ਜਲੰਧਰ ‘ਚ ਭਈਆ ਮੰਡੀ ਚੌਕ ‘ਚ ਸਥਿਤ ਨਸ਼ਾ ਛੁਡਾਊ ਕੇਂਦਰ ‘ਚ ਦਵਾਈ ਲੈਣ ਲਈ ਲਾਈਨ ‘ਚ ਖੜ੍ਹੇ ਨੌਜਵਾਨਾਂ ਵਿਚਾਲੇ ਝਗੜਾ ਹੋ ਗਿਆ। ਇਕ ਨੌਜਵਾਨ ਨੇ ਆਪਣੇ ਸਾਥੀਆਂ ਨੂੰ ਬੁਲਾ ਕੇ ਉਨ੍ਹਾਂ ‘ਤੇ ਤਲਵਾਰਾਂ ਨਾਲ ਹਮਲਾ ਕਰ ਦਿੱਤਾ। ਜਿਸ ‘ਚ 2 ਨੌਜਵਾਨ ਗੰਭੀਰ ਜ਼ਖਮੀ ਹੋ ਗਏ।
ਜਾਣਕਾਰੀ ਅਨੁਸਾਰ ਬਾਬੂ ਲਾਭ ਸਿੰਘ ਨਗਰ ਦਾ ਰਹਿਣ ਵਾਲਾ ਸੰਨੀ ਆਪਣੇ ਭਤੀਜੇ ਨੂੰ ਨਸ਼ਾ ਛੁਡਾਊ ਕੇਂਦਰ ‘ਚ ਦਵਾਈ ਦਿਵਾਉਣ ਲਈ ਲੈ ਕੇ ਆਇਆ ਸੀ। ਉਹ ਲਾਈਨ ਵਿੱਚ ਸੀ। ਉਸੇ ਸਮੇਂ ਇਕ ਨੌਜਵਾਨ ਆਇਆ ਅਤੇ ਲਾਈਨ ਤੋੜ ਕੇ ਸਿੱਧਾ ਅੱਗੇ ਚਲਾ ਗਿਆ। ਸੰਨੀ ਨੇ ਇਤਰਾਜ਼ ਕੀਤਾ ਤਾਂ ਉਹ ਉੱਥੋਂ ਚਲਾ ਗਿਆ। ਇਸ ਤੋਂ ਬਾਅਦ ਉਹ ਆਪਣੇ ਸਾਥੀਆਂ ਨਾਲ ਮੋਟਰਸਾਈਕਲ ਦੇ ਦੋਵੇਂ ਪਾਸੇ ਫਿਲਮੀ ਸਟਾਈਲ ਵਿੱਚ ਤਲਵਾਰਾਂ ਲਟਕਾਉਂਦਾ ਹੋਇਆ ਪਹੁੰਚ ਗਿਆ।
ਉਸ ਨੇ ਆਉਂਦਿਆਂ ਹੀ ਸੰਨੀ ਦੀ ਗਰਦਨ ‘ਤੇ ਤਲਵਾਰ ਦਾ ਵਾਰ ਕਰ ਦਿੱਤਾ। ਜਦੋਂ ਸੰਨੀ ਦਾ ਭਤੀਜਾ ਉਸ ਨੂੰ ਬਚਾਉਣ ਆਇਆ ਤਾਂ ਹਮਲਾਵਰਾਂ ਨੇ ਉਸ ਦੇ ਸਿਰ ਅਤੇ ਬਾਂਹ ’ਤੇ ਵੀ ਤਲਵਾਰਾਂ ਨਾਲ ਵਾਰ ਕਰ ਦਿੱਤਾ। ਹਮਲਾਵਰਾਂ ਨੇ ਦੋਵਾਂ ਦੀ ਬੁਰੀ ਤਰ੍ਹਾਂ ਕੁੱਟਮਾਰ ਕੀਤੀ ਅਤੇ ਫਿਰ ਮੌਕੇ ਤੋਂ ਫ਼ਰਾਰ ਹੋ ਗਏ। ਉਨ੍ਹਾਂ ਦੱਸਿਆ ਕਿ ਹਮਲਾ ਕਰਨ ਵਾਲੇ ਲੜਕੇ ਦਾ ਨਾਮ ਨਸ਼ਾ ਛੁਡਾਊ ਕੇਂਦਰ ਵਿੱਚ ਦਰਜ ਹੈ।
ਤਲਵਾਰ ਦਾ ਬੱਟ ਉਸ ਦੀ ਗਰਦਨ ‘ਤੇ ਵੱਜਦੇ ਹੀ ਸੰਨੀ ਹੇਠਾਂ ਡਿੱਗ ਗਿਆ ਸੀ। ਉਥੇ ਮੌਜੂਦ ਲੋਕਾਂ ਨੇ ਉਸ ਨੂੰ ਸਿਵਲ ਹਸਪਤਾਲ ਪਹੁੰਚਾਇਆ। ਉਸ ਦੀ ਗਰਦਨ ‘ਤੇ ਡੂੰਘਾ ਜ਼ਖ਼ਮ ਹੈ ਅਤੇ 3 ਟਾਂਕੇ ਵੀ ਲੱਗੇ ਹਨ। ਡਾਕਟਰਾਂ ਦਾ ਕਹਿਣਾ ਹੈ ਕਿ ਉਸ ਦੀ ਗਰਦਨ ਦੀ ਨਾੜ ਕੱਟੇ ਜਾਣ ਤੋਂ ਬਚ ਗਈ ਹੈ। ਇਸ ਹਮਲੇ ‘ਚ ਸੰਨੀ ਦੀ ਜਾਨ ਬੱਚ ਗਈ।
