ਅਹਿਮਦਾਬਾਦ ਦੇ 10 ਸਕੂਲਾਂ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਦੇਣ ਦੇ ਮਾਮਲੇ ‘ਚ ਵੱਡਾ ਖੁਲਾਸਾ ਹੋਇਆ ਹੈ। ਕ੍ਰਾਈਮ ਬ੍ਰਾਂਚ ਨੇ ਇਸ ਮਾਮਲੇ ਦਾ ਪਰਦਾਫਾਸ਼ ਕੀਤਾ ਹੈ ਅਤੇ ਇਸ ਵਿੱਚ ਪਾਕਿਸਤਾਨ ਦਾ ਕਨੈਕਸ਼ਨ ਸਾਹਮਣੇ ਆਇਆ ਹੈ। ਕ੍ਰਾਈਮ ਬ੍ਰਾਂਚ ਦੀ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਸਕੂਲਾਂ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਵਾਲੀ ਮੇਲ ਪਾਕਿਸਤਾਨ ਤੋਂ ਆਈ ਸੀ। ਕ੍ਰਾਈਮ ਬ੍ਰਾਂਚ ਨੇ ਉਸ ਆਈਡੀ ਨੂੰ ਟਰੇਸ ਕਰ ਲਿਆ ਹੈ ਜਿੱਥੋਂ ਮੇਲ ਆਈ ਸੀ। ਹਾਲਾਂਕਿ, ਇਸਦੇ ਲਈ ਇੱਕ ਰੂਸੀ ਡੋਮੇਨ ਦੀ ਵਰਤੋਂ ਕੀਤੀ ਗਈ ਸੀ।
ਦਰਅਸਲ, ਹਾਲ ਹੀ ‘ਚ ਅਹਿਮਦਾਬਾਦ ‘ਚ ਉਸ ਸਮੇਂ ਹੜਕੰਪ ਮਚ ਗਿਆ ਸੀ, ਜਦੋਂ ਸ਼ਹਿਰ ਦੇ 10 ਸਕੂਲਾਂ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਵਾਲੀ ਮੇਲ ਆਈ ਸੀ। ਇਸ ਤੋਂ ਬਾਅਦ ਪੁਲਿਸ ਨੇ ਤੇਜ਼ੀ ਨਾਲ ਭਾਲ ਸ਼ੁਰੂ ਕਰ ਦਿੱਤੀ। ਹਾਲਾਂਕਿ, ਬਾਅਦ ਵਿੱਚ ਇਸ ਨੂੰ ਫਰਜ਼ੀ ਧਮਕੀ ਕਰਾਰ ਦਿੱਤਾ ਗਿਆ। ਪੁਲਿਸ ਨੇ ਸਾਰੇ ਸਕੂਲਾਂ ਦੀ ਤਲਾਸ਼ੀ ਲੈਣ ਤੋਂ ਬਾਅਦ ਇਸ ਨੂੰ ਫਰਜ਼ੀ ਕਰਾਰ ਦਿੱਤਾ।
ਅਹਿਮਦਾਬਾਦ ਸਿਟੀ ਕ੍ਰਾਈਮ ਬ੍ਰਾਂਚ ਨੇ ਇਕ ਬਿਆਨ ‘ਚ ਕਿਹਾ ਕਿ ਸੂਚਨਾ ਮਿਲਣ ਤੋਂ ਬਾਅਦ ਪੁਲਸ, ਬੰਬ ਰੋਕੂ ਦਸਤੇ, ਡੌਗ ਸਕੁਐਡ ਅਤੇ ਕ੍ਰਾਈਮ ਬ੍ਰਾਂਚ ਦੀ ਟੀਮ ਇਨ੍ਹਾਂ ਸਕੂਲਾਂ ‘ਚ ਪਹੁੰਚੀ ਅਤੇ ਉਨ੍ਹਾਂ ਦੀ ਬਾਰੀਕੀ ਨਾਲ ਤਲਾਸ਼ੀ ਲਈ। ਹਾਲਾਂਕਿ ਤਲਾਸ਼ੀ ਮੁਹਿੰਮ ਦੌਰਾਨ ਕੋਈ ਵਿਸਫੋਟਕ ਨਹੀਂ ਮਿਲਿਆ।
ਕ੍ਰਾਈਮ ਬ੍ਰਾਂਚ ਨੇ ਲੋਕਾਂ ਨੂੰ ਨਾ ਘਬਰਾਉਣ ਦੀ ਅਪੀਲ ਕੀਤੀ ਸੀ ਅਤੇ ਕਿਹਾ ਸੀ ਕਿ ਇਹ ਧਮਕੀ ਫਰਜ਼ੀ ਹੈ। ਜਿਨ੍ਹਾਂ ਸਕੂਲਾਂ ਨੂੰ ਧਮਕੀ ਵਾਲੀ ਈਮੇਲ ਮਿਲੀ ਹੈ, ਉਨ੍ਹਾਂ ਵਿੱਚ ਬੋਪਲ ਵਿੱਚ ਡੀਪੀਐਸ ਅਤੇ ਆਨੰਦ ਨਿਕੇਤਨ, ਐਸਜੀ ਹਾਈਵੇਅ ਉੱਤੇ ਉਦਗਮ ਸਕੂਲ, ਘਾਟਲੋਡੀਆ ਵਿੱਚ ਕੈਲੋਰੇਕਸ ਸਕੂਲ, ਚੰਦਖੇੜਾ ਵਿੱਚ ਕੇਂਦਰੀ ਵਿਦਿਆਲਿਆ ਅਤੇ ਏਅਰਪੋਰਟ ਰੋਡ ਉੱਤੇ ਆਰਮੀ ਛਾਉਣੀ ਕੇ. ਉਦਗਮ ਸਕੂਲ ਦੇ ਪ੍ਰਸ਼ਾਸਕ ਧੀਮੰਤ ਚੋਕਸੀ ਨੇ ਕਿਹਾ, ‘ਈਮੇਲ ਭੇਜਣ ਵਾਲੇ ਵਿਅਕਤੀ ਨੇ ਸਾਡੇ ਸਕੂਲ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਦਿੱਤੀ ਸੀ। ਸਾਡੇ ਸਕੂਲ ਵਿੱਚ 24 ਘੰਟੇ ਸੁਰੱਖਿਆ ਹੈ। ਸਾਨੂੰ ਬਾਹਰੋਂ ਕੋਈ ਪਾਰਸਲ ਨਹੀਂ ਮਿਲਿਆ ਅਤੇ ਸਾਡੇ ਸਕੂਲ ਦੇ ਦਰਵਾਜ਼ੇ ਵੀ ਬੰਦ ਸਨ।
ਦੱਸ ਦਈਏ ਕਿ ਇਸੇ ਤਰਜ਼ ‘ਤੇ ਦਿੱਲੀ ਦੇ ਸਕੂਲਾਂ ਨੂੰ ਵੀ ਈ-ਮੇਲ ਆਈਆਂ ਸਨ, ਜਿਸ ‘ਚ ਬੰਬ ਦੀ ਧਮਕੀ ਦਿੱਤੀ ਗਈ ਸੀ। ਦਿੱਲੀ ਦੇ 100 ਤੋਂ ਵੱਧ ਸਕੂਲਾਂ ਨੂੰ ਬੰਬ ਦੀ ਧਮਕੀ ਮਿਲੀ ਸੀ। ਹਾਲਾਂਕਿ, ਬਾਅਦ ਵਿੱਚ ਇਹ ਫਰਜ਼ੀ ਸਾਬਤ ਹੋਇਆ ਸੀ।
