ਬਿਉਰੋ ਰਿਪੋਰਟ: ਜੈਪੁਰ ਤੋਂ ਇੱਕ ਹੈਰਾਨ ਕਰ ਦੇਣ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਪੁਲਿਸ ਨੇ 14 ਮਹੀਨੇ ਪਹਿਲਾਂ ਜੈਪੁਰ ਤੋਂ ਅਗਵਾਹ ਹੋਏ 11 ਮਹੀਨੇ ਦੇ ਬੱਚੇ ਕੁੱਕੂ ਉਰਫ਼ ਕਾਨ੍ਹਾ ਨੂੰ ਲੱਭ ਲਿਆ। ਬੱਚਾ ਹੁਣ 2 ਸਾਲ ਦਾ ਹੋ ਗਿਆ ਹੈ। ਬੁੱਧਵਾਰ ਨੂੰ ਜਦੋਂ ਪੁਲਿਸ ਨੇ ਬੱਚੇ ਨੂੰ ਅਗਵਾਹ ਕਰਨ ਵਾਲੇ ਤੋਂ ਕਾਬੂ ਕੀਤਾ ਤਾਂ ਮਾਸੂਮ ਬੱਚਾ ਰੋਣ ਲੱਗ ਪਿਆ। ਬੱਚਾ ਅਗਵਾਹਕਾਰ ਕੋਲ ਵਾਪਸ ਜਾਣ ਲਈ ਰੋਂਦਾ ਰਿਹਾ।
ਟੀਮ ਬੱਚੇ ਨੂੰ ਉਸ ਦੀ ਮਾਂ ਕੋਲ ਲੈ ਕੇ ਗਈ ਤਾਂ ਵੀ ਉਹ ਮੁਲਜ਼ਮ ਕੋਲ ਜਾਣ ਦੀ ਜ਼ਿੱਦ ਕਰਦਾ ਰਿਹਾ। ਬੱਚੇ ਨੂੰ ਅਗਵਾਹ ਕਰਨ ਵਾਲਾ ਮੁਲਜ਼ਮ ਹੈੱਡ ਕਾਂਸਟੇਬਲ ਤੁਨਾਜ ਚਾਹਰ (ਯੂਪੀ ਪੁਲਿਸ) ਵੀ ਬੱਚੇ ਨੂੰ ਰੋਂਦਾ ਦੇਖ ਕੇ ਭਾਵੁਕ ਹੋ ਗਏ।
ਜਾਣੋ ਪੂਰਾ ਮਾਮਲਾ
ਡੀਸੀਪੀ ਦੱਖਣੀ ਦਿਗੰਤ ਆਨੰਦ ਨੇ ਦੱਸਿਆ ਕਿ ਮੁਲਜ਼ਮ ਹੈੱਡ ਕਾਂਸਟੇਬਲ ਤਨੁਜ ਚਾਹਰ ਨੇ 11 ਜੂਨ 2023 ਨੂੰ ਵਾਟਿਕਾ ਤੋਂ 11 ਮਹੀਨੇ ਦੇ ਬੱਚੇ ਨੂੰ ਅਗਵਾਹ ਕਰ ਲਿਆ ਸੀ। ਤਿੰਨ ਦਿਨ ਬਾਅਦ 14 ਜੂਨ 2023 ਨੂੰ ਬੱਚੇ ਦੇ ਮਾਪਿਆਂ ਨੇ ਥਾਣਾ ਸੰਗਾਨੇਰ ਸਦਰ ਨੂੰ ਰਿਪੋਰਟ ਦਿੱਤੀ। ਦੱਸਿਆ ਗਿਆ ਕਿ 4 ਵਿਅਕਤੀ ਉਨ੍ਹਾਂ ਦੇ ਘਰ ਆਏ ਅਤੇ ਉਨ੍ਹਾਂ ਦੇ ਨਾਲ ਔਰਤ ਦੇ ਮਾਮੇ ਦਾ ਜਾਣਕਾਰ ਤਨੁਜ ਚਾਹਰ ਵੀ ਸੀ।
ਜਿਵੇਂ ਹੀ ਮੁਲਜਮ ਘਰ ਅੰਦਰ ਦਾਖ਼ਲ ਹੋਇਆ, ਉਸ ਨੇ ਔਰਤ ਦੀ ਕੁੱਟਮਾਰ ਕਰਨੀ ਸ਼ੁਰੂ ਕਰ ਦਿੱਤੀ। ਭੱਜਣ ਲਈ ਪੀੜਤਾ ਨੇੜੇ ਹੀ ਆਪਣੇ ਭਰਾ ਦੇ ਘਰ ਗਈ। ਜਦੋਂ ਉਹ ਆਪਣੇ ਭਰਾ ਨਾਲ ਪਹੁੰਚੀ ਤਾਂ ਤਨੁਜ ਬੱਚੇ ਨੂੰ ਲੈ ਕੇ ਭੱਜ ਗਿਆ। ਮੁਲਜ਼ਮ ਨੇ ਦਾਅਵਾ ਕੀਤਾ ਕਿ ਇਹ ਬੱਚਾ ਉਸ ਦਾ ਹੈ। ਉਸ ਦੇ ਨਾਲ ਰਹੇਗਾ। ਉਹ ਔਰਤ ਨੂੰ ਵੀ ਆਪਣੇ ਨਾਲ ਲਿਜਾਣਾ ਚਾਹੁੰਦਾ ਸੀ।
ਅਲੀਗੜ੍ਹ, ਯੂਪੀ ਤੋਂ ਕੀਤਾ ਗਿਆ ਗ੍ਰਿਫਤਾਰ
ਇਸ ਮਾਮਲੇ ’ਚ ਪੁਲਿਸ ਨੇ ਬੁੱਧਵਾਰ ਨੂੰ ਮੁਲਜ਼ਮ ਤਨੁਜ ਨੂੰ ਯੂਪੀ ਦੇ ਗੋਂਡਾ (ਅਲੀਗੜ੍ਹ) ਤੋਂ ਗ੍ਰਿਫ਼ਤਾਰ ਕੀਤਾ ਹੈ। ਦਰਅਸਲ, ਕੁਝ ਦਿਨ ਪਹਿਲਾਂ ਪੁਲਿਸ ਨੂੰ ਸੂਹ ਮਿਲੀ ਸੀ ਕਿ ਮੁਲਜ਼ਮ ਮਥੁਰਾ ਦੇ ਗੋਵਰਧਨ ਪਰਿਕਰਮਾ ਮਾਰਗ ’ਤੇ ਇੱਕ ਝੌਂਪੜੀ ਵਿੱਚ ਇੱਕ ਮਾਸੂਮ ਬੱਚੇ ਨਾਲ ਰਹਿ ਰਿਹਾ ਹੈ, ਇਸ ਤੋਂ ਬਾਅਦ ਜੈਪੁਰ ਤੋਂ ਪੁਲਿਸ ਦੀ ਇੱਕ ਵਿਸ਼ੇਸ਼ ਟੀਮ 22 ਅਗਸਤ ਨੂੰ ਮਥੁਰਾ ਪਹੁੰਚੀ। ਇੱਥੇ ਮੁਲਜ਼ਮ ਤਨੁਜ ਦੀ ਦੋ-ਤਿੰਨ ਦਿਨਾਂ ਤੱਕ ਵੱਖ-ਵੱਖ ਥਾਵਾਂ ’ਤੇ ਤਲਾਸ਼ੀ ਲਈ ਗਈ। ਟੀਮ ਨੂੰ ਸੂਚਨਾ ਮਿਲੀ ਕਿ 27 ਅਗਸਤ ਨੂੰ ਮੁਲਜ਼ਮ ਗੌਂਡਾ, ਅਲੀਗੜ੍ਹ ਗਿਆ ਸੀ। ਪੁਲਿਸ ਟੀਮ ਨੇ ਉਸ ਨੂੰ ਉਥੋਂ ਗ੍ਰਿਫਤਾਰ ਕਰ ਲਿਆ। ਬੱਚਾ ਵੀ ਉਸ ਦੇ ਨਾਲ ਸੀ।
ਇੱਕ ਸਾਧੂ ਦੇ ਰੂਪ ਵਿੱਚ ਭੇਸ
ਪੁੱਛਗਿੱਛ ਦੌਰਾਨ ਸਾਹਮਣੇ ਆਇਆ ਕਿ ਉਹ ਔਰਤ ਦੇ ਲੜਕੇ ਨੂੰ ਆਪਣਾ ਪੁੱਤਰ ਸਮਝਦਾ ਸੀ। ਬੱਚੇ ਨੂੰ ਅਗਵਾ ਕਰਨ ਲਈ ਮੁਲਜ਼ਮਾਂ ਨੇ ਜੈਪੁਰ ਵਿੱਚ ਭਿਖਾਰੀ ਵਜੋਂ 9 ਮਹੀਨੇ ਤੱਕ ਰੇਕੀ ਵੀ ਕੀਤੀ ਸੀ। ਉਹ ਪੁਲਿਸ ਦੇ ਤਰੀਕਿਆਂ ਤੋਂ ਜਾਣੂ ਸੀ। ਇਸ ਕਾਰਨ ਉਹ ਇੰਨੇ ਸਮੇਂ ਤੱਕ ਪੁਲਿਸ ਤੋਂ ਬਚਦਾ ਰਿਹਾ। ਡੀਸੀਪੀ ਨੇ ਦੱਸਿਆ ਕਿ ਮੁਲਜ਼ਮ ਆਪਣੀ ਪਛਾਣ ਛੁਪਾ ਕੇ ਸੰਤ ਵਜੋਂ ਰਹਿ ਰਿਹਾ ਸੀ। ਮੁਲਜ਼ਮ ਆਪਣੇ ਕੋਲ ਸਿਰਫ਼ ਇੱਕ ਕੀਪੈਡ ਫ਼ੋਨ ਰੱਖਦਾ ਸੀ। ਜਦੋਂ ਵੀ ਉਸ ਨੂੰ ਕਿਸੇ ਨਾਲ ਗੱਲ ਕਰਨ ਦੀ ਲੋੜ ਹੁੰਦੀ, ਉਹ ਫ਼ੋਨ ਚਾਲੂ ਕਰ ਦਿੰਦਾ।
ਮੁਲਜ਼ਮ ਤਨੁਜ ਚਾਹਰ ਨੂੰ ਵੀਰਵਾਰ ਨੂੰ ਅਦਾਲਤ ਨੇ ਜੇਲ੍ਹ ਭੇਜ ਦਿੱਤਾ ਹੈ। ਇਸ ਤੋਂ ਪਹਿਲਾਂ ਬੁੱਧਵਾਰ ਨੂੰ ਜਦੋਂ ਪੁਲਿਸ ਮੁਲਜ਼ਮ ਨੂੰ ਜੈਪੁਰ ਲੈ ਗਈ। ਇਸ ਤੋਂ ਬਾਅਦ ਜਦੋਂ ਬੱਚੇ ਨੂੰ ਮਾਂ ਦੇ ਹਵਾਲੇ ਕੀਤਾ ਗਿਆ ਤਾਂ ਮਾਸੂਮ ਬੱਚਾ ਅਗਵਾਕਾਰ ਕੋਲ ਰਹਿਣ ਦੀ ਜ਼ਿੱਦ ਕਰਨ ਲੱਗਾ। ਉਹ ਮੁਲਜ਼ਮਾਂ ਨਾਲ ਚਿੰਬੜ ਕੇ ਰੋਣ ਲੱਗ ਪਿਆ।
