ਡੈਨਮਾਰਕ ਦੀ ਮਸ਼ਹੂਰ ਦਵਾਈ ਕੰਪਨੀ ਨੋਵੋ ਨੋਰਡਿਸਕ ਨੇ ਆਖ਼ਿਰਕਾਰ ਭਾਰਤ ਵਿੱਚ ਆਪਣੀ ਬਹੁਪ੍ਰਤੀਕਸ਼ਿਤ ਡਾਇਬਟੀਜ਼ ਦਵਾਈ ਓਜ਼ੈਂਪਿਕ (Ozempic) ਲਾਂਚ ਕਰ ਦਿੱਤੀ ਹੈ। ਇਹ ਦਵਾਈ ਟਾਈਪ-2 ਡਾਇਬਟੀਜ਼ ਦੇ ਮਰੀਜ਼ਾਂ ਲਈ ਹੈ ਅਤੇ ਇਸ ਨੂੰ ਹਫ਼ਤੇ ਵਿੱਚ ਸਿਰਫ਼ ਇੱਕ ਵਾਰ ਇੰਜੈਕਸ਼ਨ ਵਜੋਂ ਲੈਣਾ ਪੈਂਦਾ ਹੈ। ਕੰਪਨੀ ਨੇ ਭਾਰਤ ਵਿੱਚ ਇਸ ਨੂੰ 0.25 ਮਿਲੀਗ੍ਰਾਮ, 0.5 ਮਿਲੀਗ੍ਰਾਮ ਅਤੇ 1 ਮਿਲੀਗ੍ਰਾਮ ਡੋਜ਼ ਵਿੱਚ ਉਪਲਬਧ ਕਰਵਾਇਆ ਹੈ।ਸ਼ੁਰੂਆਤੀ ਡੋਜ਼ (0.25 ਮਿਲੀਗ੍ਰਾਮ) ਦੀ ਕੀਮਤ ਹਫ਼ਤੇ ਲਈ 2,200 ਰੁਪਏ ਰੱਖੀ ਗਈ ਹੈ।
ਮਹੀਨੇ ਦੇ ਹਿਸਾਬ ਨਾਲ ਕੀਮਤਾਂ ਇਸ ਤਰ੍ਹਾਂ ਹਨ:
- 0.25 ਮਿਲੀਗ੍ਰਾਮ ਡੋਜ਼: 8,800 ਰੁਪਏ ਪ੍ਰਤੀ ਮਹੀਨਾ
- 0.5 ਮਿਲੀਗ੍ਰਾਮ ਡੋਜ਼: 10,170 ਰੁਪਏ ਪ੍ਰਤੀ ਮਹੀਨਾ
- 1 ਮਿਲੀਗ੍ਰਾਮ ਡੋਜ਼: 11,175 ਰੁਪਏ ਪ੍ਰਤੀ ਮਹੀਨਾ
ਇਹ ਦਵਾਈ 2017 ਵਿੱਚ ਅਮਰੀਕੀ ਖੁਰਾਕ ਤੇ ਦਵਾਈ ਪ੍ਰਸ਼ਾਸਨ (FDA) ਵੱਲੋਂ ਮਨਜ਼ੂਰ ਕੀਤੀ ਗਈ ਸੀ ਅਤੇ ਤਦ ਤੋਂ ਵਿਸ਼ਵ ਪੱਧਰ ’ਤੇ ਸਭ ਤੋਂ ਵੱਧ ਵਿਕਣ ਵਾਲੀਆਂ ਦਵਾਈਆਂ ਵਿੱਚ ਸ਼ਾਮਲ ਹੋ ਗਈ। ਭਾਰਤ ਵਿੱਚ ਇਸ ਨੂੰ ਅਕਤੂਬਰ 2024 ਵਿੱਚ ਕੇਂਦਰੀ ਔਸ਼ਧ ਮਿਆਰ ਨਿਯੰਤਰਣ ਸੰਗਠਨ (CDSCO) ਵੱਲੋਂ ਟਾਈਪ-2 ਡਾਇਬਟੀਜ਼ ਦੇ ਇਲਾਜ ਲਈ ਮਨਜ਼ੂਰੀ ਮਿਲੀ ਸੀ।
ਓਜ਼ੈਂਪਿਕ ਦਾ ਮੁੱਖ ਕੰਮ ਟਾਈਪ-2 ਡਾਇਬਟੀਜ਼ ਵਾਲੇ ਮਰੀਜ਼ਾਂ ਵਿੱਚ ਖੂਨ ਵਿੱਚ ਸ਼ੂਗਰ ਦੇ ਪੱਧਰ ਨੂੰ ਕੰਟਰੋਲ ਕਰਨਾ ਹੈ। ਇਸ ਨੂੰ ਖੁਰਾਕ ਤੇ ਕਸਰਤ ਨਾਲ ਮਿਲ ਕੇ ਵਰਤਿਆ ਜਾਂਦਾ ਹੈ। ਇਸ ਤੋਂ ਇਲਾਵਾ, ਜਿਨ੍ਹਾਂ ਮਰੀਜ਼ਾਂ ਨੂੰ ਪਹਿਲਾਂ ਹੀ ਦਿਲ ਦੀ ਬਿਮਾਰੀ ਹੈ, ਉਨ੍ਹਾਂ ਵਿੱਚ ਵੱਡੀਆਂ ਦਿਲ ਸੰਬੰਧੀ ਸਮੱਸਿਆਵਾਂ ਦੇ ਖ਼ਤਰੇ ਨੂੰ ਵੀ ਘਟਾਉਂਦਾ ਹੈ।ਪਰ ਇਸ ਦੀ ਅਸਲ ਮਸ਼ਹੂਰੀ ਵਜ਼ਨ ਘਟਾਉਣ ਵਾਲੇ ਪ੍ਰਭਾਵਾਂ ਕਾਰਨ ਹੋਈ ਹੈ।
ਬਹੁਤ ਸਾਰੇ ਲੋਕ ਇਸ ਨੂੰ ਆਫ-ਲੇਬਲ (ਗ਼ੈਰ-ਅਧਿਕਾਰਤ) ਤਰੀਕੇ ਨਾਲ ਵਜ਼ਨ ਘਟਾਉਣ ਲਈ ਵਰਤ ਰਹੇ ਹਨ। ਓਜ਼ੈਂਪਿਕ ਦਾ ਸਰਗਰਮ ਤੱਤ ਸੇਮਾਗਲੂਟਾਈਡ (Semaglutide) ਹੈ, ਜੋ ਸਰੀਰ ਵਿੱਚ ਕੁਦਰਤੀ ਤੌਰ ’ਤੇ ਪਾਏ ਜਾਣ ਵਾਲੇ ਹਾਰਮੋਨ GLP-1 ਦੀ ਨਕਲ ਕਰਦਾ ਹੈ। ਇਹ ਹਾਰਮੋਨ ਖਾਣੇ ਤੋਂ ਬਾਅਦ ਆਂਤਾਂ ਤੋਂ ਨਿਕਲਦਾ ਹੈ।
ਓਜ਼ੈਂਪਿਕ ਦੇ ਮੁੱਖ ਕੰਮ:
- ਦਿਮਾਗ ਨੂੰ ਸੰਕੇਤ ਭੇਜ ਕੇ ਭੁੱਖ ਘਟਾਉਂਦਾ ਹੈ, ਜਿਸ ਨਾਲ ਘੱਟ ਭੋਜਨ ਖਾਧਾ ਜਾਂਦਾ ਹੈ।
- ਉੱਚ ਕੈਲੋਰੀ ਵਾਲੇ ਭੋਜਨਾਂ ਦੀ ਤਲਾਸ਼ ਘਟਾਉਂਦਾ ਹੈ।
- ਪਾਚਨ ਕਿਰਿਆ ਨੂੰ ਹੌਲੀ ਕਰਦਾ ਹੈ (ਗੈਸਟ੍ਰਿਕ ਐਂਪਟੀਗ), ਜਿਸ ਨਾਲ ਲੰਬੇ ਸਮੇਂ ਤੱਕ ਪੇਟ ਭਰਿਆ ਮਹਿਸੂਸ ਹੁੰਦਾ ਹੈ।
- ਖੂਨ ਵਿੱਚ ਸ਼ੂਗਰ ਵਧਣ ’ਤੇ ਅਗਨਾਸ਼ਯ ਨੂੰ ਇਨਸੁਲਿਨ ਛੱਡਣ ਲਈ ਉਤਸ਼ਾਹਿਤ ਕਰਦਾ ਹੈ।
- ਗਲੂਕਾਗਨ ਹਾਰਮੋਨ ਨੂੰ ਘਟਾ ਕੇ ਜਿਗਰ ਨੂੰ ਵਾਧੂ ਗਲੂਕੋਜ਼ ਬਣਾਉਣ ਤੋਂ ਰੋਕਦਾ ਹੈ।
ਇਸ ਤਰ੍ਹਾਂ ਓਜ਼ੈਂਪਿਕ ਨਾ ਸਿਰਫ਼ ਡਾਇਬਟੀਜ਼ ਨੂੰ ਕੰਟਰੋਲ ਕਰਦਾ ਹੈ, ਸਗੋਂ ਵਜ਼ਨ ਘਟਾਉਣ ਵਿੱਚ ਵੀ ਕਾਫ਼ੀ ਅਸਰਦਾਰ ਸਾਬਤ ਹੋ ਰਿਹਾ ਹੈ। ਭਾਰਤ ਵਿੱਚ ਇਸ ਦੇ ਲਾਂਚ ਨਾਲ ਟਾਈਪ-2 ਡਾਇਬਟੀਜ਼ ਦੇ ਮਰੀਜ਼ਾਂ ਨੂੰ ਇੱਕ ਨਵਾਂ ਤੇ ਅਸਰਦਾਰ ਵਿਕਲਪ ਮਿਲੇਗਾ, ਹਾਲਾਂਕਿ ਇਸ ਦੀ ਕੀਮਤ ਮੱਧਵਰਗੀ ਆਮਦਨ ਵਾਲੇ ਲੋਕਾਂ ਲਈ ਮਹਿੰਗੀ ਪੈ ਸਕਦੀ ਹੈ।