ਇੰਟਰਨੈੱਟ ‘ਤੇ ਵਾਇਰਲ ਹੋਣ ਦਾ ਨਵਾਂ ਟਰੈਂਡ ਸੋਸ਼ਲ ਮੀਡੀਆ ‘ਤੇ ਮਸ਼ਹੂਰ ਹੋ ਰਿਹਾ ਹੈ। ਰੀਲਾਂ ਬਣਾਊਣ ਦੇ ਚੱਕਰ ਵਿੱਚ ਹਜ਼ਾਰਾਂ ਰੁਪਏ ਦੇ ਚਲਾਨ ਕੱਟੇ ਜਾਂਦੇ ਹਨ। ਲੁਧਿਆਣਾ ਦੇ ਲੋਕਾਂ ਵਿੱਚ ਰੀਲ ਬਣਾਉਣ ਦਾ ਜਨੂਨ ਵਧਦਾ ਜਾ ਰਿਹਾ ਹੈ। ਫ਼ਿਰੋਜ਼ਪੁਰ ਰੋਡ ‘ਤੇ ਬਣਿਆ ਨਵਾਂ ਐਲੀਵੇਟਿਡ ਪੁਲ ਰਾਤ 12 ਵਜੇ ਤੋਂ ਬਾਅਦ ਫ਼ੋਟੋ ਪੁਆਇੰਟ ਬਣ ਜਾਂਦਾ ਹੈ। ਇਸ 13 ਕਿੱਲੋਮੀਟਰ ਲੰਬੇ ਐਲੀਵੇਟਿਡ ਬ੍ਰਿਜ ‘ਤੇ 770 ਕਰੋੜ ਰੁਪਏ ਖ਼ਰਚ ਕੀਤੇ ਗਏ ਹਨ। ਇਹ ਪੁਲ 2017 ਵਿੱਚ ਸ਼ੁਰੂ ਹੋਇਆ ਸੀ। ਤੇਜ਼ ਰਫ਼ਤਾਰ ਵਾਹਨਾਂ ਦੀ ਪ੍ਰਵਾਹ ਕੀਤੇ ਬਿਨਾਂ ਵੱਡੀ ਗਿਣਤੀ ਨੌਜਵਾਨ ਇਸ ਪੁਲ ’ਤੇ ਰੀਲਾਂ ਬਣਾਉਂਦੇ ਹਨ। ਅਜਿਹੇ ‘ਚ ਹਾਦਸੇ ਦਾ ਖ਼ਤਰਾ ਬਣਿਆ ਰਹਿੰਦਾ ਹੈ।
ਬੀਤੀ ਰਾਤ ਐਲੀਵੇਟਿਡ ਪੁਲ ’ਤੇ ਕੁਝ ਨੌਜਵਾਨਾਂ ਵੱਲੋਂ ਰੀਲ ਬਣਾਈ ਗਈ। ਜਦੋਂ ਪੱਤਰਕਾਰਾਂ ਨੇ ਉਨ੍ਹਾਂ ਨੂੰ ਰੀਲ ਬਣਾਉਣ ਤੋਂ ਰੋਕਣ ਲਈ ਵੀਡੀਓ ਬਣਾਈ ਤਾਂ ਸਾਰੇ ਨੌਜਵਾਨ ਤੁਰੰਤ ਭੱਜ ਗਏ। ਇਕ ਪਾਸੇ ਜਿੱਥੇ ਟਰੈਫ਼ਿਕ ਪੁਲਸ ਐਲੀਵੇਟਿਡ ਬ੍ਰਿਜ ‘ਤੇ ਸਪੀਡ ਰਡਾਰ ਲਗਾਉਣ ਦੀ ਤਿਆਰੀ ਕਰ ਰਹੀ ਹੈ, ਉੱਥੇ ਹੀ ਦੂਜੇ ਪਾਸੇ ਟਰੈਫ਼ਿਕ ਪੁਲਿਸ ਨੂੰ ਰੀਲ ਬਣਾਉਣ ਵਾਲਿਆਂ ਨਾਲ ਵੱਖਰੇ ਤੌਰ ‘ਤੇ ਨਜਿੱਠਣਾ ਪਵੇਗਾ।
ਸੋਸ਼ਲ ਮੀਡੀਆ ‘ਤੇ 15 ਸੈਕੰਡ ਦੀ ਮਸ਼ਹੂਰੀ ਲਈ ਨੌਜਵਾਨ ਹਾਈਵੇਅ ‘ਤੇ ਵੀਡੀਓਗ੍ਰਾਫੀ ਕਰਨ ਲਈ ਆਪਣੀ ਜਾਨ ਖ਼ਤਰੇ ‘ਚ ਪਾ ਰਹੇ ਹਨ। ਨੌਜਵਾਨ ਨੇ ਆਪਣਾ ਨਾਮ ਨਾ ਦੱਸਣ ਦੀ ਸ਼ਰਤ ‘ਤੇ ਦੱਸਿਆ ਕਿ ਇਹ ਪਹਿਲੀ ਵਾਰ ਨਹੀਂ ਹੈ ਕਿ ਲੋਕ ਅਕਸਰ ਰਾਤ ਨੂੰ ਸੜਕਾਂ ‘ਤੇ ਰੀਲਸ ਬਣਾਉਂਦੇ ਹਨ। ਇਸ ਤਰ੍ਹਾਂ ਦੀਆਂ ਰੀਲਾਂ ਬਣਾਉਣ ਤੋਂ ਬਾਅਦ, ਜਦੋਂ ਉਹ ਉਨ੍ਹਾਂ ਨੂੰ ਪੋਸਟ ਕਰਦੇ ਹਨ, ਤਾਂ ਉਨ੍ਹਾਂ ਨੂੰ ਵੱਡੀ ਗਿਣਤੀ ਵਿੱਚ ਲਾਈਕਸ ਅਤੇ ਟਿੱਪਣੀਆਂ ਮਿਲਦੀਆਂ ਹਨ।
ਦੂਜੇ ਪਾਸੇ ਇਸ ਮਾਮਲੇ ਵਿੱਚ ਪੁਲਿਸ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਪੁਲਿਸ ਕਈ ਵਾਹਨ ਚਾਲਕਾਂ ਨੂੰ ਸੜਕ ’ਤੇ ਵੀਡੀਓਗ੍ਰਾਫੀ ਕਰਨ ਤੋਂ ਵੀ ਰੋਕਦੀ ਹੈ। ਕਈ ਵਾਰ ਰੀਲਾਂ ਬਣਾਉਣ ਵੇਲੇ ਲੋਕਾਂ ਦਾ ਪਿੱਛਾ ਵੀ ਕੀਤਾ ਜਾਂਦਾ ਹੈ।
ਏ.ਸੀ.ਪੀ ਟਰੈਫ਼ਿਕ ਚਰਨਜੀਤ ਲਾਂਬਾ ਨੇ ਕਿਹਾ ਕਿ ਮਹਾਂਨਗਰ ਦੀਆਂ ਸੜਕਾਂ ‘ਤੇ ਜਿੱਥੇ ਵੀ ਕੋਈ ਵਿਅਕਤੀ ਰੀਲ ਬਣਾਉਂਦਾ ਦੇਖਿਆ ਗਿਆ ਤਾਂ ਤੁਰੰਤ ਕਾਰਵਾਈ ਕੀਤੀ ਜਾਵੇਗੀ। ਇਸ ਦੇ ਨਾਲ ਹੀ ਐਲੀਵੇਟਿਡ ਪੁਲ ‘ਤੇ ਪੀਸੀਆਰ ਦਸਤੇ ਨੂੰ ਸਖ਼ਤੀ ਨਾਲ ਤਾਇਨਾਤ ਕੀਤਾ ਜਾਵੇਗਾ ਤਾਂ ਜੋ ਲੋਕਾਂ ਨੂੰ ਪੁਲ ‘ਤੇ ਰੀਲ ਬਣਾਉਣ ਤੋਂ ਰੋਕਿਆ ਜਾ ਸਕੇ। ਟਰੈਫ਼ਿਕ ਜਾਗਰੂਕਤਾ ਮੁਹਿੰਮ ਤਹਿਤ ਨੌਜਵਾਨਾਂ ਨੂੰ ਸੜਕਾਂ ’ਤੇ ਰੀਲਾਂ ਬਣਾਉਣ ਸਮੇਂ ਹੋਣ ਵਾਲੇ ਹਾਦਸਿਆਂ ਬਾਰੇ ਵੀ ਜਾਗਰੂਕ ਕੀਤਾ ਜਾਵੇਗਾ।
