ਬਿਊਰੋ ਰਿਪੋਰਟ (ਕਾਠਮੰਡੂ, 20 ਨਵੰਬਰ 2025): ਦੋ ਮਹੀਨੇ ਪਹਿਲਾਂ ਹੋਏ ਪ੍ਰਦਰਸ਼ਨ ਤੋਂ ਬਾਅਦ, ਨੇਪਾਲ ਦੇ ਬਾਰਾ ਜ਼ਿਲ੍ਹੇ ਦੇ ਸਿਮਰਾ ਇਲਾਕੇ ਵਿੱਚ ਜੇਨ-ਜ਼ੈਡ (Gen-Z) ਨੌਜਵਾਨਾਂ ਦਾ ਗੁੱਸਾ ਇੱਕ ਵਾਰ ਫਿਰ ਭੜਕ ਉੱਠਿਆ ਹੈ। ਬੁੱਧਵਾਰ ਨੂੰ ਜੇਨ-ਜ਼ੈਡ ਨੌਜਵਾਨਾਂ ਅਤੇ ਸਾਬਕਾ ਪ੍ਰਧਾਨ ਮੰਤਰੀ ਕੇਪੀ ਸ਼ਰਮਾ ਓਲੀ ਦੀ ਪਾਰਟੀ, ਸੀਪੀਐਨ-ਯੂਐਮਐਲ (CPN-UML) ਦੇ ਵਰਕਰਾਂ ਵਿਚਕਾਰ ਝੜਪ ਹੋਈ ਸੀ। ਇਸੇ ਤਣਾਅ ਤੋਂ ਬਾਅਦ ਵੀਰਵਾਰ ਨੂੰ ਜੇਨ-ਜ਼ੈਡ ਨੌਜਵਾਨ ਮੁੜ ਸੜਕਾਂ ’ਤੇ ਉੱਤਰ ਆਏ।
ਜ਼ਿਲ੍ਹਾ ਪ੍ਰਸ਼ਾਸਨ ਨੇ ਸਥਿਤੀ ਨੂੰ ਕਾਬੂ ਹੇਠ ਕਰਨ ਲਈ ਵੀਰਵਾਰ ਨੂੰ ਦੁਪਹਿਰ 12:45 ਵਜੇ ਤੋਂ ਰਾਤ 8 ਵਜੇ ਤੱਕ ਕਰਫਿਊ ਲਗਾਉਣ ਦਾ ਹੁਕਮ ਦੇ ਦਿੱਤਾ ਹੈ।
ਪੁਲਿਸ ਨਾਲ ਝੜਪ ਅਤੇ ਅੱਥਰੂ ਗੈਸ
ਵੀਰਵਾਰ ਸਵੇਰੇ 11 ਵਜੇ ਕਈ ਨੌਜਵਾਨ ਸਿਮਰਾ ਚੌਕ ’ਤੇ ਇਕੱਠੇ ਹੋਏ। ਭੀੜ ਵਧਣ ’ਤੇ ਪੁਲਿਸ ਨੇ ਉਨ੍ਹਾਂ ਨੂੰ ਹਟਾਉਣ ਲਈ ਬਲ ਦੀ ਵਰਤੋਂ ਕੀਤੀ ਅਤੇ ਅੱਥਰੂ ਗੈਸ ਦੇ ਗੋਲੇ ਵੀ ਛੱਡੇ, ਜਿਸ ਤੋਂ ਬਾਅਦ ਸਥਿਤੀ ਹੋਰ ਤਣਾਅਪੂਰਨ ਹੋ ਗਈ ਅਤੇ ਕਰਫਿਊ ਲਗਾਉਣਾ ਪਿਆ।
ਜੇਨ-ਜ਼ੈਡ ਨੌਜਵਾਨਾਂ ਦਾ ਇਲਜ਼ਾਮ ਹੈ ਕਿ ਪੁਲਿਸ ਨੇ ਬੁੱਧਵਾਰ ਦੀ ਝੜਪ ਵਿੱਚ ਯੂਐਮਐਲ ਦੇ ਜਿਨ੍ਹਾਂ ਵਰਕਰਾਂ ਵਿਰੁੱਧ ਉਨ੍ਹਾਂ ਦੀ ਸ਼ਿਕਾਇਤ ਦਰਜ ਕੀਤੀ ਗਈ ਸੀ, ਉਨ੍ਹਾਂ ਸਾਰਿਆਂ ਨੂੰ ਗ੍ਰਿਫ਼ਤਾਰ ਨਹੀਂ ਕੀਤਾ।
ਦੋ ਯੂਐਮਐਲ ਆਗੂ ਗ੍ਰਿਫ਼ਤਾਰ
ਇਸ ਇਲਜ਼ਾਮ ਤੋਂ ਬਾਅਦ ਪੁਲਿਸ ਨੇ ਦੋ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਇਨ੍ਹਾਂ ਵਿੱਚ ਜੀਤਪੁਰਸਿਮਰਾ ਉਪ-ਮਹਾਨਗਰ ਦੇ ਵਾਰਡ 2 ਦੇ ਪ੍ਰਧਾਨ ਧਨ ਬਹਾਦੁਰ ਸ਼੍ਰੇਸ਼ਠ ਅਤੇ ਵਾਰਡ 6 ਦੇ ਪ੍ਰਧਾਨ ਕੈਮੂਦੀਨ ਅੰਸਾਰੀ ਸ਼ਾਮਲ ਹਨ। ਬੁੱਧਵਾਰ ਦੀ ਝੜਪ ਵਿੱਚ ਜੇਨ-ਜ਼ੈਡ ਦੇ 6 ਸਮਰਥਕ ਜ਼ਖਮੀ ਹੋਏ ਸਨ, ਜਿਸ ਤੋਂ ਬਾਅਦ ਉਨ੍ਹਾਂ ਨੇ ਯੂਐਮਐਲ ਦੇ 6 ਵਰਕਰਾਂ ਖ਼ਿਲਾਫ਼ ਸ਼ਿਕਾਇਤ ਦਰਜ ਕਰਵਾਈ ਸੀ।
ਜੇਨ-ਜ਼ੈਡ ਦੇ ਜ਼ਿਲ੍ਹਾ ਕਨਵੀਨਰ ਸਮਰਾਟ ਉਪਾਧਿਆਏ ਨੇ ਕਿਹਾ ਕਿ ਕੁਝ ਦੋਸ਼ੀਆਂ ਨੂੰ ਨਾ ਫੜਨ ਕਾਰਨ ਉਨ੍ਹਾਂ ਨੇ ਮੁੜ ਵਿਰੋਧ ਪ੍ਰਦਰਸ਼ਨ ਕਰਨ ਦਾ ਫੈਸਲਾ ਕੀਤਾ। ਬੁੱਧਵਾਰ ਨੂੰ ਤਣਾਅ ਇੰਨਾ ਵਧ ਗਿਆ ਸੀ ਕਿ ਸਿਮਰਾ ਏਅਰਪੋਰਟ ਨੂੰ ਆਪਣੀਆਂ ਉਡਾਣਾਂ ਵੀ ਰੋਕਣੀਆਂ ਪਈਆਂ ਸਨ।
ਝੜਪ ਦਾ ਕਾਰਨ
ਤਣਾਅ ਦੀ ਸ਼ੁਰੂਆਤ ਉਦੋਂ ਹੋਈ ਜਦੋਂ ਬੁੱਧਵਾਰ ਨੂੰ ਯੂਐਮਐਲ ਪਾਰਟੀ ਆਪਣਾ ‘ਯੂਥ ਅਵੇਕਨਿੰਗ ਕੈਂਪੇਨ’ ਕਰਨ ਦੀ ਤਿਆਰੀ ਕਰ ਰਹੀ ਸੀ। ਯੂਐਮਐਲ ਦੇ ਜਨਰਲ ਸਕੱਤਰ ਸ਼ੰਕਰ ਪੋਖਰੈਲ ਅਤੇ ਮਹੇਸ਼ ਬਸਨੇਤ ਕਾਠਮੰਡੂ ਤੋਂ ਸਿਮਰਾ ਆਉਣ ਵਾਲੇ ਸਨ ਤਾਂ ਜੋ ਸਰਕਾਰ ਵਿਰੋਧੀ ਰੈਲੀ ਨੂੰ ਸੰਬੋਧਨ ਕਰ ਸਕਣ। ਜਿਵੇਂ ਹੀ ਜੇਨ-ਜ਼ੈਡ ਨੌਜਵਾਨਾਂ ਨੂੰ ਖ਼ਬਰ ਮਿਲੀ, ਉਨ੍ਹਾਂ ਨੇ ਸੇਮਰਾ ਏਅਰਪੋਰਟ ਦਾ ਘਿਰਾਓ ਕੀਤਾ, ਜਿਸ ਕਾਰਨ ਯੂਐਮਐਲ ਵਰਕਰਾਂ ਨਾਲ ਉਨ੍ਹਾਂ ਦੀ ਝੜਪ ਹੋ ਗਈ।
ਬਾਰਾ ਜ਼ਿਲ੍ਹੇ ਦੇ ਮੁੱਖ ਚੌਕਾਂ ਅਤੇ ਸੰਵੇਦਨਸ਼ੀਲ ਇਲਾਕਿਆਂ ਵਿੱਚ ਸੁਰੱਖਿਆ ਬਲਾਂ ਦੀ ਤਾਇਨਾਤੀ ਕੀਤੀ ਗਈ ਹੈ। ਪ੍ਰਸ਼ਾਸਨ ਸਥਿਤੀ ‘ਤੇ ਲਗਾਤਾਰ ਨਜ਼ਰ ਰੱਖ ਰਿਹਾ ਹੈ।
