ਹਿਮਾਚਲ ਪ੍ਰਦੇਸ਼ ‘ਚ ਪਿਛਲੇ 24 ਘੰਟਿਆਂ ਦੌਰਾਨ ਹੋਈ ਭਾਰੀ ਬਾਰਿਸ਼ ਕਾਰਨ ਹੁਣ ਤਬਾਹੀ ਦੀਆਂ ਤਸਵੀਰਾਂ ਸਾਹਮਣੇ ਆ ਰਹੀਆਂ ਹਨ। ਸ਼ੁੱਕਰਵਾਰ ਰਾਤ ਤੋਂ ਲਗਾਤਾਰ ਹੋ ਰਹੀ ਬਾਰਿਸ਼ ਤੋਂ ਬਾਅਦ ਜ਼ਮੀਨ ਖਿਸਕਣ ਦੀਆਂ ਘਟਨਾਵਾਂ ਸਾਹਮਣੇ ਆ ਰਹੀਆਂ ਹਨ। ਰਾਜਧਾਨੀ ਸ਼ਿਮਲਾ ਦੇ ਦੁਧਲੀ ‘ਚ ਭਾਰੀ ਮੀਂਹ ਤੋਂ ਬਾਅਦ ਐਤਵਾਰ ਤੜਕੇ ਸੜਕ ‘ਤੇ ਖੜ੍ਹੇ ਤਿੰਨ ਵਾਹਨ ਢਿੱਗਾਂ ਡਿੱਗ ਗਏ।
ਜ਼ਮੀਨ ਖਿਸਕਣ ਦੀ ਲਪੇਟ ਵਿੱਚ ਆਏ ਵਾਹਨ ਦੇ ਮਾਲਕ ਅਤੇ ਸਥਾਨਕ ਲੋਕਾਂ ਨੇ ਦੱਸਿਆ ਕਿ ਹਾਦਸਾ ਸਵੇਰੇ ਵਾਪਰਿਆ। ਸੜਕ ਕਿਨਾਰੇ ਖੜ੍ਹੇ 3 ਵਾਹਨ ਢਿੱਗਾਂ ਡਿੱਗਣ ਕਾਰਨ ਦੱਬ ਗਏ। ਦੱਬੇ ਵਾਹਨਾਂ ਨੂੰ ਕੱਢਣ ਲਈ ਮੌਕੇ ‘ਤੇ ਜੇਸੀਬੀ ਅਤੇ ਕਰੇਨ ਬੁਲਾਈ ਪਹਾੜਾਂ ਤੋਂ ਢਿੱਗਾਂ ਅਤੇ ਪੱਥਰ ਲਗਾਤਾਰ ਡਿੱਗ ਰਹੇ ਹਨ। ਇਸ ਕਾਰਨ ਸ਼ਿਮਲਾ ਅਤੇ ਕਾਲਕਾ ਦੇ ਦੋਵੇਂ ਪਾਸੇ ਵਾਹਨਾਂ ਦਾ ਲੰਮਾ ਜਾਮ ਲੱਗ ਗਿਆ ਹੈ।
ਮੌਸਮ ਵਿਭਾਗ ਮੁਤਾਬਕ ਹਿਮਾਚਲ ‘ਚ ਅਗਲੇ ਤਿੰਨ ਦਿਨਾਂ ਤੱਕ ਮੀਂਹ ਤੋਂ ਰਾਹਤ ਮਿਲਣ ਦੀ ਉਮੀਦ ਨਹੀਂ ਹੈ। ਇਸ ਦੌਰਾਨ ਯੈਲੋ ਅਲਰਟ ਜਾਰੀ ਕੀਤਾ ਗਿਆ ਹੈ। ਮੌਸਮ ਵਿਭਾਗ ਨੇ ਭਾਰੀ ਮੀਂਹ ਦੀ ਸੰਭਾਵਨਾ ਜਤਾਈ ਹੈ। ਹਿਮਾਚਲ ‘ਚ ਪਿਛਲੇ 24 ਘੰਟਿਆਂ ‘ਚ ਹੋਈ ਬਾਰਿਸ਼ ਕਾਰਨ 452 ਸੜਕਾਂ ‘ਤੇ ਵਾਹਨਾਂ ਦੀ ਆਵਾਜਾਈ ਠੱਪ ਹੋ ਗਈ ਹੈ। ਦੋ ਕੌਮੀ ਮਾਰਗਾਂ ’ਤੇ ਵੀ ਆਵਾਜਾਈ ਵਿੱਚ ਵਿਘਨ ਪਿਆ ਹੈ। ਦਰਜਨਾਂ ਪਿੰਡਾਂ ਵਿੱਚ ਬਿਜਲੀ ਗੁੱਲ ਹੈ ਅਤੇ 1814 ਬਿਜਲੀ ਟਰਾਂਸਫਾਰਮਰ ਅਤੇ 59 ਜਲ ਸਪਲਾਈ ਸਕੀਮਾਂ ਠੱਪ ਹਨ। ਸਭ ਤੋਂ ਵੱਧ 236 ਸੜਕਾਂ ਮੰਡੀ ਜ਼ਿਲ੍ਹੇ ਵਿੱਚ ਅਤੇ 59 ਸ਼ਿਮਲਾ ਵਿੱਚ ਬੰਦ ਹਨ। ਮੰਡੀ ਵਿੱਚ ਹੀ 1335 ਅਤੇ ਹਮੀਰਪੁਰ ਵਿੱਚ 445 ਬਿਜਲੀ ਦੇ ਟਰਾਂਸਫਾਰਮਰ ਟੁੱਟੇ ਪਏ ਹਨ।
ਹਿਮਾਚਲ ਡਿਜ਼ਾਸਟਰ ਮੈਨੇਜਮੈਂਟ ਤੋਂ ਮਿਲੀ ਜਾਣਕਾਰੀ ਮੁਤਾਬਕ 24 ਜੂਨ ਤੋਂ 12 ਅਗਸਤ ਤੱਕ ਮਾਨਸੂਨ ਸੀਜ਼ਨ ‘ਚ 255 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ ਅਤੇ 290 ਲੋਕ ਜ਼ਖਮੀ ਹੋਏ ਹਨ। ਮੀਂਹ ਕਾਰਨ ਹੁਣ ਤੱਕ 935 ਘਰ ਢਹਿ ਗਏ ਹਨ। ਸੀਜ਼ਨ ‘ਚ ਹੁਣ ਤੱਕ 6807.22 ਕਰੋੜ ਰੁਪਏ ਤੋਂ ਜ਼ਿਆਦਾ ਦਾ ਨੁਕਸਾਨ ਹੋ ਚੁੱਕਾ ਹੈ। ਸੂਬੇ ਵਿੱਚ ਜ਼ਮੀਨ ਖਿਸਕਣ ਦੀਆਂ 87 ਘਟਨਾਵਾਂ ਅਤੇ ਹੜ੍ਹਾਂ ਦੀਆਂ 54 ਘਟਨਾਵਾਂ ਸਾਹਮਣੇ ਆਈਆਂ ਹਨ।
