ਅਮਰੀਕਾ ਦੇ ਜਾਰਜੀਆ ‘ਚ ਇਕ ਭਾਰਤੀ ਵਿਦਿਆਰਥੀ ਵਿਵੇਕ ਦਾ ਸਿਰ ਅਤੇ ਚਿਹਰੇ ‘ਤੇ ਚਾਕੂ ਮਾਰ ਕੇ ਕਤਲ ਕਰ ਦਿੱਤਾ ਗਿਆ। ਕਾਤਲ ਇਸ ਅਮਰੀਕੀ ਸ਼ਹਿਰ ਵਿੱਚ ਘੁੰਮਦਾ ਇੱਕ ਬੇਘਰ ਵਿਅਕਤੀ ਸੀ, ਜਿਸ ਦੀ ਇਹ ਵਿਦਿਆਰਥੀ ਕੁਝ ਦਿਨਾਂ ਤੋਂ ਮਨੁੱਖਤਾ ਦੇ ਇਸ਼ਾਰੇ ਵਜੋਂ ਮਦਦ ਕਰ ਰਿਹਾ ਸੀ। ਇਸ ਕਤਲ ਦਾ ਇੱਕ ਬਹੁਤ ਹੀ ਦਰਦਨਾਕ ਵੀਡੀਓ ਇਸ ਸਮੇਂ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਿਹਾ ਹੈ। ਕਾਤਲ ਨੇ ਪਹਿਲਾਂ ਵਿਦਿਆਰਥੀ ਦੇ ਪਿੱਛੇ ਹਥੌੜੇ ਨਾਲ ਵਾਰ ਕੀਤਾ, ਫਿਰ ਉਸ ਦੇ ਚਿਹਰੇ ਅਤੇ ਸਿਰ ‘ਤੇ ਇੱਕ ਤੋਂ ਬਾਅਦ ਇੱਕ ਵਾਰ ਕੀਤਾ।
ਦੱਸ ਦੇਈਏ ਕਿ ਇਹ ਭਾਰਤੀ ਵਿਦਿਆਰਥੀ ਵਿਵੇਕ, ਜੋ ਕਿ ਇੱਕ ਸਟੋਰ ਵਿੱਚ ਪਾਰਟ ਟਾਈਮ ਕੰਮ ਕਰਦਾ ਹੈ ਅਤੇ ਸਟੋਰ ਦੇ ਕੁਝ ਕਰਮਚਾਰੀ ਕੁਝ ਦਿਨਾਂ ਤੋਂ ਉਸਦੀ ਮਦਦ ਕਰ ਰਹੇ ਸਨ। ਘਟਨਾ ਦੀ ਜਾਣਕਾਰੀ ਦਿੰਦੇ ਹੋਏ ਇੱਕ ਸਥਾਨਕ ਚੈਨਲ WSB-TV ਨੇ ਦੱਸਿਆ ਕਿ ਘਟਨਾ ਜਿਸ ਵਿੱਚ 25 ਸਾਲਾ ਵਿਵੇਕ ਸੈਣੀ ਦੀ ਮੌਤ ਹੋ ਗਈ, ਉਹ 18 ਜਨਵਰੀ ਨੂੰ ਵਾਪਰੀ ਸੀ। ਇਸ ਸਬੰਧੀ ਵਧੇਰੇ ਜਾਣਕਾਰੀ ਚਸ਼ਮਦੀਦਾਂ ਨੇ ਦਿੱਤੀ। ਉਨ੍ਹਾਂ ਦਾ ਕਹਿਣਾ ਹੈ ਕਿ 18 ਜਨਵਰੀ ਦੀ ਦੇਰ ਰਾਤ ਲਿਥੋਨੀਆ ਦੇ ਸਨੈਪਫਿੰਗਰ ਅਤੇ ਕਲੀਵਲੈਂਡ ਰੋਡ ਸਥਿਤ ਸ਼ੈਵਰਨ ਫੂਡ ਮਾਰਟ ਵਿਖੇ ਵਿਵੇਕ ‘ਤੇ ਇਕ ਬੇਘਰ ਵਿਅਕਤੀ ਨੇ ਹਥੌੜੇ ਨਾਲ ਹਮਲਾ ਕੀਤਾ ਸੀ।
WSB-TV ਦੀ ਰਿਪੋਰਟ ਵਿੱਚ ਦੱਸਿਆ ਗਿਆ ਕਿ ਫੂਡ ਮਾਰਟ ਦੇ ਕਰਮਚਾਰੀਆਂ ਨੇ ਕਿਹਾ ਕਿ ਉਨ੍ਹਾਂ ਨੇ 14 ਜਨਵਰੀ ਦੀ ਸ਼ਾਮ ਨੂੰ 53 ਸਾਲਾ ਇੱਕ ਬੇਘਰ ਵਿਅਕਤੀ ਜੂਲੀਅਨ ਫਾਕਨਰ ਨੂੰ ਸਟੋਰ ਦੇ ਅੰਦਰ ਜਾਣ ਦਿੱਤਾ। ਸ਼ੈਵਰਨ ਦੇ ਇੱਕ ਕਰਮਚਾਰੀ ਨੇ ਦੱਸਿਆ, ਇਸ ਵਿਅਕਤੀ ਨੇ ਸਾਡੇ ਤੋਂ ਚਿਪਸ ਅਤੇ ਕੋਕ ਮੰਗਿਆ ਅਤੇ ਅਸੀਂ ਉਸਨੂੰ ਪਾਣੀ ਅਤੇ ਜੋ ਵੀ ਭੋਜਨ ਅਸੀਂ ਉਸਨੂੰ ਦੇ ਸਕਦੇ ਸੀ, ਉਹ ਵੀ ਦਿੱਤਾ। ਉਸ ਨੇ ਦੱਸਿਆ ਕਿ ਉਸ ਨੇ ਦੋ ਦਿਨ ਉਸ ਵਿਅਕਤੀ ਦੀ ਮਦਦ ਕੀਤੀ।
ਕਰਮਚਾਰੀ ਨੇ ਕਿਹਾ, ਉਸਨੇ ਪੁੱਛਿਆ ਕਿ ਕੀ ਮੈਨੂੰ ਇੱਕ ਕੰਬਲ ਮਿਲ ਸਕਦਾ ਹੈ, ਮੈਂ ਕਿਹਾ ਸਾਡੇ ਕੋਲ ਕੰਬਲ ਨਹੀਂ ਹਨ, ਇਸ ਲਈ ਮੈਂ ਉਸਨੂੰ ਇੱਕ ਜੈਕਟ ਦੇ ਦਿੱਤੀ। ਉਹ ਸਟੋਰ ਦੇ ਅੰਦਰ-ਬਾਹਰ ਘੁੰਮ ਰਿਹਾ ਸੀ ਅਤੇ ਸਿਗਰਟ, ਪਾਣੀ ਅਤੇ ਹੋਰ ਚੀਜ਼ਾਂ ਮੰਗ ਰਿਹਾ ਸੀ। ਪੁਲਿਸ ਨੇ ਦੱਸਿਆ ਕਿ ਜਿਵੇਂ ਹੀ ਸੈਣੀ ਘਰ ਜਾਣ ਲਈ ਨਿਕਲਿਆ ਤਾਂ ਮੁਲਜ਼ਮ ਫਾਕਨਰ ਨੇ ਉਸ ‘ਤੇ ਹਥੌੜੇ ਨਾਲ ਹਮਲਾ ਕਰ ਦਿੱਤਾ। ਕਰਮਚਾਰੀ ਨੇ ਕਿਹਾ ਕਿ ਉਸਨੇ ਉਸਨੂੰ ਪਿੱਛੇ ਤੋਂ ਮਾਰਿਆ, ਫਿਰ ਉਸਦੇ ਚਿਹਰੇ ਅਤੇ ਸਿਰ ‘ਤੇ ਲਗਭਗ 50 ਵਾਰ ਮਾਰਿਆ।
ਘਟਨਾ ਦੀ ਰਿਪੋਰਟ ਦੇ ਅਨੁਸਾਰ, ਜਦੋਂ ਅਧਿਕਾਰੀ ਪਹੁੰਚੇ ਤਾਂ ਫਾਕਨਰ ਹਥੌੜਾ ਫੜੀ ਪੀੜਤ ਦੇ ਉੱਪਰ ਖੜ੍ਹਾ ਸੀ। ਪੁਲਿਸ ਨੇ ਉਸਨੂੰ ਹਥੌੜਾ ਸੁੱਟਣ ਲਈ ਕਿਹਾ। WSB-TV ਨੇ ਦੱਸਿਆ ਕਿ ਜ਼ਖਮੀ ਵਿਵੇਕ, ਜੋ ਕਿ ਹਾਲ ਹੀ ਵਿੱਚ ਐਮਬੀਏ ਗ੍ਰੈਜੂਏਟ ਹੈ, ਨੂੰ ਮ੍ਰਿਤਕ ਘੋਸ਼ਿਤ ਕਰ ਦਿੱਤਾ ਗਿਆ। ਪੁਲਿਸ ਨੇ ਫਾਕਨਰ ਨੂੰ ਗ੍ਰਿਫਤਾਰ ਕਰ ਲਿਆ ਹੈ।
