ਮੁਹਾਲੀ : ਪੰਜਾਬ ਰੋਡਵੇਜ਼/ਪਨਬਸ/PRTC ਦੇ ਮੁਲਾਜ਼ਮ (Employees of Punjab Roadways/Punbus/PRTC ) ਅੱਜ ਵੀ ਅਣਮਿੱਥੇ ਸਮੇਂ ਲਈ ਹੜਤਾਲ (indefinite strike ) ’ਤੇ ਹਨ। ਸੂਬੇ ਭਰ ਵਿੱਚ ਸਰਕਾਰੀ ਬੱਸਾਂ ਦਾ ਚੱਕਾ ਜਾਮ ਜਾਰੀ ਹੈ, ਜਿਸ ਕਾਰਨ ਲੱਖਾਂ ਮੁਸਾਫਰਾਂ ਨੂੰ ਭਾਰੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਮੁਲਾਜ਼ਮਾਂ ਦੀਆਂ ਮੁੱਖ ਮੰਗਾਂ ਵਿੱਚ ਸਰਕਾਰ ਵੱਲੋਂ ਲਿਆਂਦੀ ਜਾ ਰਹੀ ਨਵੀਂ ਕਿਲੋਮੀਟਰ ਸਕੀਮ ਦਾ ਪੂਰਨ ਵਿਰੋਧ, ਬਕਾਇਆ ਤਨਖਾਹਾਂ-ਪੈਨਸ਼ਨਾਂ ਦੀ ਅਦਾਇਗੀ, ਪੁਰਾਣੀ ਪੈਨਸ਼ਨ ਸਕੀਮ ਬਹਾਲ ਕਰਨਾ ਅਤੇ ਠੇਕੇਦਾਰੀ ਪ੍ਰਥਾ ਖਤਮ ਕਰਨਾ ਸ਼ਾਮਲ ਹਨ।
ਇਕਜੁਟਤਾ ਵਿੱਚ ਪੰਜਾਬ ਰੋਡਵੇਜ਼ ਪਨਬਸ ਕੰਟਰੈਕਟ ਵਰਕਰਜ਼ ਯੂਨੀਅਨ, PRTC ਪੱਕੇ ਮੁਲਾਜ਼ਮ ਯੂਨੀਅਨ ਅਤੇ ਪੈਨਸ਼ਨਰਜ਼ ਐਸੋਸੀਏਸ਼ਨ ਵੀ ਸ਼ਾਮਲ ਹਨ। ਯੂਨੀਅਨ ਆਗੂਆਂ ਨੇ ਸਪੱਸ਼ਟ ਕੀਤਾ ਹੈ ਕਿ ਜਦੋਂ ਤੱਕ ਸਰਕਾਰ ਲਿਖਤੀ ਰੂਪ ਵਿੱਚ ਮੰਗਾਂ ਮੰਨਣ ਦਾ ਭਰੋਸਾ ਨਹੀਂ ਦਿੰਦੀ, ਹੜਤਾਲ ਜਾਰੀ ਰਹੇਗੀ।
ਬੱਸ ਅੱਡਿਆਂ ’ਤੇ ਸਿਰਫ਼ ਨਿੱਜੀ ਬੱਸਾਂ ਅਤੇ ਕੁਝ ਆਟੋ-ਰਿਕਸ਼ੇ ਹੀ ਦਿਖਾਈ ਦੇ ਰਹੇ ਹਨ, ਜਿਸ ਕਾਰਨ ਮੁਸਾਫਰਾਂ ਨੂੰ ਦੁੱਗਣੇ-ਤਿੱਗਣੇ ਭਾੜੇ ਦੇ ਕੇ ਸਫ਼ਰ ਕਰਨਾ ਪੈ ਰਿਹਾ ਹੈ। ਵਿਦਿਆਰਥੀ, ਨੌਕਰੀਪੇਸ਼ਾ ਲੋਕ ਤੇ ਮਰੀਜ਼ ਸਭ ਤੋਂ ਜ਼ਿਆਦਾ ਪ੍ਰੇਸ਼ਾਨ ਹਨ।ਸਰਕਾਰ ਨੇ ਹੁਣ ਤੱਕ ਕੋਈ ਅਧਿਕਾਰਤ ਗੱਲਬਾਤ ਨਹੀਂ ਕੀਤੀ, ਜਿਸ ਨਾਲ ਹੜਤਾਲ ਹੋਰ ਸਖ਼ਤ ਹੋਣ ਦੇ ਆਸਾਰ ਹਨ।
