ਯੂਟਿਊਬ ਨੇ ਆਪਣੀ ਮੁਦਰੀਕਰਨ ਨੀਤੀ ਵਿੱਚ ਵੱਡਾ ਬਦਲਾਅ ਕਰਨ ਦਾ ਐਲਾਨ ਕੀਤਾ ਹੈ, ਜੋ 15 ਜੁਲਾਈ, 2025 ਤੋਂ ਲਾਗੂ ਹੋਵੇਗਾ। ਇਸ ਨਵੀਂ ਨੀਤੀ ਦਾ ਮੁੱਖ ਮਕਸਦ ਗੈਰ-ਮੂਲ, ਦੁਹਰਾਉਣ ਵਾਲੀ ਜਾਂ ਘੱਟ ਮਿਹਨਤ ਨਾਲ ਬਣਾਈ ਸਮੱਗਰੀ ‘ਤੇ ਸਖ਼ਤੀ ਕਰਨਾ ਹੈ, ਜਿਸਦਾ ਸਭ ਤੋਂ ਵੱਡਾ ਅਸਰ ਨਵੇਂ ਸਮੱਗਰੀ ਸਿਰਜਣਹਾਰਾਂ ‘ਤੇ ਪਵੇਗਾ। ਯੂਟਿਊਬ ਪਾਰਟਨਰ ਪ੍ਰੋਗਰਾਮ (YPP) ਅਧੀਨ, ਪਲੇਟਫਾਰਮ ਹੁਣ ਅਜਿਹੇ ਵੀਡੀਓਜ਼ ਦੀ ਸਖ਼ਤ ਜਾਂਚ ਕਰੇਗਾ, ਜੋ ਇੱਕੋ ਜਿਹੇ, ਥੋਕ ਵਿੱਚ ਬਣਾਏ ਗਏ ਜਾਂ ਕਾਪੀ-ਪੇਸਟ ਕੀਤੇ ਹੋਣ।
ਯੂਟਿਊਬ ਨੇ ਸਮੱਗਰੀ ਸਿਰਜਣਹਾਰਾਂ ਨੂੰ ਨੋਟਿਸ ਜਾਰੀ ਕਰਕੇ ਸਪੱਸ਼ਟ ਕੀਤਾ ਹੈ ਕਿ ਅਸਲੀ ਅਤੇ ਪ੍ਰਮਾਣਿਕ ਸਮੱਗਰੀ ਹੀ ਪਲੇਟਫਾਰਮ ਦੀ ਗੁਣਵੱਤਾ ਅਤੇ ਦਰਸ਼ਕਾਂ ਦੇ ਅਨੁਭਵ ਨੂੰ ਬਿਹਤਰ ਬਣਾਉਂਦੀ ਹੈ।ਨਵੀਂ ਨੀਤੀ ਅਨੁਸਾਰ, ਸਿਰਜਣਹਾਰ ਜੋ ਕਿਸੇ ਹੋਰ ਦੀ ਸਮੱਗਰੀ ਨੂੰ ਮਾਮੂਲੀ ਬਦਲਾਅ ਨਾਲ ਅਪਲੋਡ ਕਰਦੇ ਹਨ, ਜਾਂ ਘੱਟ ਮਿਹਨਤ ਨਾਲ ਵੀਡੀਓ ਬਣਾਉਂਦੇ ਹਨ, ਜਿਵੇਂ ਕਿ ਕਲਿੱਕਬੇਟ ਥੰਬਨੇਲ ਵਰਤਣ ਵਾਲੇ ਜਾਂ AI ਦੀ ਮਦਦ ਨਾਲ ਬਣਾਏ ਵੀਡੀਓ, ਜੋ ਮਨੁੱਖੀ ਛੋਹ ਤੋਂ ਰਹਿਤ ਹਨ, ਉਨ੍ਹਾਂ ਦੇ ਮੁਦਰੀਕਰਨ ਦੀ ਸੰਭਾਵਨਾ ਘੱਟ ਜਾਵੇਗੀ।
ਅਜਿਹੀ ਸਮੱਗਰੀ, ਜੋ ਵਾਰ-ਵਾਰ ਇੱਕੋ ਜਿਹੇ ਟੈਂਪਲੇਟ, ਰੋਬੋਟਿਕ ਆਵਾਜ਼ਾਂ ਜਾਂ ਜਾਣਕਾਰੀ ਅਤੇ ਮਨੋਰੰਜਨ ਦੀ ਘਾਟ ਵਾਲੀ ਹੋਵੇ, ਦੀ ਪਛਾਣ ਕਰਕੇ ਉਸ ਦਾ ਮੁਦਰੀਕਰਨ ਬੰਦ ਕੀਤਾ ਜਾਵੇਗਾ। ਯੂਟਿਊਬ ਦਾ ਕਹਿਣਾ ਹੈ ਕਿ ਪਲੇਟਫਾਰਮ ਸ਼ੁਰੂ ਤੋਂ ਹੀ ਅਸਲੀ ਅਤੇ ਰਚਨਾਤਮਕ ਸਮੱਗਰੀ ਦੀ ਉਮੀਦ ਕਰਦਾ ਹੈ। ਮੁਦਰੀਕਰਨ ਲਈ, 1000 ਸਬਸਕ੍ਰਾਈਬਰ, 4000 ਘੰਟੇ ਦੇਖਣ ਦਾ ਸਮਾਂ ਜਾਂ 10 ਮਿਲੀਅਨ ਸ਼ਾਰਟਸ ਵਿਊਜ਼ ਦੇ ਨਾਲ ਗੁਣਵੱਤਾ ਵਾਲੀ ਸਮੱਗਰੀ ਜ਼ਰੂਰੀ ਹੋਵੇਗੀ। ਜੇਕਰ ਸਿਰਜਣਹਾਰ ਸਿਰਫ਼ ਕਾਪੀ-ਰਾਈਟਿੰਗ ਜਾਂ ਹਲਕੀ ਐਡੀਟਿੰਗ ਨਾਲ ਵੀਡੀਓ ਅਪਲੋਡ ਕਰਦੇ ਹਨ, ਤਾਂ ਉਨ੍ਹਾਂ ਦੇ ਚੈਨਲਾਂ ਨੂੰ ਮੁਦਰੀਕਰਨ ਸੇਵਾ ਨਹੀਂ ਮਿਲੇਗੀ।
ਕੰਪਨੀ ਨੇ ਸਪੱਸ਼ਟ ਕੀਤਾ ਕਿ ਵਾਰ-ਵਾਰ ਸਮੱਗਰੀ ਨਿਯਮਾਂ ਦੀ ਸਿੱਧੀ ਉਲੰਘਣਾ ਨਹੀਂ ਹੈ, ਪਰ ਇਹ ਪਲੇਟਫਾਰਮ ਦੀ ਗੁਣਵੱਤਾ ਅਤੇ ਦਰਸ਼ਕਾਂ ਦੇ ਅਨੁਭਵ ਨੂੰ ਨੁਕਸਾਨ ਪਹੁੰਚਾਉਂਦੀ ਹੈ। ਅਸਲੀ ਅਤੇ ਪ੍ਰਮਾਣਿਕ ਸਮੱਗਰੀ ਅਪਲੋਡ ਕਰਨ ਵਾਲੇ ਸਿਰਜਣਹਾਰਾਂ ਨੂੰ ਇਸ ਨੀਤੀ ਤੋਂ ਚਿੰਤਾ ਕਰਨ ਦੀ ਜ਼ਰੂਰਤ ਨਹੀਂ। ਇਹ ਬਦਲਾਅ ਸਿਰਜਣਹਾਰਾਂ ਨੂੰ ਸਖ਼ਤ ਮਿਹਨਤ ਅਤੇ ਮੌਲਿਕਤਾ ‘ਤੇ ਜ਼ੋਰ ਦੇਣ ਲਈ ਪ੍ਰੇਰਿਤ ਕਰੇਗਾ, ਜਦਕਿ ਦਰਸ਼ਕਾਂ ਨੂੰ ਵਧੀਆ ਸਮੱਗਰੀ ਮਿਲੇਗੀ।
