰਮ ਹਨ, ਪਰ ਵੜਿੰਗ ਨੇ ਹੁਣ ਬਲਵਿੰਦਰ ਸਿੰਘ ਬੈਂਸ ਨੂੰ ਇਸ ਹਲਕੇ ਵਿੱਚ ਸਰਗਰਮ ਹੋਣ ਦੇ ਨਿਰਦੇਸ਼ ਦੇ ਦਿੱਤੇ ਹਨ।
- ਲੁਧਿਆਣਾ ਪੱਛਮੀ (ਆਸ਼ੂ ਦਾ ਗੜ੍ਹ): ਵੜਿੰਗ ਹੁਣ ਆਸ਼ੂ ਨੂੰ ਉਨ੍ਹਾਂ ਦੇ ਆਪਣੇ ਹਲਕੇ ਵਿੱਚ ਘੇਰਨ ਦੀ ਤਿਆਰੀ ਕਰ ਰਹੇ ਹਨ। ਉਨ੍ਹਾਂ ਨੇ ਸਾਬਕਾ ਜ਼ਿਲ੍ਹਾ ਪ੍ਰਧਾਨ ਪਵਨ ਦੀਵਾਨ ਨੂੰ ਇੱਥੇ ਜ਼ਿੰਮੇਵਾਰੀ ਸੌਂਪੀ ਹੈ। ਵੜਿੰਗ ਦੀ ਪਤਨੀ ਅੰਮ੍ਰਿਤਾ ਵੜਿੰਗ ਵੀ ਇੱਥੇ ਪਵਨ ਦੀਵਾਨ ਨਾਲ ਕਈ ਪ੍ਰੋਗਰਾਮਾਂ ਵਿੱਚ ਸ਼ਾਮਲ ਹੋ ਚੁੱਕੀ ਹੈ।
- ਸਾਹਨੇਵਾਲ (ਬਿਕਰਮ ਬਾਜਵਾ ਬਨਾਮ ਲੱਕੀ ਸੰਧੂ): ਹਲਕਾ ਇੰਚਾਰਜ ਬਿਕਰਮ ਸਿੰਘ ਬਾਜਵਾ (ਰਾਜਾ ਵੜਿੰਗ ਗੁੱਟ) ਵਿਰੁੱਧ ਯੂਥ ਕਾਂਗਰਸ ਆਗੂ ਲੱਕੀ ਸੰਧੂ ਨੇ ਮੋਰਚਾ ਖੋਲ੍ਹ ਦਿੱਤਾ ਹੈ। ਸੰਧੂ ਨੇ ਬਾਜਵਾ ਨੂੰ ਹਾਰ ਲਈ ਜ਼ਿੰਮੇਵਾਰ ਠਹਿਰਾਉਂਦਿਆਂ ਹਾਈਕਮਾਂਡ ਕੋਲ ਸ਼ਿਕਾਇਤ ਕਰਨ ਦੀ ਗੱਲ ਕਹੀ ਹੈ।
ਚੋਣਾਂ ’ਤੇ ਪਵੇਗਾ ਅਸਰ
ਸਿਆਸੀ ਮਾਹਿਰਾਂ ਦਾ ਮੰਨਣਾ ਹੈ ਕਿ ਜੇਕਰ ਲੁਧਿਆਣਾ ਕਾਂਗਰਸ ਦੀ ਇਹ ਅੰਦਰੂਨੀ ਲੜਾਈ ਜਲਦ ਖਤਮ ਨਾ ਹੋਈ, ਤਾਂ ਆਉਣ ਵਾਲੀਆਂ ਚੋਣਾਂ ਵਿੱਚ ਪਾਰਟੀ ਨੂੰ ਵੱਡਾ ਨੁਕਸਾਨ ਝੱਲਣਾ ਪੈ ਸਕਦਾ ਹੈ। ਕਾਂਗਰਸੀ ਵਰਕਰ ਵੀ ਇਸ ਖਿੱਚੋਤਾਣ ਕਾਰਨ ਦੁਵਿਧਾ ਵਿੱਚ ਹਨ।
