ਸੋਮਵਾਰ ਰਾਤ ਕਰੀਬ 10:30 ਵਜੇ ਲੁਧਿਆਣਾ ਦੇ ਸਮਰਾਲਾ ਚੌਕ ਫਲਾਈਓਵਰ ’ਤੇ ਇੱਕ ਦਰਦਨਾਕ ਸੜਕ ਹਾਦਸੇ ਵਿੱਚ ਨੀਚੀ ਮੰਗਲੀ (ਲੁਧਿਆਣਾ) ਦੇ ਵਸਨੀਕ ਮਲਕੀਤ ਸਿੰਘ (50) ਦੀ ਮੌਤ ਹੋ ਗਈ। ਜਲੰਧਰ ਬਾਈਪਾਸ ਤੋਂ ਫੋਕਲ ਪੁਆਇੰਟ ਵੱਲ ਜਾ ਰਹੀ ਟਰੈਕਟਰ-ਟਰਾਲੀ ਨੂੰ ਪਿੱਛੇ ਤੋਂ ਤੇਜ਼ ਰਫ਼ਤਾਰ ਕੰਟੇਨਰ ਨੇ ਜ਼ੋਰਦਾਰ ਟੱਕਰ ਮਾਰ ਦਿੱਤੀ।
ਟੱਕਰ ਇੰਨੀ ਭਿਆਨਕ ਸੀ ਕਿ ਮਲਕੀਤ ਸਿੰਘ ਟਰੈਕਟਰ ਤੋਂ ਉਛਲ ਕੇ ਫਲਾਈਓਵਰ ਤੋਂ ਹੇਠਾਂ ਡੂੰਘੀ ਖੱਡ ’ਚ ਜਾ ਡਿੱਗੇ। ਉਨ੍ਹਾਂ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ। ਇਹ ਸਾਰਾ ਵਾਕਿਆ ਉਨ੍ਹਾਂ ਦੇ ਨੌਜਵਾਨ ਪੁੱਤਰ ਹਰਦੀਪ ਸਿੰਘ ਦੇ ਸਾਹਮਣੇ ਵਾਪਰਿਆ, ਜੋ ਟਰਾਲੀ ’ਚ ਬੈਠਾ ਸੀ। ਹਰਦੀਪ ਖੂਨ ਨਾਲ ਲੱਥਪੱਥ ਹੋ ਗਿਆ ਅਤੇ ਕੁਝ ਪਲਾਂ ਲਈ ਬੇਹੋਸ਼ ਹੋ ਗਿਆ।
ਹੋਸ਼ ਆਉਣ ’ਤੇ ਜਦੋਂ ਉਸ ਨੇ ਪਿਤਾ ਨੂੰ ਲੱਭਿਆ ਤਾਂ ਉਹ ਖੱਡ ਵਿੱਚ ਪਏ ਮਿਲੇ। ਮੌਕੇ ’ਤੇ ਮੌਜੂਦ ਲੋਕਾਂ ਨੇ ਮਾਨਵਤਾ ਦੀ ਮਿਸਾਲ ਦਿੰਦਿਆਂ ਈ-ਰਿਕਸ਼ਾ ਵਿੱਚ ਪਿਤਾ-ਪੁੱਤਰ ਨੂੰ ਸੀਐਮਸੀ ਹਸਪਤਾਲ ਪਹੁੰਚਾਇਆ, ਪਰ ਡਾਕਟਰਾਂ ਨੇ ਮਲਕੀਤ ਸਿੰਘ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਹਰਦੀਪ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ।
ਮਲਕੀਤ ਸਿੰਘ ਪਰਿਵਾਰ ਦਾ ਇਕਲੌਤਾ ਕਮਾਉਂ ਮੈਂਬਰ ਸੀ। ਉਸ ਦਾ ਇੱਕ ਪੁੱਤਰ ਹਰਦੀਪ ਤੇ ਇੱਕ ਧੀ ਹੈ, ਦੋਵੇਂ ਅਜੇ ਪੜ੍ਹ ਰਹੇ ਹਨ। ਇਸ ਹਾਦਸੇ ਨੇ ਪੂਰੇ ਪਰਿਵਾਰ ਨੂੰ ਬੇਸਹਾਰਾ ਕਰ ਦਿੱਤਾ। ਛੋਟੇ-ਛੋਟੇ ਬੱਚਿਆਂ ਨੇ ਪਿਤਾ ਗੁਆ ਲਿਆ ਅਤੇ ਘਰ ਦੀ ਰੋਜ਼ੀ-ਰੋਟੀ ਠੱਪ ਹੋ ਗਈ। ਪੁਲਿਸ ਨੇ ਕੰਟੇਨਰ ਡਰਾਈਵਰ ਵਿਰੁੱਧ ਲਾਪਰਵਾਹੀ ਨਾਲ ਗੱਡੀ ਚਲਾਉਣ ਤੇ ਮੌਤ ਦਾ ਕਾਰਨ ਬਣਨ ਦੇ ਦੋਸ਼ ਹੇਠ ਮਾਮਲਾ ਦਰਜ ਕਰ ਲਿਆ ਹੈ। ਜਾਂਚ ਜਾਰੀ ਹੈ।