ਅਹਿਮਦਾਬਾਦ ਜਹਾਜ਼ ਹਾਦਸੇ ’ਚ ਪੰਜਾਬ ਦੇ ਇਸ ਪਿੰਡ ਦੀ ਨੂੰਹ ਨੇ ਵੀ ਗੁਆਈ ਜਾਨ

ਰਾਜਪੁਰਾ : ਅਹਿਮਦਾਬਾਦ ਵਿੱਚ ਹੋਏ ਜਹਾਜ਼ ਹਾਦਸੇ ਨੇ ਪੂਰੇ ਦੇਸ਼ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ। ਇਸ ਭਿਆਨਕ ਹਾਦਸੇ ਵਿੱਚ ਹੁਣ ਤੱਕ ਜਹਾਜ਼ ਵਿੱਚ ਸਵਾਰ 241 ਲੋਕਾਂ ਦੀ ਮੌਤ ਹੋ ਗਈ ਹੈ। ਇਸ ਦੇ ਨਾਲ ਹੀ, ਫਲਾਈਟ ਵਿੱਚ ਸਫ਼ਰ ਕਰਨ ਵਾਲੇ ਲੋਕਾਂ ਦੇ ਨਾਮ ਅਤੇ ਉਨ੍ਹਾਂ ਦੀਆਂ ਕਹਾਣੀਆਂ ਹੌਲੀ-ਹੌਲੀ ਸਾਹਮਣੇ ਆ ਰਹੀਆਂ ਹਨ।

ਅੱਜ ਪਟਿਆਲਾ ਦੇ ਰਾਜਪੁਰਾ ਨੇੜੇ ਉਲਾਣਾ ਪਿੰਡ ਵਿੱਚ ਸੋਗ ਦੀ ਲਹਿਰ ਹੈ। 55 ਸਾਲਾ ਅੰਜੂ ਸ਼ਰਮਾ, ਜੋ ਮੂਲ ਰੂਪ ਵਿੱਚ ਕੁਰੂਕਸ਼ੇਤਰ ਦੀ ਸੀ ਅਤੇ ਉਲਾਣਾ ਵਿੱਚ ਪਵਨ ਸ਼ਰਮਾ ਨਾਲ ਵਿਆਹੀ ਹੋਈ ਸੀ, ਅਹਿਮਦਾਬਾਦ ਜਹਾਜ਼ ਹਾਦਸੇ ਵਿੱਚ ਜਾਨ ਗੁਆ ਬੈਠੀ। ਉਹ ਆਪਣੀ ਛੋਟੀ ਧੀ ਨੂੰ ਮਿਲਣ ਤੋਂ ਬਾਅਦ ਵੱਡੀ ਧੀ ਨਾਲ ਮਿਲਣ ਲੰਡਨ ਜਾ ਰਹੀ ਸੀ, ਪਰ ਕਿਸਮਤ ਨੇ ਉਸਦੀ ਯਾਤਰਾ ਅਧੂਰੀ ਛੱਡ ਦਿੱਤੀ। ਇਹ ਹਾਦਸਾ ਉਸ ਦੀ ਖੁਸ਼ਹਾਲ ਜ਼ਿੰਦਗੀ ਨੂੰ ਅਚਾਨਕ ਖਤਮ ਕਰ ਗਿਆ।

ਅੰਜੂ ਖਾਸ ਤੌਰ ‘ਤੇ ਆਪਣੇ ਹੱਸਮੁੱਖ ਸੁਭਾਅ ਅਤੇ ਸੋਸ਼ਲ ਮੀਡੀਆ ‘ਤੇ ਜੀਵੰਤ ਰੀਲਾਂ ਲਈ ਜਾਣੀ ਜਾਂਦੀ ਸੀ। ਉਸਦੀ ਆਖਰੀ ਇੰਸਟਾਗ੍ਰਾਮ ਰੀਲ, ਜੋ “ਆਦਮੀ ਤੋ ਖਿਲੋਨਾ ਹੈ” ਗੀਤ ‘ਤੇ ਬਣੀ ਸੀ, ਹੁਣ ਉਸਦੀਆਂ ਯਾਦਾਂ ਬਣ ਗਈ ਹੈ ਅਤੇ ਪਰਿਵਾਰ-ਦੋਸਤਾਂ ਦੀਆਂ ਅੱਖਾਂ ਨੂੰ ਨਮ ਕਰ ਰਹੀ ਹੈ। ਉਡਾਣ ਤੋਂ ਪਹਿਲਾਂ ਉਸਨੇ ਪਿਤਾ ਜਗਦੀਸ਼ ਸ਼ਰਮਾ ਨਾਲ ਵੀਡੀਓ ਕਾਲ ‘ਤੇ ਗੱਲ ਕੀਤੀ, ਜੋ ਉਨ੍ਹਾਂ ਦੀ ਆਖਰੀ ਗੱਲਬਾਤ ਸਾਬਤ ਹੋਈ। ਇਸ ਦੀ ਪੁਸ਼ਟੀ ਉਲਾਣਾ ਦੇ ਪੁਲਿਸ ਮੁਲਾਜ਼ਮ ਸੁਰਜੀਤ ਕੁਮਾਰ ਨੇ ਕੀਤੀ।

ਪਿੰਡ ਵਿੱਚ ਸੋਗ ਦਾ ਮਾਹੌਲ ਹੈ, ਕਿਉਂਕਿ ਅੰਜੂ ਨਾ ਸਿਰਫ਼ ਧੀ-ਮਾਂ ਸੀ, ਸਗੋਂ ਪਰਿਵਾਰ ਨੂੰ ਜੋੜਨ ਵਾਲੀ ਕੜੀ ਸੀ। ਇਹ ਘਟਨਾ ਪਰਿਵਾਰ ਅਤੇ ਪਿੰਡ ਲਈ ਇੱਕ ਵੱਡਾ ਸਦਮਾ ਹੈ, ਜਿਸ ਨੇ ਉਨ੍ਹਾਂ ਦੀਆਂ ਖੁਸ਼ੀਆਂ ਨੂੰ ਗਹਿਰੇ ਸੋਗ ਵਿੱਚ ਬਦਲ ਦਿੱਤਾ।

ਅਹਿਮਦਾਬਾਦ ਜਹਾਜ਼ ਹਾਦਸਾ

ਦੱਸ ਦਈਏ ਕਿ 12 ਜੂਨ, ਵੀਰਵਾਰ ਨੂੰ, ਯਾਤਰੀਆਂ ਨੂੰ ਲੈ ਕੇ ਇੱਕ ਜਹਾਜ਼ ਗੁਜਰਾਤ ਦੇ ਅਹਿਮਦਾਬਾਦ ਹਵਾਈ ਅੱਡੇ ਤੋਂ 1:38 ਵਜੇ ਲੰਡਨ ਲਈ ਰਵਾਨਾ ਹੋਇਆ। ਉਡਾਣ ਭਰਨ ਤੋਂ ਬਾਅਦ, ਜਹਾਜ਼ 2 ਮਿੰਟਾਂ ਦੇ ਅੰਦਰ ਹੀ ਹਾਦਸਾਗ੍ਰਸਤ ਹੋ ਗਿਆ ਅਤੇ ਮੈਡੀਕਲ ਕਾਲਜ ਦੀ ਇਮਾਰਤ ਨਾਲ ਟਕਰਾ ਗਿਆ। ਇਹ ਜਹਾਜ਼ ਏਅਰ ਇੰਡੀਆ ਦਾ ਬੋਇੰਗ 787 ਡ੍ਰੀਮਲਾਈਨਰ ਸੀ। ਜਹਾਜ਼ ਵਿੱਚ 12 ਚਾਲਕ ਦਲ ਦੇ ਮੈਂਬਰਾਂ ਸਮੇਤ 230 ਯਾਤਰੀ ਸਵਾਰ ਸਨ। ਜਿਨ੍ਹਾਂ ਵਿੱਚੋਂ 241 ਲੋਕਾਂ ਦੀ ਮੌਤ ਹੋ ਗਈ ਹੈ। ਜਦੋਂ ਕਿ ਇੱਕ ਯਾਤਰੀ ਰਮੇਸ਼ ਵਿਸ਼ਵਾਸ ਕੁਮਾਰ ਬਚਣ ਵਿੱਚ ਕਾਮਯਾਬ ਰਿਹਾ ਹੈ। ਯਾਤਰੀਆਂ ਤੋਂ ਇਲਾਵਾ ਇਸ ਹਾਦਸੇ ਵਿੱਚ 3 ਐਮਬੀਬੀਐਸ ਵਿਦਿਆਰਥੀ ਅਤੇ ਇੱਕ ਡਾਕਟਰ ਦੀ ਵੀ ਮੌਤ ਹੋ ਗਈ।