ਗਿੱਦੜਬਾਹਾ ਵਿਧਾਨ ਸਭਾ ਹਲਕੇ ਦੇ 750 ਦੀ ਆਬਾਦੀ ਵਾਲੇ ਪਿੰਡ ਕੋਠੇ ਸੁਰਗਾਪੁਰੀ ਦੇ 6 ਫੁੱਟ 11 ਇੰਚ ਲੰਬੇ ਪਾਲਪ੍ਰੀਤ ਸਿੰਘ ਬਰਾੜ ਨੂੰ ਐੱਫਆਈਬੀਏ ਏਸ਼ੀਆ ਕੱਪ 2025 ਲਈ ਭਾਰਤੀ ਸੀਨੀਅਰ ਪੁਰਸ਼ ਬਾਸਕਟਬਾਲ ਟੀਮ ਦਾ ਕਪਤਾਨ ਚੁਣਿਆ ਗਿਆ ਹੈ। ਇਹ ਪ੍ਰਤਿਸ਼ਠਿਤ ਟੂਰਨਾਮੈਂਟ 5 ਤੋਂ 17 ਅਗਸਤ 2025 ਤੱਕ ਸਾਊਦੀ ਅਰਬ ਵਿੱਚ ਹੋਵੇਗਾ।
31 ਸਾਲਾ ਪਾਲਪ੍ਰੀਤ ਇਸ ਸਮੇਂ ਲੁਧਿਆਣਾ ਵਿੱਚ ਭਾਰਤੀ ਰੇਲਵੇ ਵਿੱਚ ਡਿਪਟੀ ਚੀਫ ਇੰਸਪੈਕਟਰ ਆਫ ਟ੍ਰੇਨਜ਼ ਦੇ ਅਹੁਦੇ ‘ਤੇ ਕੰਮ ਕਰ ਰਹੇ ਹਨ। ਪਾਲਪ੍ਰੀਤ ਦੇ ਪਿਤਾ ਫਰਜਿੰਦਰ ਸਿੰਘ ਬਰਾੜ, ਜੋ ਪਹਿਲਾਂ ਕਾਂਗਰਸ ਦੇ ਆਗੂ ਸਨ, ਨੇ ਲਗਭਗ ਇੱਕ ਦਹਾਕਾ ਪਹਿਲਾਂ ਰਾਜਨੀਤੀ ਨੂੰ ਅਲਵਿਦਾ ਕਹਿ ਦਿੱਤਾ ਸੀ। ਪਾਲਪ੍ਰੀਤ ਆਪਣੇ ਪਰਿਵਾਰ ਵਿੱਚ ਪਹਿਲਾ ਖਿਡਾਰੀ ਹੈ। ਉਸ ਨੇ ਨੌਵੀਂ ਜਮਾਤ ਵਿੱਚ ਲੁਧਿਆਣਾ ਦੀ ਬਾਸਕਟਬਾਲ ਅਕੈਡਮੀ ਵਿੱਚ ਖੇਡਣਾ ਸ਼ੁਰੂ ਕੀਤਾ।
2016 ਵਿੱਚ, ਉਸ ਨੇ ਇਤਿਹਾਸ ਰਚਿਆ ਜਦੋਂ ਉਹ ਐੱਨਬੀਏ ਡੀ-ਲੀਗ ਲਈ ਸਿੱਧੇ ਚੁਣਿਆ ਜਾਣ ਵਾਲਾ ਪਹਿਲਾ ਭਾਰਤੀ ਖਿਡਾਰੀ ਬਣਿਆ। ਨਿਊਯਾਰਕ ਦੀ ਲੌਂਗ ਆਈਲੈਂਡ ਨੈੱਟਸ ਟੀਮ ਨੇ ਉਸ ਨੂੰ ਚੁਣਿਆ, ਜਿਸ ਨਾਲ ਉਹ ਭਾਰਤ ਵਿੱਚ ਜਨਮਿਆ ਅਜਿਹਾ ਦੂਜਾ ਖਿਡਾਰੀ ਬਣਿਆ ਜੋ ਇਸ ਪੱਧਰ ‘ਤੇ ਪਹੁੰਚਿਆ।
ਫਰਜਿੰਦਰ ਸਿੰਘ ਨੇ ਖੁਸ਼ੀ ਜ਼ਾਹਰ ਕਰਦਿਆਂ ਕਿਹਾ ਕਿ ਪਰਿਵਾਰ ਦਾ ਲੰਮਾ ਕੱਦ ਅਤੇ ਕੁਦਰਤੀ ਸਰੀਰਕ ਬਣਤਰ ਨੇ ਪਾਲਪ੍ਰੀਤ ਨੂੰ ਬਾਸਕਟਬਾਲ ਵਿੱਚ ਸਫਲਤਾ ਦਿਵਾਈ। ਉਸ ਦੀ ਸਖ਼ਤ ਮਿਹਨਤ, ਲੁਧਿਆਣਾ ਬਾਸਕਟਬਾਲ ਅਕੈਡਮੀ ਦੀ ਸਿਖਲਾਈ, ਅਤੇ ਕਿਸਮਤ ਨੇ ਉਸ ਨੂੰ ਭਾਰਤੀ ਟੀਮ ਦਾ ਕਪਤਾਨ ਬਣਾਇਆ।
ਉਨ੍ਹਾਂ ਨੇ ਦੱਸਿਆ ਕਿ ਅੱਠਵੀਂ ਜਮਾਤ ਵਿੱਚ ਇੱਕ ਪੁਲਿਸ ਇੰਸਪੈਕਟਰ ਦੋਸਤ ਦੀ ਸਲਾਹ ‘ਤੇ ਪਾਲਪ੍ਰੀਤ ਨੇ ਅਕੈਡਮੀ ਜੁਆਇਨ ਕੀਤੀ। ਸਫ਼ਰ ਵਿੱਚ ਕਈ ਅੜਚਣਾਂ ਆਈਆਂ, ਪਰ ਉਸ ਦੀ ਦ੍ਰਿੜਤਾ ਅਤੇ ਮਿਹਨਤ ਨੇ ਉਸ ਨੂੰ ਅੱਗੇ ਵਧਾਇਆ। ਪਾਲਪ੍ਰੀਤ ਦੀ ਇਹ ਪ੍ਰਾਪਤੀ ਪੰਜਾਬ ਅਤੇ ਭਾਰਤ ਲਈ ਮਾਣ ਵਾਲੀ ਗੱਲ ਹੈ। ਉਸ ਦੀ ਕਪਤਾਨੀ ਪਿੰਡ ਦੇ ਨੌਜਵਾਨਾਂ ਲਈ ਪ੍ਰੇਰਣਾ ਸਰੋਤ ਹੈ, ਜੋ ਸੁਪਨੇ ਵੇਖਣ ਅਤੇ ਉਨ੍ਹਾਂ ਨੂੰ ਪੂਰਾ ਕਰਨ ਦੀ ਹਿੰਮਤ ਦਿੰਦੀ ਹੈ।