ਮੁਹਾਲੀ : ਪੰਜਾਬੀ ਸੰਗੀਤ ਦੇ ਮਸ਼ਹੂਰ ਗਾਇਕ ਰਾਜਵੀਰ ਜਵੰਦਾ ਹੁਣ ਵੀ ਜ਼ਿੰਦਗੀ ਅਤੇ ਮੌਤ ਵਿਚਕਾਰ ਜੂੰਝ ਰਹੇ ਹਨ। ਹਿਮਾਚਲ ਪ੍ਰਦੇਸ਼ ਦੇ ਬੱਦੀ ਵਿੱਚ 27 ਸਤੰਬਰ ਨੂੰ ਹੋਏ ਭਿਆਨਕ ਸੜਕ ਹਾਦਸੇ ਵਿੱਚ ਗੰਭੀਰ ਜ਼ਖਮੀ ਹੋਣ ਤੋਂ ਬਾਅਦ ਉਹ ਮੋਹਾਲੀ ਦੇ ਫੋਰਟਿਸ ਹਸਪਤਾਲ ਵਿੱਚ ਲਗਾਤਾਰ ਅੱਠਵੇਂ ਦਿਨ ਵੈਂਟੀਲੇਟਰ ‘ਤੇ ਹਨ।
ਸ਼ੁੱਕਰਵਾਰ (3 ਅਕਤੂਬਰ) ਨੂੰ ਜਾਰੀ ਕੀਤੇ ਗਏ ਤਾਜ਼ਾ ਮੈਡੀਕਲ ਬੁਲੇਟਿਨ ਵਿੱਚ ਡਾਕਟਰਾਂ ਨੇ ਦੱਸਿਆ ਕਿ ਉਸਦਾ ਦਿਲ ਧੜਕਣ ਲਈ ਜੀਵਨ ਸਹਾਇਤਾ ‘ਤੇ ਨਿਰਭਰ ਹੈ। ਸਿਰ ਅਤੇ ਰੀੜ੍ਹ ਦੀ ਹੱਡੀ ‘ਤੇ ਲੱਗੀਆਂ ਗੰਭੀਰ ਸੱਟਾਂ ਕਾਰਨ ਉਸਦੇ ਸਰੀਰ ਦੇ ਬਾਕੀ ਅੰਗਾਂ ਦਾ ਕੰਮਕਾਜ ਵੀ ਪ੍ਰਭਾਵਿਤ ਹੋਇਆ ਹੈ। ਡਾਕਟਰਾਂ ਨੇ ਚਿੰਤਾ ਜ਼ਾਹਰ ਕੀਤੀ ਕਿ ਉਸਦੀ ਹਾਲਤ ਵਿੱਚ ਉਮੀਦ ਅਨੁਸਾਰ ਸੁਧਾਰ ਨਹੀਂ ਹੋ ਰਿਹਾ।
ਨਿਊਰੋਸਰਜਨਾਂ ਅਤੇ ਕ੍ਰਿਟੀਕਲ ਕੇਅਰ ਮਾਹਿਰਾਂ ਦੀ ਟੀਮ 24 ਘੰਟੇ ਉਸਦੀ ਨਿਗਰਾਨੀ ਕਰ ਰਹੀ ਹੈ।ਸਾਬਕਾ ਸੰਸਦ ਮੈਂਬਰ ਅਤੇ ਗਾਇਕ ਹੰਸਰਾਜ ਹੰਸ ਨੇ ਭਾਵੁਕ ਅਪੀਲ ਜਾਰੀ ਕਰਦਿਆਂ ਕਿਹਾ, “ਵਾਹਿਗੁਰੂ, ਪ੍ਰਮਾਤਮਾ ਅਤੇ ਅੱਲ੍ਹਾ ਅੱਗੇ ਅਰਦਾਸ ਕਰੋ ਕਿ ਭਾਵੇਂ ਸਾਡੀ ਜ਼ਿੰਦਗੀ ਛੋਟੀ ਕਰ ਦੇਣ, ਪਰ ਰਾਜਵੀਰ ਨੂੰ ਥੋੜ੍ਹਾ ਹੋਰ ਸਮਾਂ ਦੇਣ।
ਲੱਖਾਂ ਲੋਕਾਂ ਦੀਆਂ ਪ੍ਰਾਰਥਨਾਵਾਂ ਉਸ ਨੂੰ ਵਾਪਸ ਲਿਆਉਣ ਵਿੱਚ ਮਦਦ ਕਰਨਗੀਆਂ।” ਇਹ ਅਪੀਲ ਪੂਰੇ ਪੰਜਾਬੀ ਇੰਡਸਟਰੀ ਅਤੇ ਪ੍ਰਸ਼ੰਸਕਾਂ ਨੂੰ ਭਾਵੁਕ ਕਰ ਗਈ ਹੈ।
ਫੋਰਟਿਸ ਹਸਪਤਾਲ ਵੱਲੋਂ ਹੁਣ ਤੱਕ ਜਾਰੀ ਕੀਤੇ ਮੈਡੀਕਲ ਬੁਲੇਟਿਨਾਂ ਵਿੱਚ ਰਾਜਵੀਰ ਦੀ ਹਾਲਤ ਬਾਰੇ ਵੇਰਵੇ ਇਸ ਤਰ੍ਹਾਂ ਹਨ:
- 27 ਸਤੰਬਰ: ਦੁਪਹਿਰ 1:45 ਵਜੇ ਹਸਪਤਾਲ ਲਿਆਂਦੇ ਗਏ। ਸਿਰ ਅਤੇ ਰੀੜ੍ਹ ਦੀ ਹੱਡੀ ਵਿੱਚ ਗੰਭੀਰ ਸੱਟਾਂ, ਨਾਲ ਹੀ ਦਿਲ ਦਾ ਦੌਰਾ। ਹਾਲਤ ਬਹੁਤ ਨਾਜ਼ੁਕ, ਵੈਂਟੀਲੇਟਰ ‘ਤੇ ਰੱਖਿਆ ਗਿਆ।
- 28 ਸਤੰਬਰ: ਵੈਂਟੀਲੇਟਰ ‘ਤੇ ਜਾਰੀ, ਨਿਊਰੋ ਅਤੇ ਕ੍ਰਿਟੀਕਲ ਟੀਮ ਦਾ ਇਲਾਜ। ਕੋਈ ਖਾਸ ਸੁਧਾਰ ਨਹੀਂ।
- 29 ਸਤੰਬਰ: ਥੋੜ੍ਹਾ ਸੁਧਾਰ, ਪਰ ਵੈਂਟੀਲੇਟਰ ਸਹਾਇਤਾ ਜ਼ਰੂਰੀ। 24 ਘੰਟੇ ਨਿਗਰਾਨੀ।
- 30 ਸਤੰਬਰ: ਆਕਸੀਜਨ ਕਮੀ ਬਣੀ ਰਹੀ। ਐਮਆਰਆਈ ਵਿੱਚ ਗਰਦਨ ਅਤੇ ਪਿੱਠ ਵਿੱਚ ਡੂੰਘੀਆਂ ਸੱਟਾਂ ਦਾ ਪਤਾ ਲੱਗਾ। ਬਾਹਾਂ-ਲੱਤਾਂ ਵਿੱਚ ਕਮਜ਼ੋਰੀ, ਲੰਬੇ ਸਮੇਂ ਲਈ ਵੈਂਟੀਲੇਟਰ ਦੀ ਲੋੜ।
- 1 ਅਕਤੂਬਰ: ਲਾਈਫ ਸਪੋਰਟ ‘ਤੇ, ਨਿਊਰੋਲੋਜੀਕਲ ਹਾਲਤ ਨਾਜ਼ੁਕ। ਕੋਈ ਖਾਸ ਸੁਧਾਰ ਨਹੀਂ।
- 2 ਅਕਤੂਬਰ: ਲਾਈਫ ਸਪੋਰਟ ਜਾਰੀ, ਨਿਊਰੋ ਹਾਲਤ ਵਿੱਚ ਸੁਧਾਰ ਨਹੀਂ। ਦਿਲ ਲਈ ਦਵਾਈਆਂ, ਭਵਿੱਖ ਅਨਿਸ਼ਚਿਤ।
- 3 ਅਕਤੂਬਰ: ਦਿਲ ਦੀ ਧੜਕਣ ਲਈ ਵੈਂਟੀਲੇਟਰ, ਸਿਰ-ਰੀੜ੍ਹ ਦੀਆਂ ਸੱਟਾਂ ਕਾਰਨ ਅੰਗਾਂ ਦਾ ਕੰਮ ਪ੍ਰਭਾਵਿਤ। ਹਾਲਤ ਗੰਭੀਰ ਬਣੀ।
