ਤਾਮਿਲ ਸਿਨੇਮਾ ਦੇ ਮਸ਼ਹੂਰ ਅਦਾਕਾਰ ਅਤੇ ਤਮਿਲਗਾ ਵੇਤਰੀ ਕਜ਼ਾਗਮ (ਟੀਵੀਕੇ) ਪ੍ਰਧਾਨ ਵਿਜੇ ਨੂੰ ਭਿਆਨਕ ਧਮਕੀ ਮਿਲੀ ਹੈ। ਐਤਵਾਰ ਰਾਤ ਨੂੰ ਚੇਨਈ ਪੁਲਿਸ ਨੂੰ ਇੱਕ ਅਣਪਛਾਤੇ ਫੋਨ ਕਾਲ ਆਈ, ਜਿਸ ਵਿੱਚ ਨੀਲੰਕਾਰਾਈ ਵਿਖੇ ਵਿਜੇ ਦੇ ਘਰ ਵਿੱਚ ਬੰਬ ਰੱਖੇ ਹੋਣ ਦਾ ਦਾਅਵਾ ਕੀਤਾ ਗਿਆ। ਪੁਲਿਸ ਨੇ ਤੁਰੰਤ ਘਰ ਦੀ ਸੁਰੱਖਿਆ ਵਧਾ ਦਿੱਤੀ ਹੈ। ਸਨੀਫਰ ਕੁੱਤੇ ਵੀ ਤੈਨਾਤ ਕੀਤੇ ਗਏ, ਪਰ ਹੁਣ ਤੱਕ ਕੋਈ ਵਿਸਫੋਟਕ ਨਹੀਂ ਮਿਲਿਆ। ਇਹ ਘਟਨਾ ਕਰੂਰ ਰੈਲੀ ਭਗਦੜ ਤੋਂ ਇੱਕ ਦਿਨ ਬਾਅਦ ਵਾਪਰੀ ਹੈ।
ਉਧਰ, ਵਿਜੇ ਦੀ ਚੋਣ ਰੈਲੀ ਵਿੱਚ ਭਗਦੜ ਨਾਲ ਮੌਤਾਂ ਦੀ ਗਿਣਤੀ 41 ਹੋ ਗਈ ਹੈ। ਐਤਵਾਰ ਨੂੰ ਇੱਕ 65 ਸਾਲਾ ਔਰਤ ਨੇ ਹਸਪਤਾਲ ਵਿੱਚ ਇਲਾਜ ਦੌਰਾਨ ਦਮ ਤੋੜ ਦਿੱਤਾ। 41 ਮੌਤਾਂ ਵਿੱਚ 18 ਔਰਤਾਂ, 13 ਮਰਦ ਅਤੇ 10 ਬੱਚੇ ਸ਼ਾਮਲ ਹਨ। 95 ਲੋਕ ਜ਼ਖ਼ਮੀ ਹਨ, ਜਿਨ੍ਹਾਂ ਵਿੱਚੋਂ 51 ਆਈਸੀਯੂ ਵਿੱਚ ਚੱਲ ਰਹੇ ਹਨ। ਸ਼ਨੀਵਾਰ ਨੂੰ ਕਰੂਰ ਵਿੱਚ ਵਿਜੇ ਨੇ ਰੈਲੀ ਕੀਤੀ, ਜਿੱਥੇ 10,000 ਲੋਕਾਂ ਨੂੰ ਇਜਾਜ਼ਤ ਸੀ ਪਰ 30,000 ਤੋਂ ਵੱਧ ਭੀੜ ਇਕੱਠੀ ਹੋ ਗਈ। ਵਿਜੇ ਦੇ ਵਿਲੰਬ ਨਾਲ ਪਹੁੰਚਣ ਕਾਰਨ ਭਗਦੜ ਮਚ ਗਈ।
ਟੀਵੀਕੇ ਨੇ ਐਤਵਾਰ ਨੂੰ ਮਦਰਾਸ ਹਾਈ ਕੋਰਟ ਵਿੱਚ ਪਟੀਸ਼ਨ ਦਾਇਰ ਕੀਤੀ, ਜਿਸ ਵਿੱਚ ਡੀਐਮਕੇ ਨੇਤਾਵਾਂ ਵੱਲੋਂ ਸਾਜ਼ਿਸ਼ ਦਾ ਦੋਸ਼ ਲਗਾਇਆ ਗਿਆ। ਪਾਰਟੀ ਵਕੀਲ ਅਰਿਵਝਾਗਨ ਨੇ ਕਿਹਾ, “ਸੀਸੀਟੀਵੀ ਅਤੇ ਗਵਾਹੀਆਂ ਤੋਂ ਸਪੱਸ਼ਟ ਹੈ ਕਿ ਇਹ ਡੀਐਮਕੇ ਦੀ ਸਾਜ਼ਿਸ਼ ਸੀ। ਅਸੀਂ ਐਸਆਈਟੀ ਜਾਂ ਸੀਬੀਆਈ ਜਾਂਚ ਦੀ ਮੰਗ ਕਰ ਰਹੇ ਹਾਂ।” ਅੱਜ ਦੁਪਹਿਰ 2:15 ਵਜੇ ਸੁਣਵਾਈ ਹੋਵੇਗੀ।
ਵਿਜੇ ਨੇ ਦੁਖ ਪ੍ਰਗਟ ਕਰਦਿਆਂ ਹਰ ਪੀੜਤ ਪਰਿਵਾਰ ਨੂੰ 20 ਲੱਖ ਰੁਪਏ ਅਤੇ ਜ਼ਖ਼ਮੀਆਂ ਨੂੰ 2 ਲੱਖ ਦੀ ਰਾਹਤ ਦਾ ਐਲਾਨ ਕੀਤਾ। ਤਾਮਿਲਨਾਡੂ ਸਰਕਾਰ ਨੇ ਵੀ 10 ਲੱਖ ਰੁਪਏ ਦੀ ਘੋਸ਼ਣਾ ਕੀਤੀ ਅਤੇ ਜਾਂਚ ਲਈ ਕਮੇਟੀ ਬਣਾਈ ਹੈ। ਇਹ ਘਟਨਾ ਰਾਜ ਵਿੱਚ ਰਾਜਨੀਤਕ ਤਣਾਅ ਵਧਾ ਰਹੀ ਹੈ।
