ਨਵੀਂ ਦਿੱਲੀ : ਦਿੱਲੀ ਪੁਲਿਸ ਨੇ ਮੰਗਲਵਾਰ ਨੂੰ ਕੈਂਸਰ ਦੀ ਨਕਲੀ ਦਵਾਈਆਂ ਬਣਾਉਣ ਵਾਲੇ ਇੱਕ ਗਿਰੋਹ ਦਾ ਪਰਦਾਫਾਸ਼ ਕੀਤਾ ਹੈ। ਅੰਤਰਰਾਸ਼ਟਰੀ ਨਕਲੀ ਦਵਾਈਆਂ ਬਣਾਉਣ ਅਤੇ ਵੇਚਣ ਦੇ ਰੈਕੇਟ ‘ਚ ਸ਼ਾਮਲ ਕੁੱਲ 7 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ।
ਕ੍ਰਾਈਮ ਬ੍ਰਾਂਚ ਦੇ ਸਪੈਸ਼ਲ ਕਮਿਸ਼ਨਰ ਆਰਐਸ ਯਾਦਵ ਅਨੁਸਾਰ ਇਸ ਗਿਰੋਹ ਵਿੱਚ ਸ਼ਾਮਲ ਦੋ ਇੰਜਨੀਅਰ, ਇੱਕ ਡਾਕਟਰ ਅਤੇ ਇੱਕ ਐਮਬੀਏ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਪੁਲਿਸ ਨੇ ਦੱਸਿਆ ਕਿ ਹਰਿਆਣਾ ਦੇ ਸੋਨੀਪਤ ਵਿੱਚ ਇੱਕ ਫੈਕਟਰੀ ਅਤੇ ਗਾਜ਼ੀਆਬਾਦ ਵਿੱਚ ਇੱਕ ਗੋਦਾਮ ਦਾ ਪਰਦਾਫਾਸ਼ ਕੀਤਾ ਗਿਆ।
ਇਸ ਦੌਰਾਨ ਪੁਲਿਸ ਨੇ 8 ਕਰੋੜ ਰੁਪਏ ਦੀਆਂ ਨਕਲੀ ਦਵਾਈਆਂ ਵੀ ਬਰਾਮਦ ਕੀਤੀਆਂ ਹਨ। ਪਿਛਲੇ 2-3 ਸਾਲਾਂ ਤੋਂ ਚੱਲ ਰਹੇ ਇਸ ਰੈਕੇਟ ਵਿੱਚ ਸ਼ਾਮਲ ਤਿੰਨ ਵਿਅਕਤੀ ਫਰਾਰ ਹਨ।
ਪੁਲਿਸ ਨੂੰ ਪਤਾ ਲੱਗਾ ਸੀ ਕਿ ਇਸ ਗਿਰੋਹ ਦਾ ਵੱਡਾ ਗੋਦਾਮ ਗਾਜ਼ੀਆਬਾਦ ਦੇ ਟਰੋਨਿਕਾ ਸਿਟੀ ਵਿੱਚ ਹੈ। ਇੱਥੇ ਕੈਂਸਰ ਦੀਆਂ ਦਵਾਈਆਂ ਪੈਕ ਕੀਤੀਆਂ ਗਈਆਂ ਸਨ।
ਇਸ ਤੋਂ ਬਾਅਦ ਪੁਲਿਸ ਨੂੰ ਸੂਚਨਾ ਮਿਲੀ ਕਿ ਡਾਕਟਰ ਪਵਿਤਰ ਪ੍ਰਧਾਨ ਅਤੇ ਸ਼ੁਭਮ ਮੰਨਾ ਨੋਇਡਾ ਦੇ ਸੈਕਟਰ 43 ਵਿੱਚ ਇੱਕ ਫਲੈਟ ਵਿੱਚ ਰਹਿ ਰਹੇ ਹਨ ਅਤੇ ਉਥੋਂ ਆਪਣਾ ਕਾਰੋਬਾਰ ਚਲਾ ਰਹੇ ਹਨ। ਇਸ ਦੇ ਨਾਲ ਹੀ ਇਹ ਮੁਲਜ਼ਮ ਦੇਸ਼ ਭਰ ਵਿੱਚ ਦਵਾਈਆਂ ਦੀ ਡਲਿਵਰੀ ਲਈ ‘ਵੀ ਫਾਸਟ’ ਕੋਰੀਅਰ ਬੁੱਕ ਕਰਦੇ ਸਨ।
ਇਸ ਗਿਰੋਹ ਦੇ ਮੈਂਬਰਾਂ ਦੀ ਹਰਕਤ ‘ਤੇ ਨਜ਼ਰ ਰੱਖਣ ਲਈ ਵੱਖ-ਵੱਖ ਟੀਮਾਂ ਬਣਾਈਆਂ ਗਈਆਂ ਸਨ। ਇਸ ਟੀਮ ਨੇ ਗਾਜ਼ੀਆਬਾਦ ਸਥਿਤ ਗੋਦਾਮ ਬਾਰੇ ਜਾਣਕਾਰੀ ਦੇਣ ਵਾਲੇ ਪੰਕਜ ਸਿੰਘ ਬੋਹਰਾ ਨਾਂ ਦੇ ਵਿਅਕਤੀ ਨੂੰ ਫੜਿਆ। ਇਸ ਤੋਂ ਬਾਅਦ ਦੂਜੀ ਟੀਮ ਨੇ ਨੋਇਡਾ ਦੇ 43 ਤੋਂ ਡਾਕਟਰ ਪਵਿਤਰ ਪ੍ਰਧਾਨ, ਸ਼ੁਭਮ ਮੰਨਾ ਅਤੇ ਅੰਕਿਤ ਸ਼ਰਮਾ ਦੇ ਫਲੈਟ ਦੀ ਤਲਾਸ਼ੀ ਲਈ ਅਤੇ ਉਨ੍ਹਾਂ ਨੂੰ ਗ੍ਰਿਫਤਾਰ ਕਰ ਲਿਆ। ਇੱਥੋਂ ਵੱਡੀ ਮਾਤਰਾ ਵਿੱਚ ਦਵਾਈਆਂ ਵੀ ਬਰਾਮਦ ਹੋਈਆਂ ਹਨ।
ਇਸ ਮਾਮਲੇ ‘ਚ ਮੁਲਜ਼ਮ ਹਨ?
ਡਾ: ਪਵਿਤਰ ਨਰਾਇਣ ਪ੍ਰਧਾਨ ਚੀਨ ਯੂਨੀਵਰਸਿਟੀ ਤੋਂ ਐਮਬੀਬੀਐਸ ਹੈ, ਜਿਸ ਤੋਂ ਬਾਅਦ ਉਸਨੇ ਜੀਟੀਬੀ ਅਤੇ ਦੀਪਚੰਦ ਬੰਧੂ ਹਸਪਤਾਲ, ਦਿੱਲੀ ਵਿੱਚ ਜੂਨੀਅਰ ਰੈਜ਼ੀਡੈਂਟ ਵਜੋਂ ਕੰਮ ਕੀਤਾ। ਮੁਲਜ਼ਮ ਸ਼ੁਭਮ ਮੰਨਾ ਬੈਂਗਲੁਰੂ ਤੋਂ ਬੀ.ਟੈਕ ਹੈ। ਉਹ ਕਈ ਮਲਟੀਨੈਸ਼ਨਲ ਕੰਪਨੀਆਂ ‘ਚ ਕੰਮ ਕਰਨ ਤੋਂ ਬਾਅਦ ਗੈਂਗ ‘ਚ ਸ਼ਾਮਲ ਹੋ ਗਿਆ ਸੀ। ਸ਼ੁਭਮ ਦਵਾਈ ‘ਤੇ ਬੈਚ ਨੰਬਰ ਅਤੇ ਮਿਆਦ ਪੁੱਗਣ ਦੀ ਤਰੀਕ ਲਿਖ ਰਿਹਾ ਸੀ ਅਤੇ ਪੈਕੇਜਿੰਗ ਦਾ ਕੰਮ ਦੇਖ ਰਿਹਾ ਸੀ।
ਪੰਕਜ ਸਿੰਘ ਬੋਹਰਾ ਅਤੇ ਅੰਕਿਤ ਸ਼ਰਮਾ ਆਈਟੀਆਈ ਡਿਪਲੋਮਾ ਹੋਲਡਰ ਹਨ। ਇਹ ਦੋਵੇਂ ਕੋਰੀਅਰ ਕੰਪਨੀ ਰਾਹੀਂ ਗਾਹਕਾਂ ਨੂੰ ਨਕਲੀ ਦਵਾਈਆਂ ਸਪਲਾਈ ਕਰ ਰਹੇ ਸਨ। ਮੁਲਜ਼ਮ ਰਾਮਕੁਮਾਰ ਹਰਿਆਣਾ ਵਿੱਚ ਬਾਇਓਟੈੱਕ ਨਾਮ ਦੀ ਦਵਾਈ ਬਣਾਉਣ ਵਾਲੀ ਫੈਕਟਰੀ ਚਲਾ ਰਿਹਾ ਸੀ, ਜਿਸ ਵਿੱਚ ਨਕਲੀ ਦਵਾਈਆਂ ਤਿਆਰ ਕੀਤੀਆਂ ਜਾ ਰਹੀਆਂ ਸਨ। ਮੁਲਜ਼ਮ ਏਕਾਂਸ਼ ਵਰਮਾ ਦੀ ਚੰਡੀਗੜ੍ਹ ਵਿੱਚ ਮੇਡੀਓਰਕ ਫਾਰਮਾ ਨਾਂ ਦੀ ਫਰਮ ਹੈ। ਮੁਲਜ਼ਮ ਪ੍ਰਭਾਤ ਕੁਮਾਰ ਆਦਿਤਿਆ ਫਾਰਮਾ ਦਾ ਮਾਲਕ ਹੈ ਅਤੇ ਉਸ ਦਾ ਦਫ਼ਤਰ ਚਾਂਦਨੀ ਚੌਕ, ਦਿੱਲੀ ਵਿੱਚ ਹੈ।
