ਕੈਨੇਡਾ ਵਿੱਚ ਇੱਕ ਗੁਰਦੁਆਰਾ ਸਾਹਿਬ ਤੋਂ ਇੱਕ ਪਾਠੀ ਸਿੰਘ ਦਾ ਭਾਵੁਕ ਵੀਡੀਓ ਸਾਹਮਣੇ ਆਇਆ ਹੈ, ਜਿਸ ਵਿੱਚ ਉਹ ਗੁਰਦੁਆਰਾ ਪ੍ਰਬੰਧਕਾਂ ’ਤੇ ਗੰਭੀਰ ਦੋਸ਼ ਲਗਾਉਂਦੇ ਹੋਏ ਨਜ਼ਰ ਆ ਰਹੇ ਹਨ। ਰਾਗੀ ਜਥੇ ਨਾਲ ਕੀਰਤਨ ਕਰਦੇ ਹੋਏ ਇਹ ਸਿੰਘ ਭਾਵੁਕ ਹੋ ਗਏ ਅਤੇ ਕਿਹਾ ਕਿ ਉਹ ਵਿਤਕਰੇ ਵਾਲੇ ਸੱਭਿਆਚਾਰ ਵਿੱਚ ਹੋਰ ਨਹੀਂ ਰਹਿ ਸਕਦੇ। ਉਨ੍ਹਾਂ ਨੇ ਬੋਲਣ ਦੀ ਆਜ਼ਾਦੀ ਖੋਹੇ ਜਾਣ ਦਾ ਵੀ ਜ਼ਿਕਰ ਕੀਤਾ।
ਪਾਠੀ ਸਿੰਘ ਨੇ ਦੱਸਿਆ ਕਿ ਗੁਰਦੁਆਰੇ ਵਿੱਚ ਉਨ੍ਹਾਂ ਨੂੰ ਹਰ ਛੋਟੀ-ਵੱਡੀ ਗੱਲ ’ਤੇ ਰੋਕਿਆ ਜਾਂਦਾ ਹੈ। ਕੀ ਕਹਿਣਾ ਹੈ, ਕਿਸ ਲਈ ਅਰਦਾਸ ਕਰਨੀ ਹੈ, ਕਿਸ ਨੂੰ ਸਿਰੋਪਾ ਦੇਣਾ ਜਾਂ ਲੈਣਾ ਹੈ, ਚਾਵਰ ਸੇਵਾ ਕਰਨੀ ਹੈ ਜਾਂ ਜੈਕਾਰੇ ਲਾਉਣੇ ਹਨ – ਇਨ੍ਹਾਂ ਸਾਰੇ ਮਾਮਲਿਆਂ ਵਿੱਚ ਪੂਰਾ ਨਿਯੰਤਰਣ ਹੈ। ਉਨ੍ਹਾਂ ਨੇ ਕਿਹਾ ਕਿ ਛੋਟੀਆਂ ਗੱਲਾਂ ਲਈ ਵੀ ਸੇਵਕਾਂ ਨੂੰ ਦੋਸ਼ੀ ਠਹਿਰਾਇਆ ਜਾਂਦਾ ਹੈ, ਜਿਵੇਂ ਬੱਚੇ ਵੀ ਨਹੀਂ ਲੜਦੇ। ਉਹ ਆਪਣੀ ਡਿਊਟੀ ਦੌਰਾਨ ਬੇਇੱਜ਼ਤੀ ਮਹਿਸੂਸ ਕਰਦੇ ਹਨ ਅਤੇ ਕਿਹਾ ਕਿ ਉਹ ਇੱਥੇ ਬੇਇੱਜ਼ਤੀ ਕਰਾਉਣ ਲਈ ਨਹੀਂ ਆਏ।
ਤਨਖਾਹ ਬਾਰੇ ਗੱਲ ਕਰਦਿਆਂ ਉਨ੍ਹਾਂ ਨੇ ਖੁਲਾਸਾ ਕੀਤਾ ਕਿ ਉਨ੍ਹਾਂ ਨੂੰ ਮਹੀਨੇ 800 ਡਾਲਰ ਹੀ ਮਿਲਦੇ ਹਨ, ਜੋ ਬਹੁਤ ਘੱਟ ਹੈ। ਜੇ ਸੰਗਤ ਵਿੱਚੋਂ ਕੋਈ ਖੁਸ਼ੀ ਨਾਲ ਪੈਸੇ ਦਿੰਦਾ ਹੈ ਤਾਂ ਤਾਅਨੇ ਮਾਰੇ ਜਾਂਦੇ ਹਨ ਕਿ “ਤੁਸੀਂ ਬਹੁਤ ਕਮਾਈ ਜਾ ਰਹੇ ਹੋ, ਸੌਂਦੇ ਸਮੇਂ ਪੈਸੇ ਮਿਲ ਰਹੇ ਹਨ।” ਉਹ ਇਸ ਸਭ ਤੋਂ ਤੰਗ ਆ ਕੇ ਢਾਈ ਸਾਲ ਦੀ ਸੇਵਾ ਬਾਅਦ ਸਥਾਈ ਛੁੱਟੀ ਲੈ ਕੇ ਭਾਰਤ ਵਾਪਸ ਜਾਣ ਦਾ ਫੈਸਲਾ ਕਰ ਚੁੱਕੇ ਹਨ। ਉਨ੍ਹਾਂ ਨੇ ਕਿਹਾ ਕਿ ਇਸ ਹਫ਼ਤੇ ਜਾਂ ਐਤਵਾਰ ਬਾਅਦ ਉਹ ਆਪਣੇ ਬੱਚਿਆਂ ਕੋਲ ਘਰ ਪਰਤ ਜਾਣਗੇ।
ਵੀਡੀਓ ਵਿੱਚ ਸਿੰਘ ਨੇ ਸੰਗਤ ਤੋਂ ਮੁਆਫ਼ੀ ਵੀ ਮੰਗੀ। ਉਨ੍ਹਾਂ ਕਿਹਾ ਕਿ ਜੇ ਕਦੇ ਕੀਰਤਨ ਜਾਂ ਸੇਵਾ ਦੇ ਬਦਲੇ ਪੈਸੇ ਮੰਗੇ ਹਨ ਜਾਂ ਕਿਸੇ ਬਾਰੇ ਬੁਰਾ ਬੋਲਿਆ ਹੈ ਤਾਂ ਮਾਫ਼ ਕਰਨ। ਉਨ੍ਹਾਂ ਨੇ ਗੁਰੂ ਘਰਾਂ ਨੂੰ ਸਿਰਫ਼ ਦਿਖਾਵਾ ਕਰਾਰ ਦਿੱਤਾ ਅਤੇ ਕਿਹਾ ਕਿ ਸਿੱਖ ਧਰਮ ਨਾਲ ਪਿਆਰ ਰਹਿ ਗਿਆ ਹੈ, ਬਾਕੀ ਸਭ ਚੌਧਰ ਅਤੇ ਖਾਣ-ਪੀਣ ਤੱਕ ਸੀਮਤ ਹੋ ਗਿਆ ਹੈ। ਪਰਿਵਾਰ ਤੋਂ ਦੂਰ ਰਹਿ ਕੇ ਬੱਚਿਆਂ ਦੀਆਂ ਗੱਲਾਂ ਸੁਣਨੀਆਂ ਪੈਂਦੀਆਂ ਹਨ, ਪਰ ਇੱਥੇ ਅਜਨਬੀਆਂ ਦੇ ਤਾਅਨੇ ਵੀ ਸਹਿਣੇ ਪੈਂਦੇ ਹਨ।