ਹਿਸਾਰ : ਹਰਿਆਣਾ ਦੇ ਹਿਸਾਰ ਜ਼ਿਲ੍ਹੇ ਦੇ ਅਗਰੋਹਾ ਇਲਾਕੇ ਦੇ ਕਨੌਹ ਪਿੰਡ ‘ਚ ਮੰਗਲਵਾਰ ਨੂੰ ਬਾਈਕ ‘ਤੇ ਜਾ ਰਹੇ ਪਤੀ-ਪਤਨੀ ਨੂੰ ਚਾਰ ਲੋਕਾਂ ਨੇ ਕੁਹਾੜੀ ਨਾਲ ਵੱਢ ਕੇ ਕਤਲ ਕਰ ਦਿੱਤਾ। ਦੋਹਰੇ ਕਤਲ ਦੀ ਸੂਚਨਾ ਮਿਲਦੇ ਹੀ ਹਿਸਾਰ ਪੁਲਿਸ ਦੇ ਉੱਚ ਅਧਿਕਾਰੀ ਮੌਕੇ ‘ਤੇ ਪਹੁੰਚ ਗਏ। ਮਰਨ ਵਾਲੀ ਔਰਤ ਦਾ ਨਾਮ ਰੇਣੂ ਅਤੇ ਪੁਰਸ਼ ਦਾ ਨਾਮ ਰਾਮਚੰਦਰ ਸੀ। ਰੇਣੂ ਨੇ ਕਨੌਹ ਪਿੰਡ ਦੇ ਰਹਿਣ ਵਾਲੇ ਰਾਮਚੰਦਰ ਨਾਲ ਦੂਜਾ ਵਿਆਹ ਕੀਤਾ ਸੀ। ਮ੍ਰਿਤਕਾ ਤਿੰਨ ਮਹੀਨੇ ਦੀ ਗਰਭਵਤੀ ਸੀ।
ਜਾਣਕਾਰੀ ਅਨੁਸਾਰ ਰੇਣੂ ਦਾ ਵਿਆਹ ਕਈ ਸਾਲ ਪਹਿਲਾਂ ਪਿੰਡ ਕਨੋਹ ਦੇ ਰਹਿਣ ਵਾਲੇ ਜਸਬੀਰ ਨਾਲ ਹੋਇਆ ਸੀ। ਵਿਆਹ ਤੋਂ ਬਾਅਦ ਉਸ ਦੇ ਦੋ ਬੱਚੇ ਹੋਏ। ਕਰੀਬ ਇੱਕ ਸਾਲ ਪਹਿਲਾਂ ਰੇਣੂ ਦਾ ਆਪਣੇ ਪਤੀ ਜਸਬੀਰ ਨਾਲ ਝਗੜਾ ਹੋਇਆ ਸੀ। ਇਸ ਤੋਂ ਬਾਅਦ ਜਸਬੀਰ ਤੋਂ ਉਸ ਦਾ ਤਲਾਕ ਹੋ ਗਿਆ। ਕਰੀਬ 8 ਮਹੀਨੇ ਪਹਿਲਾਂ ਰੇਣੂ ਦਾ ਵਿਆਹ ਕਨੌਹ ਪਿੰਡ ‘ਚ ਆਪਣੇ ਸਹੁਰੇ ਘਰ ਦੇ ਸਾਹਮਣੇ ਰਹਿੰਦੇ ਰਾਮਚੰਦਰ ਨਾਲ ਹੋਇਆ ਸੀ।
ਇਲਾਕੇ ‘ਚ ਚਰਚਾ ਹੈ ਕਿ ਰੇਣੂ ਅਤੇ ਰਾਮਚੰਦਰ ਵਿਚਕਾਰ ਪਹਿਲਾਂ ਤੋਂ ਪ੍ਰੇਮ ਸਬੰਧ ਚੱਲ ਰਹੇ ਸਨ ਅਤੇ ਇਸੇ ਕਾਰਨ ਉਸ ਨੇ ਜਸਬੀਰ ਨੂੰ ਤਲਾਕ ਦੇ ਦਿੱਤਾ ਸੀ। ਰੇਣੂ ਅਤੇ ਰਾਮਚੰਦਰ ਨੇ ਵਿਆਹ ਤੋਂ ਬਾਅਦ ਪਿੰਡ ਛੱਡ ਦਿੱਤਾ ਅਤੇ ਘਰ ਬਣਾ ਕੇ ਖੇਤ ਵਿੱਚ ਰਹਿਣ ਲੱਗੇ। ਰੇਣੂ ਦੀ ਉਮਰ 35 ਸਾਲ ਅਤੇ ਰਾਮਚੰਦਰ ਦੀ ਉਮਰ 36 ਸਾਲ ਦੇ ਕਰੀਬ ਸੀ।
ਮੰਗਲਵਾਰ ਨੂੰ ਰਾਮਚੰਦਰ ਬਾਈਕ ‘ਤੇ ਦੁੱਧ ਇਕੱਠਾ ਕਰਨ ਲਈ ਖੇਤ ਤੋਂ ਪਿੰਡ ਆਇਆ ਸੀ। ਰੇਣੂ ਵੀ ਉਸ ਦੇ ਨਾਲ ਸੀ। ਸ਼ਾਮ ਕਰੀਬ 7.30 ਵਜੇ ਦੋਵੇਂ ਬਾਈਕ ‘ਤੇ ਪਿੰਡ ਤੋਂ ਖੇਤ ਲਈ ਨਿਕਲੇ। ਜਦੋਂ ਦੋਵੇਂ ਪਿੰਡ ਤੋਂ ਕਰੀਬ ਦੋ ਕਿਲੋਮੀਟਰ ਦੂਰ ਪੁੱਜੇ ਤਾਂ ਕਿਸੇ ਵਾਹਨ ਨੇ ਉਨ੍ਹਾਂ ਦੀ ਬਾਈਕ ਨੂੰ ਟੱਕਰ ਮਾਰ ਦਿੱਤੀ। ਟੱਕਰ ਹੁੰਦੇ ਹੀ ਰਾਮਚੰਦਰ ਅਤੇ ਰੇਣੂ ਸੜਕ ‘ਤੇ ਡਿੱਗ ਗਏ।
ਇਸ ਤੋਂ ਬਾਅਦ ਪਿਕਅੱਪ ਤੋਂ ਚਾਰ ਵਿਅਕਤੀ ਹੇਠਾਂ ਉਤਰ ਗਏ, ਜਿਨ੍ਹਾਂ ਨੇ ਕੁਹਾੜੀ ਲੈ ਰੱਖੀ ਸੀ। ਹਮਲਾਵਰਾਂ ਨੇ ਪਹਿਲਾਂ ਸੜਕ ‘ਤੇ ਪਈ ਰੇਣੂ ਨੂੰ ਮਾਰਿਆ। ਰੇਣੂ ‘ਤੇ ਹਮਲਾਵਰਾਂ ਨੂੰ ਹਮਲਾ ਕਰਦੇ ਦੇਖ ਰਾਮਚੰਦਰ ਰੌਲਾ ਪਾਉਂਦਾ ਹੋਇਆ ਖੇਤਾਂ ਵੱਲ ਭੱਜ ਗਿਆ। ਇਸ ‘ਤੇ ਹਮਲਾਵਰਾਂ ਨੇ ਉਸ ਦਾ ਪਿੱਛਾ ਕੀਤਾ ਅਤੇ ਉਸ ਨੂੰ ਵੀ ਖੇਤਾਂ ਵਿਚ ਮਾਰ ਦਿੱਤਾ।
ਰੇਣੂ ਅਤੇ ਰਾਮਚੰਦਰ ਦੀ ਹੱਤਿਆ ਕਰਨ ਤੋਂ ਬਾਅਦ ਚਾਰੇ ਹਮਲਾਵਰ ਮੌਕੇ ‘ਤੇ ਹੀ ਗੱਡੀ ਛੱਡ ਕੇ ਫਰਾਰ ਹੋ ਗਏ। ਕਾਰ ਬਿਲਕੁਲ ਨਵੀਂ ਹੈ। ਕਾਤਲਾਂ ਨੇ ਦੋਹਾਂ ‘ਤੇ ਕੁਹਾੜੀ ਨਾਲ ਇੰਨੀ ਬੇਰਹਿਮੀ ਨਾਲ ਹਮਲਾ ਕੀਤਾ ਕਿ ਉਨ੍ਹਾਂ ਦੇ ਸਰੀਰ ਦੇ ਕਈ ਅੰਗ ਕੱਟ ਦਿੱਤੇ ਗਏ। ਮੌਕੇ ‘ਤੇ ਪਹੁੰਚੀ ਪੁਲਿਸ ਨੇ ਕਾਰ ਅਤੇ ਮੋਟਰਸਾਈਕਲ ਨੂੰ ਕਬਜ਼ੇ ‘ਚ ਲੈ ਲਿਆ ਹੈ। ਪੁਲਿਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
