ਨਵੀਂ ਦਿੱਲੀ ਦੇ ਆਲ ਇੰਡੀਆ ਇੰਸਟੀਚਿਊਟ ਆਫ਼ ਮੈਡੀਕਲ ਸਾਇੰਸਜ਼ (ਏਮਜ਼) ਵਿੱਚ ਕੀਤੇ ਗਏ ਇੱਕ ਸਾਲ ਦੇ ਪੋਸਟਮਾਰਟਮ-ਅਧਾਰਤ ਅਧਿਐਨ ਨੇ ਸਪੱਸ਼ਟ ਕੀਤਾ ਹੈ ਕਿ ਕੋਵਿਡ-19 ਟੀਕਾਕਰਨ ਅਤੇ ਨੌਜਵਾਨਾਂ ਵਿੱਚ ਅਚਾਨਕ ਮੌਤਾਂ ਵਿਚਕਾਰ ਕੋਈ ਸਬੰਧ ਨਹੀਂ ਹੈ। ਇਹ ਅਧਿਐਨ ਕੋਵਿਡ ਟੀਕਿਆਂ ਦੀ ਸੁਰੱਖਿਆ ਅਤੇ ਪ੍ਰਭਾਵਸ਼ੀਲਤਾ ਦੀ ਪੁਸ਼ਟੀ ਕਰਦਾ ਹੈ ਅਤੇ ਵਿਸ਼ਵਵਿਆਪੀ ਵਿਗਿਆਨਕ ਸਬੂਤਾਂ ਨਾਲ ਮੇਲ ਖਾਂਦਾ ਹੈ।
ਅਧਿਐਨ ਦਾ ਸਿਰਲੇਖ “ਨੌਜਵਾਨ ਬਾਲਗਾਂ ਵਿੱਚ ਅਚਾਨਕ ਮੌਤ ਦਾ ਬੋਝ: ਭਾਰਤ ਵਿੱਚ ਇੱਕ ਤੀਜੇ ਦਰਜੇ ਦੇ ਦੇਖਭਾਲ ਕੇਂਦਰ ਵਿੱਚ ਇੱਕ ਸਾਲ ਦਾ ਨਿਰੀਖਣ ਅਧਿਐਨ” ਹੈ, ਜੋ ਇੰਡੀਅਨ ਕੌਂਸਲ ਆਫ਼ ਮੈਡੀਕਲ ਰਿਸਰਚ (ICMR) ਦੇ ਪ੍ਰਮੁੱਖ ਜਰਨਲ ਇੰਡੀਅਨ ਜਰਨਲ ਆਫ਼ ਮੈਡੀਕਲ ਰਿਸਰਚ (IJMR) ਵਿੱਚ ਪ੍ਰਕਾਸ਼ਿਤ ਹੋਇਆ ਹੈ। ਇਹ ਖੋਜ ਮਈ 2023 ਤੋਂ ਅਪ੍ਰੈਲ 2024 ਤੱਕ ਏਮਜ਼ ਦੇ ਪੈਥਾਲੋਜੀ ਅਤੇ ਫੋਰੈਂਸਿਕ ਮੈਡੀਸਨ ਵਿਭਾਗਾਂ ਵਿੱਚ ਕੀਤੀ ਗਈ।
ਬਹੁ-ਅਨੁਸ਼ਾਸਨੀ ਮਾਹਿਰਾਂ ਦੀ ਟੀਮ ਨੇ ਵਰਬਲ ਆਟੌਪਸੀ, ਪੋਸਟਮਾਰਟਮ ਇਮੇਜਿੰਗ, ਰਵਾਇਤੀ ਪੋਸਟਮਾਰਟਮ ਅਤੇ ਹਿਸਟੋਪੈਥੋਲੋਜੀਕਲ ਜਾਂਚ ਰਾਹੀਂ 18 ਤੋਂ 45 ਸਾਲ ਦੀ ਉਮਰ ਦੇ ਬਾਲਗਾਂ ਵਿੱਚ ਅਚਾਨਕ ਮੌਤਾਂ ਦੇ ਮਾਮਲਿਆਂ ਦਾ ਵਿਸਤ੍ਰਿਤ ਮੁਲਾਂਕਣ ਕੀਤਾ। ਟ੍ਰਾਮਾ, ਸੂਸਾਈਡ, ਹੋਮੀਸਾਈਡ ਅਤੇ ਡਰੱਗ ਅਬਿਊਜ਼ ਨਾਲ ਜੁੜੇ ਮਾਮਲੇ ਨੂੰ ਬਾਹਰ ਰੱਖਿਆ ਗਿਆ। ਅਧਿਐਨ ਵਿੱਚ ਕੋਵਿਡ-19 ਲਾਗ ਅਤੇ ਟੀਕਾਕਰਨ ਸਥਿਤੀ ਵਿਚਕਾਰ ਕੋਈ ਅੰਕੜਾਤਮਕ ਤੌਰ ‘ਤੇ ਮਹੱਤਵਪੂਰਨ ਸਬੰਧ ਨਹੀਂ ਮਿਲਿਆ।
ਨੌਜਵਾਨਾਂ ਵਿੱਚ ਅਚਾਨਕ ਮੌਤਾਂ ਦੇ ਸਭ ਤੋਂ ਆਮ ਕਾਰਨ ਦਿਲ ਨਾਲ ਸਬੰਧਤ ਸਨ (ਲਗਭਗ 60-66%), ਜਿਸ ਵਿੱਚ ਕੋਰੋਨਰੀ ਆਰਟਰੀ ਬਿਮਾਰੀ ਪ੍ਰਮੁੱਖ ਸੀ। ਇਸ ਤੋਂ ਬਾਅਦ ਸਾਹ ਨਾਲ ਜੁੜੇ ਕਾਰਨ (20%) ਅਤੇ ਹੋਰ ਗੈਰ-ਕਾਰਡੀਓਵੈਸਕੁਲਰ ਸਥਿਤੀਆਂ ਸਨ। ਨੌਜਵਾਨਾਂ ਵਿੱਚ ਅਚਾਨਕ ਮੌਤ ਇੱਕ ਗੰਭੀਰ ਚਿੰਤਾ ਹੈ, ਜਿਸ ਲਈ ਸ਼ੁਰੂਆਤੀ ਜਾਂਚ, ਜੀਵਨ ਸ਼ੈਲੀ ਵਿੱਚ ਬਦਲਾਅ ਅਤੇ ਨਿਸ਼ਾਨਾਬੱਧ ਜਨਤਕ ਸਿਹਤ ਰਣਨੀਤੀਆਂ ਦੀ ਲੋੜ ਹੈ।
ਏਮਜ਼ ਦੇ ਪ੍ਰੋਫੈਸਰ ਡਾ. ਸੁਧੀਰ ਅਰਾਵਾ ਨੇ ਕਿਹਾ ਕਿ ਇਹ ਅਧਿਐਨ ਗੁੰਮਰਾਹਕੁੰਨ ਦਾਅਵਿਆਂ ਅਤੇ ਅਪ੍ਰਮਾਣਿਤ ਰਿਪੋਰਟਾਂ ਦੇ ਮੱਦੇਨਜ਼ਰ ਖਾਸ ਮਹੱਤਵ ਰੱਖਦਾ ਹੈ, ਜੋ ਟੀਕਾਕਰਨ ਅਤੇ ਅਚਾਨਕ ਮੌਤਾਂ ਨੂੰ ਜੋੜਦੀਆਂ ਹਨ। ਉਨ੍ਹਾਂ ਜ਼ੋਰ ਦਿੱਤਾ ਕਿ ਜਨਤਕ ਚਰਚਾ ਵਿਗਿਆਨਕ ਸਬੂਤਾਂ ‘ਤੇ ਅਧਾਰਤ ਹੋਣੀ ਚਾਹੀਦੀ ਹੈ, ਨਾ ਕਿ ਅਫਵਾਹਾਂ ‘ਤੇ। ਸਿਹਤ ਮਾਹਿਰਾਂ ਨੇ ਦੁਹਰਾਇਆ ਕਿ ਅਜਿਹੀਆਂ ਮੌਤਾਂ ਅਕਸਰ ਅੰਤਰੀਵ ਦਿਲ ਦੀਆਂ ਬਿਮਾਰੀਆਂ ਨਾਲ ਜੁੜੀਆਂ ਹੁੰਦੀਆਂ ਹਨ ਅਤੇ ਟੀਕਿਆਂ ਨਾਲ ਇਸ ਦਾ ਕੋਈ ਸਬੰਧ ਨਹੀਂ।
