ਬਹਿਰਾਮ ਚਹਿ, ਹੇਲਮੰਡ ਸੂਬੇ, ਅਫਗਾਨਿਸਤਾਨ ਵਿੱਚ ਸਥਿਤ ਜੋ ਕਿ ਪਾਕਿਸਤਾਨ ਦੇ ਚਗਈ ਜ਼ਿਲ੍ਹੇ ਨਾਲ ਲੱਗਦਾ ਇੱਕ ਸਰਹੱਦੀ ਕਸਬਾ ਹੈ, ਫਿਰ ਤੋਂ ਹਥਿਆਰਬੰਦ ਟਕਰਾਅ ਦਾ ਕੇਂਦਰ ਬਣ ਗਿਆ ਹੈ। 3 ਫਰਵਰੀ ਨੂੰ ਪਾਕਿਸਤਾਨੀ ਸੁਰੱਖਿਆ ਬਲਾਂ ਅਤੇ ਤਾਲਿਬਾਨ ਵਿਚਕਾਰ ਸ਼ੁਰੂ ਹੋਈਆਂ ਝੜਪਾਂ ਹੁਣ ਤੇਜ਼ ਹੋ ਗਈਆਂ ਹਨ।
ਹਾਲੀਆ ਵਿਵਾਦ ਉਦੋਂ ਸ਼ੁਰੂ ਹੋਇਆ ਜਦੋਂ ਤਾਲਿਬਾਨ ਨੇ ਆਪਣੀ ਸਰਹੱਦ ਨੂੰ ਸੁਰੱਖਿਅਤ ਕਰਨ ਲਈ ਇੱਕ ਨਵੀਂ ਚੌਕੀ ਬਣਾਉਣ ਦੀ ਕੋਸ਼ਿਸ਼ ਕੀਤੀ। ਪਾਕਿਸਤਾਨੀ ਫੌਜਾਂ ਨੇ ਇਸਨੂੰ ਸਮਝੌਤੇ ਦੀ ਉਲੰਘਣਾ ਦੱਸਿਆ ਅਤੇ ਗੋਲੀਬਾਰੀ ਸ਼ੁਰੂ ਕਰ ਦਿੱਤੀ। ਜਵਾਬ ਵਿੱਚ, ਤਾਲਿਬਾਨ ਨੇ ਇੱਕ ਪਾਕਿਸਤਾਨੀ ਚੈੱਕ ਪੋਸਟ ‘ਤੇ ਹਮਲਾ ਕਰ ਦਿੱਤਾ। ਮੋਰਟਾਰ ਗੋਲੇ ਕਾਰਨ ਚੈੱਕਪੋਸਟ ਤਬਾਹ ਹੋ ਗਈ।
ਇਸ ਵਧਦੇ ਟਕਰਾਅ ਦੇ ਕਾਰਨ, ਪਾਕਿਸਤਾਨ ਦੀ ਸ਼ਾਹਬਾਜ਼ ਸਰਕਾਰ ਨੇ ਚਗਈ ਜ਼ਿਲ੍ਹੇ ਦੇ 2.5 ਲੱਖ ਤੋਂ ਵੱਧ ਲੋਕਾਂ ਨੂੰ ਤੁਰੰਤ ਆਪਣੇ ਘਰ ਛੱਡਣ ਦਾ ਹੁਕਮ ਦਿੱਤਾ ਹੈ। ਤਾਲਿਬਾਨ ਨੇ ਆਪਣੇ ਨਾਗਰਿਕਾਂ ਨੂੰ ਇਲਾਕਾ ਖਾਲੀ ਕਰਨ ਲਈ ਵੀ ਕਿਹਾ ਹੈ। ਇਸ ਸਥਿਤੀ ਨੇ ਪਹਿਲਾਂ ਤੋਂ ਹੀ ਕੌੜੇ ਪਾਕਿ-ਅਫ਼ਗਾਨ ਸਬੰਧਾਂ ਨੂੰ ਹੋਰ ਤਣਾਅਪੂਰਨ ਬਣਾ ਦਿੱਤਾ ਹੈ।
ਬਹਿਰਾਮ ਚਹਿ ਚੈੱਕਪੋਸਟ ਡੁਰੰਡ ਲਾਈਨ ‘ਤੇ ਸਥਿਤ ਹੈ। ਇਸਨੂੰ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ, ਹਥਿਆਰਾਂ ਦੀ ਆਵਾਜਾਈ ਅਤੇ ਵਿਦਰੋਹੀ ਗਤੀਵਿਧੀਆਂ ਲਈ ਇੱਕ ਮਹੱਤਵਪੂਰਨ ਲਾਂਘਾ ਮੰਨਿਆ ਜਾਂਦਾ ਹੈ। ਇਸ ਤੋਂ ਇਲਾਵਾ ਇਹ ਚਾਗਾਈ ਅਤੇ ਹੇਲਮੰਡ ਵਿਚਕਾਰ ਫੌਜੀ ਗਤੀਵਿਧੀਆਂ ਨੂੰ ਵੀ ਕੰਟਰੋਲ ਕਰਦਾ ਹੈ। ਇਸ ਦਾ ਵਿਨਾਸ਼ ਪਾਕਿਸਤਾਨੀ ਫੌਜ ਲਈ ਸੰਕਟ ਪੈਦਾ ਕਰ ਸਕਦਾ ਹੈ।