ਚੰਡੀਗੜ੍ਹ ਸਥਿਤ ਪੰਜਾਬ ਯੂਨੀਵਰਸਿਟੀ ਦੇ ਡਾ. ਸੁਸ਼ੀਲ ਨਈਅਰ ਵਰਕਿੰਗ ਵੂਮੈਨ ਹੋਸਟਲ ਵਿੱਚ ਵਿਦਿਆਰਥੀਆਂ ਦੀਆਂ ਫੀਸਾਂ ਨਾਲ ਜੁੜਿਆ 60 ਲੱਖ ਰੁਪਏ ਦਾ ਵਿੱਤੀ ਘੁਟਾਲਾ ਸਾਹਮਣੇ ਆਇਆ ਹੈ। ਯੂਨੀਵਰਸਿਟੀ ਮੈਨੇਜਮੈਂਟ ਨੇ ਇਸ ਮਾਮਲੇ ਵਿੱਚ ਐਫਆਈਆਰ ਦਰਜ ਕਰਵਾਈ ਹੈ, ਅਤੇ ਪੁਲਿਸ ਹੁਣ ਜਾਂਚ ਕਰੇਗੀ।
ਘੁਟਾਲੇ ਦੀਆਂ ਹੋਰ ਪਰਤਾਂ ਜਲਦ ਸਾਹਮਣੇ ਆ ਸਕਦੀਆਂ ਹਨ।ਜਾਣਕਾਰੀ ਮੁਤਾਬਕ, ਹੋਸਟਲ ਦੀ ਇੱਕ ਸਾਬਕਾ ਦਿਹਾੜੀਦਾਰ ਮਹਿਲਾ ਕਰਮਚਾਰੀ ਨੇ 60 ਲੱਖ ਰੁਪਏ ਆਪਣੇ ਨਿੱਜੀ ਬੈਂਕ ਖਾਤੇ ਵਿੱਚ ਟ੍ਰਾਂਸਫਰ ਕੀਤੇ। ਇਹ ਘੁਟਾਲਾ ਸਾਬਕਾ ਵਾਰਡਨ ਪ੍ਰੋਫੈਸਰ ਅਵਨੀਤ ਕੌਰ ਦੇ ਕਾਰਜਕਾਲ ਦੌਰਾਨ ਵਾਪਰਿਆ। ਮਾਮਲਾ ਸਾਹਮਣੇ ਆਉਣ ‘ਤੇ ਉਕਤ ਕਰਮਚਾਰੀ ਨੂੰ ਨੌਕਰੀ ਤੋਂ ਕੱਢ ਦਿੱਤਾ ਗਿਆ।
ਪੀਯੂ ਪ੍ਰਸ਼ਾਸਨ ਨੇ ਮੁੱਢਲੀ ਜਾਂਚ ਲਈ ਇੱਕ ਕਮੇਟੀ ਬਣਾਈ, ਜਿਸ ਦੀ ਰਿਪੋਰਟ ਮੈਨੇਜਮੈਂਟ ਨੂੰ ਸੌਂਪੀ ਗਈ। ਐਫਆਈਆਰ ਦਰਜ ਕਰਨ ਨੂੰ ਲੈ ਕੇ ਵਿਵਾਦ ਚੱਲਿਆ, ਕਿਉਂਕਿ ਮੈਨੇਜਮੈਂਟ ਚਾਹੁੰਦਾ ਸੀ ਕਿ ਸਾਬਕਾ ਵਾਰਡਨ ਪ੍ਰੋ. ਅੰਮ੍ਰਿਤਪਾਲ ਕੌਰ ਐਫਆਈਆਰ ਦਰਜ ਕਰੇ, ਜਦਕਿ ਉਨ੍ਹਾਂ ਨੇ ਕਿਹਾ ਕਿ ਇਹ ਮਾਮਲਾ ਯੂਨੀਵਰਸਿਟੀ ਨਾਲ ਸਬੰਧਤ ਹੈ, ਇਸ ਲਈ ਮੈਨੇਜਮੈਂਟ ਨੂੰ ਇਹ ਕਰਨਾ ਚਾਹੀਦਾ।
ਪ੍ਰੋ. ਅੰਮ੍ਰਿਤਪਾਲ ਨੇ ਦਸਤਾਵੇਜ਼ ਸੌਂਪੇ, ਪਰ ਐਫਆਈਆਰ ਤੋਂ ਪਹਿਲਾਂ ਉਹ ਐਸਸੀ ਕਮਿਸ਼ਨ ਕੋਲ ਗਈਆਂ। ਜਾਂਚ ਲਈ ਇੱਕ ਜੱਜ ਨੂੰ ਅਧਿਕਾਰੀ ਨਿਯੁਕਤ ਕੀਤਾ ਗਿਆ, ਤਾਂ ਜੋ ਇਹ ਪਤਾ ਲੱਗ ਸਕੇ ਕਿ ਇਸ ਘੁਟਾਲੇ ਵਿੱਚ ਹੋਰ ਕਿਹੜੇ ਅਧਿਕਾਰੀ ਜਾਂ ਕਰਮਚਾਰੀ ਸ਼ਾਮਲ ਸਨ। ਮੰਨਿਆ ਜਾ ਰਿਹਾ ਹੈ ਕਿ ਇੰਨਾ ਵੱਡਾ ਘੁਟਾਲਾ ਇੱਕ ਵਿਅਕਤੀ ਅਕੇਲੇ ਨਹੀਂ ਕਰ ਸਕਦਾ। ਇਹ ਮਾਮਲਾ ਪ੍ਰੋ. ਅੰਮ੍ਰਿਤਪਾਲ ਦੇ ਕਾਰਜਕਾਲ ਵਿੱਚ ਸਾਹਮਣੇ ਆਇਆ, ਹਾਲਾਂਕਿ ਉਨ੍ਹਾਂ ਦੀ ਵਾਰਡਨਸ਼ਿਪ ਦੋ ਸਾਲਾਂ ਵਿੱਚ ਖਤਮ ਹੋ ਗਈ ਸੀ।
