ਚੰਡੀਗੜ੍ਹ ਨੂੰ ਸਾਫ਼-ਸੁਥਰਾ ਰੱਖਣ ਲਈ ਨਗਰ ਨਿਗਮ ਨੇ ‘ਜ਼ੀਰੋ ਟਾਲਰੈਂਸ’ ਨੀਤੀ ਅਪਣਾਈ ਹੈ। ਹੁਣ ਸੜਕਾਂ ‘ਤੇ ਕੂੜਾ ਸੁੱਟਣ ਵਾਲਿਆਂ ਨੂੰ ਨਾ ਸਿਰਫ਼ ਜੁਰਮਾਨਾ ਹੋਵੇਗਾ, ਸਗੋਂ ਜਨਤਕ ਤੌਰ ‘ਤੇ ਸ਼ਰਮਿੰਦਾ ਵੀ ਕੀਤਾ ਜਾਵੇਗਾ। ਨਿਗਮ ਨੇ ਇੱਕ ਵੱਖਰਾ ਪ੍ਰੋਗਰਾਮ ਤਿਆਰ ਕੀਤਾ ਹੈ ਜਿਸ ਵਿੱਚ ਆਦਤਨ ਉਲੰਘਣਕਾਰੀਆਂ ਨੂੰ ਉਨ੍ਹਾਂ ਦੇ ਘਰ ਅੱਗੇ ਉਹੀ ਕੂੜਾ ਡੰਪ ਕੀਤਾ ਜਾਵੇਗਾ, ਬੈਂਡ ਵਜਾਇਆ ਜਾਵੇਗਾ ਅਤੇ ਵੀਡੀਓ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਕੀਤੀ ਜਾਵੇਗੀ।
ਕਮਿਸ਼ਨਰ ਅਮਿਤ ਕੁਮਾਰ ਨੇ ਸਾਰੇ ਫੀਲਡ ਸਟਾਫ਼ ਨੂੰ ਹੁਕਮ ਦਿੱਤੇ ਹਨ ਕਿ ਕੂੜਾ ਸੁੱਟਣ ਵਾਲਿਆਂ ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਜਾਵੇ। ਉਨ੍ਹਾਂ ਕਿਹਾ, “ਚੰਡੀਗੜ੍ਹ ਨੂੰ ਸਾਫ਼ ਰੱਖਣਾ ਕਾਨੂੰਨੀ ਜ਼ਿੰਮੇਵਾਰੀ ਹੈ। ਜਾਣਬੁੱਝ ਕੇ ਗੰਦਗੀ ਫੈਲਾਉਣ ਵਾਲਿਆਂ ਨੂੰ ਬਖਸ਼ਿਆ ਨਹੀਂ ਜਾਵੇਗਾ।” ਆਦਤਨ ਉਲੰਘਣਕਾਰੀਆਂ ਨੂੰ ਵਾਰ-ਵਾਰ ਜੁਰਮਾਨੇ ਤੇ ਜਨਤਕ ਝਿੜਕਾਂ ਦਾ ਸਾਹਮਣਾ ਕਰਨਾ ਪਵੇਗਾ।ਨਿਗਮ ਨੇ ਵਟਸਐਪ ਨੰਬਰ 9915762917 ਜਾਰੀ ਕੀਤਾ ਹੈ।
ਜੇਕਰ ਕੋਈ ਵਿਅਕਤੀ ਸੜਕ ‘ਤੇ ਕੂੜਾ ਸੁੱਟਦਾ ਦਿਖੇ, ਤਾਂ ਨਾਗਰਿਕ ਵੀਡੀਓ ਜਾਂ ਫੋਟੋ ਲੈ ਕੇ ਇਸ ਨੰਬਰ ‘ਤੇ ਭੇਜ ਸਕਦੇ ਹਨ ਜਾਂ ਆਈ ਐਮ ਚੰਡੀਗੜ੍ਹ ਐਪ ‘ਤੇ ਅਪਲੋਡ ਕਰ ਸਕਦੇ ਹਨ। ਜਾਂਚ ਤੋਂ ਬਾਅਦ ਵਿਅਕਤੀ ਦੀ ਪਛਾਣ ਕੀਤੀ ਜਾਵੇਗੀ ਅਤੇ ਜੁਰਮਾਨਾ ਲਗਾਇਆ ਜਾਵੇਗਾ।ਆਦਤਨ ਗੰਦਗੀ ਕਰਨ ਵਾਲਿਆਂ ਲਈ ਵਿਸ਼ੇਸ਼ ਸਜ਼ਾ: ਨਿਗਮ ਕਰਮਚਾਰੀ ਉਨ੍ਹਾਂ ਦੇ ਘਰ ਤੋਂ ਉਹੀ ਕੂੜਾ ਇਕੱਠਾ ਕਰਕੇ ਘਰ ਅੱਗੇ ਡੰਪ ਕਰਨਗੇ। ਫਿਰ ਬੈਂਡ ਵਜਾਏਗਾ, ਗੀਤ ਚੱਲੇਗਾ – “ਕੀ ਤੁਸੀਂ ਕੂੜਾ ਸੁੱਟ ਰਹੇ ਹੋ? ਮੁਸਕਰਾਓ… ਤੁਸੀਂ ਕੈਮਰੇ ‘ਤੇ ਹੋ!” ਇਹ ਸਭ ਵੀਡੀਓ ‘ਤੇ ਰਿਕਾਰਡ ਹੋਵੇਗਾ ਅਤੇ ਨਿਗਮ ਦੇ ਸੋਸ਼ਲ ਮੀਡੀਆ ਹੈਂਡਲਾਂ ‘ਤੇ ਪੋਸਟ ਕੀਤਾ ਜਾਵੇਗਾ।
ਕਮਿਸ਼ਨਰ ਨੇ ਨਾਗਰਿਕਾਂ ਨੂੰ ਅਪੀਲ ਕੀਤੀ ਕਿ ਆਪਣੇ ਆਲੇ-ਦੁਆਲੇ ਸਫਾਈ ਬਣਾਈ ਰੱਖੋ, ਕੂੜੇ ਦੇ ਨਿਪਟਾਰੇ ਦੇ ਨਿਯਮਾਂ ਦੀ ਪਾਲਣਾ ਕਰੋ ਅਤੇ ਨਿਗਮ ਨਾਲ ਮਿਲ ਕੇ ਚੰਡੀਗੜ੍ਹ ਦੀ ਸਾਖ ਨੂੰ ਬਚਾਓ। ਇਹ ਮੁਹਿੰਮ ਸਫਾਈ ਨੂੰ ਨਾਗਰਿਕ ਫਰਜ਼ ਤੇ ਕਾਨੂੰਨੀ ਜ਼ਿੰਮੇਵਾਰੀ ਦੋਵਾਂ ਨੂੰ ਮਜ਼ਬੂਤ ਕਰਨ ਵਾਲੀ ਹੈ।
