ਮਨੋਰੰਜਨ ਕਾਲੀਆ ਦੇ ਘਰ ‘ਤੇ ਹੋਏ ਗ੍ਰਨੇਡ ਹਮਲੇ ਬਾਰੇ ਪੰਜਾਬ ਦੇ ਮੰਤਰੀ ਅਤੇ ‘ਆਪ’ ਪ੍ਰਧਾਨ ਅਮਨ ਅਰੋੜਾ ਨੇ ਆਪਣਾ ਬਿਆਨ ਦਿੱਤਾ। ਉਨ੍ਹਾਂ ਕਿਹਾ ਕਿ ਬੀਤੀ ਰਾਤ 1 ਵਜੇ ਜਲੰਧਰ ਵਿੱਚ ਸਾਬਕਾ ਭਾਜਪਾ ਮੰਤਰੀ ਦੇ ਘਰ ‘ਤੇ ਹਮਲਾ ਹੋਇਆ, ਜਿਸ ਤੋਂ ਬਾਅਦ ਪੁਲਿਸ ਤੁਰੰਤ ਮੌਕੇ ‘ਤੇ ਪਹੁੰਚੀ ਅਤੇ ਕਾਲੀਆ ਨਾਲ ਗੱਲਬਾਤ ਕਰਕੇ ਉਨ੍ਹਾਂ ਦਾ ਹਾਲ-ਚਾਲ ਪੁੱਛਿਆ। ਅਰੋੜਾ ਨੇ ਕਿਹਾ ਕਿ ਅਜਿਹੇ ਮਾਮਲਿਆਂ ਵਿੱਚ ਪੁਲਿਸ ਦੀ ਜ਼ਿੰਮੇਵਾਰੀ ਹੁੰਦੀ ਹੈ, ਪਰ ਭਾਜਪਾ ਪ੍ਰਧਾਨ ਸੁਨੀਲ ਜਾਖੜ ਨੇ ਇਸ ਮੁੱਦੇ ਨੂੰ ਰਾਜਨੀਤਿਕ ਰੰਗ ਦੇਣ ਦੀ ਕੋਸ਼ਿਸ਼ ਕੀਤੀ ਅਤੇ ਪੰਜਾਬ ਪੁਲਿਸ ਤੇ ਮੁੱਖ ਮੰਤਰੀ ਭਗਵੰਤ ਮਾਨ ‘ਤੇ ਸਵਾਲ ਉਠਾਏ, ਜੋ ਗਲਤ ਹੈ।
ਉਨ੍ਹਾਂ ਮੁਤਾਬਕ, ਪਹਿਲਾਂ ਅੱਤਵਾਦੀ ਅਤੇ ਤਸਕਰ ਵੱਖਰੇ ਸਨ, ਪਰ ਹੁਣ ਉਹ ਇੱਕਜੁੱਟ ਹੋ ਗਏ ਹਨ। ਏਡੀਜੀਪੀ ਦੀ ਪ੍ਰੈਸ ਕਾਨਫਰੰਸ ਵਿੱਚ ਇਹ ਸਾਹਮਣੇ ਆਇਆ ਕਿ ਹਮਲੇ ਦੇ ਪਿੱਛੇ ਰਾਜਨੀਤਿਕ ਕਾਰਨ ਸਨ। 12 ਘੰਟਿਆਂ ਵਿੱਚ ਮਾਮਲਾ ਟਰੈਕ ਕਰ ਲਿਆ ਗਿਆ ਅਤੇ ਦੋ ਸ਼ੱਕੀ, ਈ ਸਿੱਖਿਆ ਸਮੇਤ, ਗ੍ਰਿਫਤਾਰ ਕੀਤੇ ਗਏ। ਅਰੋੜਾ ਨੇ ਦੱਸਿਆ ਕਿ ਇਸ ਹਮਲੇ ਦਾ ਮਾਸਟਰਮਾਈਂਡ ਕਿਸ਼ਨ ਅਖਤਰ ਹੈ। ਉਨ੍ਹਾਂ ਭਾਜਪਾ ‘ਤੇ ਇਲਜ਼ਾਮ ਲਾਇਆ ਕਿ ਉਹ ਹਰ ਮੁੱਦੇ ‘ਤੇ ਰਾਜਨੀਤੀ ਕਰਕੇ ‘ਆਪ’ ਨੂੰ ਬਦਨਾਮ ਕਰਨਾ ਚਾਹੁੰਦੀ ਹੈ। ਉਨ੍ਹਾਂ ਜ਼ੀਸ਼ਾਨ ਅਖਤਰ ਦਾ ਜ਼ਿਕਰ ਕੀਤਾ, ਜੋ ਬਾਬਾ ਸਿੱਦੀਕੀ ਕਤਲ ਕੇਸ ਵਿੱਚ ਲੋੜੀਂਦਾ ਹੈ ਅਤੇ ਯੂਟਿਊਬਰ ਰੋਜਰ ਸੰਧੂ ‘ਤੇ ਹਮਲੇ ਵਿੱਚ ਵੀ ਸ਼ਾਮਲ ਸੀ।
ਜ਼ੀਸ਼ਾਨ ਨੂੰ ਸਹਿਜ਼ਾਦ ਭੱਟੀ ਨੇ ਸ਼ਹਿ ਦਿੱਤੀ, ਜੋ ਪਾਕਿਸਤਾਨ ਦੀ ISI ਦੇ ਇਸ਼ਾਰੇ ‘ਤੇ ਪੰਜਾਬ ਨੂੰ ਅਸ਼ਾਂਤ ਕਰਨਾ ਚਾਹੁੰਦਾ ਸੀ। ਉਨ੍ਹਾਂ ਕਿਹਾ ਕਿ ਲਾਰੈਂਸ ਬਿਸ਼ਨੋਈ, ਜੋ ਗੁਜਰਾਤ ਜੇਲ੍ਹ ਵਿੱਚ ਹੈ, ਨੂੰ ਭਾਜਪਾ ਸਰਕਾਰ ਜਵਾਈ ਵਾਂਗ ਰੱਖਦੀ ਹੈ। ਸਹਿਜ਼ਾਦ ਭੱਟੀ ਨੂੰ ਉੱਥੋਂ ਬੁਲਾਇਆ ਗਿਆ ਅਤੇ ਲਾਰੈਂਸ ਨਾਲ ਗੱਲਬਾਤ ਹੋਈ। ਅਰੋੜਾ ਨੇ ਸਵਾਲ ਉਠਾਇਆ ਕਿ NIA ਦੀ ਧਾਰਾ 268(1) ਤਹਿਤ ਲਾਰੈਂਸ ਨੂੰ ਗੁਜਰਾਤ ਤੋਂ ਬਾਹਰ ਜਾਂਚ ਲਈ ਕਿਉਂ ਨਹੀਂ ਲਿਜਾਇਆ ਜਾ ਸਕਦਾ, ਜਦਕਿ ਬਾਬਾ ਸਿੱਦੀਕੀ ਮਾਮਲੇ ਵਿੱਚ ਉਸਦੀ ਲੋੜ ਸੀ। ਉਨ੍ਹਾਂ ਦੋਸ਼ ਲਾਇਆ ਕਿ ਭਾਜਪਾ ਅਤੇ ਕੇਂਦਰ ਸਰਕਾਰ ਲਾਰੈਂਸ ਨੂੰ ਸੁਰੱਖਿਆ ਦੇ ਕੇ ਵੀਡੀਓ ਕਾਨਫਰੰਸ ਰਾਹੀਂ ਸਾਜ਼ਿਸ਼ਾਂ ਕਰਵਾ ਰਹੀਆਂ ਹਨ।
ਅਰੋੜਾ ਨੇ ਜਾਖੜ ਨੂੰ ਨਿਸ਼ਾਨੇ ‘ਤੇ ਲੈਂਦਿਆਂ ਕਿਹਾ ਕਿ ਉਹ ਪੰਜਾਬ ਪੁਲਿਸ ਅਤੇ ਸਰਕਾਰ ‘ਤੇ ਚਿੱਕੜ ਸੁੱਟ ਰਹੇ ਹਨ, ਪਰ ਅਕਾਲੀ ਦਲ-ਭਾਜਪਾ ਦੇ ਸ਼ਾਸਨ ਸਮੇਂ ਪੰਜਾਬ ਦਾ ਮਾਹੌਲ ਵਿਗੜਿਆ ਸੀ। ਉਨ੍ਹਾਂ 2017 ਵਿੱਚ ਲੁਧਿਆਣਾ ਵਿੱਚ ਰਵਿੰਦਰ ਗੋਸਾਈਂ ਅਤੇ ਪਾਦਰੀ ਸੁਲਤਾਨ ਮਸੀਹ ਦੇ ਕਤਲ, ਮਈ 2016 ਵਿੱਚ ਰਣਜੀਤ ਸਿੰਘ ‘ਤੇ ਹਮਲਾ, ਜੂਨ 2016 ਵਿੱਚ ਆਰਐਸਐਸ ‘ਤੇ ਹਮਲੇ, ਜਨਵਰੀ 2016 ਵਿੱਚ ਹਿੰਦੂ ਤਖ਼ਤ ਨੇਤਾ ‘ਤੇ ਹਮਲਾ, ਅਤੇ ਅਪ੍ਰੈਲ 2015 ਵਿੱਚ ਚੰਦ ਕੌਰ ਤੇ ਸ਼ਿਵ ਸੈਨਾ ਮੁਖੀ ਦੁਰਗਾ ਪ੍ਰਸਾਦ ਦੀਆਂ ਹੱਤਿਆਵਾਂ ਦਾ ਜ਼ਿਕਰ ਕੀਤਾ। ਉਨ੍ਹਾਂ ਕਿਹਾ ਕਿ ਜਗਦੀਸ਼ ਗਗਨੇਜਾ ਅਤੇ ਚੰਦ ਕੌਰ ਦੇ ਕਤਲ ਦੀ ਜਾਂਚ ਨਹੀਂ ਹੋਈ ਅਤੇ ਅਕਾਲੀ-ਭਾਜਪਾ ਸਰਕਾਰ ਨੇ ਮਾਮਲੇ ਸੀਬੀਆਈ ਨੂੰ ਸੌਂਪ ਦਿੱਤੇ। ਅਰੋੜਾ ਨੇ ਭਾਜਪਾ ‘ਤੇ ਪੰਜਾਬ ਨੂੰ ਅਸਥਿਰ ਕਰਨ ਦੀ ਸਾਜ਼ਿਸ਼ ਦਾ ਇਲਜ਼ਾਮ ਲਗਾਇਆ।
