ਬਿਉਰੋ ਰਿਪੋਰਟ: ਹਿਮਾਚਲ ਦੇ ਮੰਡੀ ਵਿੱਚ ਚੰਡੀਗੜ੍ਹ-ਮਨਾਲੀ ਨੈਸ਼ਨਲ ਹਾਈਵੇ ਨੂੰ ਇਕ ਵਾਰ ਫਿਰ ਬੰਦ ਕਰ ਦਿੱਤਾ ਗਿਆ। ਮੰਡੀ ਤੋਂ 9 ਮੀਲ ਨੇੜੇ ਹਾਈਵੇਅ ’ਤੇ ਰਾਤ 1 ਵਜੇ ਪਹਾੜੀ ਤੋਂ ਭਾਰੀ ਮਲਬਾ ਸੜਕ ’ਤੇ ਡਿੱਗਿਆ। ਇਸ ਦੌਰਾਨ ਇੱਕ ਥਾਰ ਗੱਡੀ ਮਲਬੇ ਹੇਠਾਂ ਫਸ ਗਈ। ਜ਼ਮੀਨ ਖਿਸਕਣ ਤੋਂ ਬਾਅਦ ਹਾਈਵੇਅ ਦੇ ਦੋਵੇਂ ਪਾਸੇ 2 ਕਿਲੋਮੀਟਰ ਲੰਬਾ ਜਾਮ ਲੱਗ ਗਿਆ।
ਇਸ ਵਿੱਚ ਚੰਡੀਗੜ੍ਹ, ਪੰਜਾਬ, ਹਰਿਆਣਾ, ਦਿੱਲੀ ਅਤੇ ਹੋਰ ਰਾਜਾਂ ਦੇ ਸੈਲਾਨੀ ਸ਼ਾਮਲ ਹਨ। ਫਿਲਹਾਲ ਹਾਈਵੇਅ ਨੂੰ 9 ਘੰਟੇ ਬਾਅਦ ਵਨ-ਵੇ ਕਰ ਦਿੱਤਾ ਗਿਆ ਹੈ। ਵਾਹਨਾਂ ਨੂੰ ਬਾਹਰ ਕੱਢਿਆ ਜਾ ਰਿਹਾ ਹੈ। ਵੀਕੈਂਡ ਕਾਰਨ ਸੈਲਾਨੀ ਮਨਾਲੀ ਪਹੁੰਚ ਰਹੇ ਹਨ। ਛੋਟੇ ਵਾਹਨਾਂ ਨੂੰ ਕਟੌਲਾ ਰਾਹੀਂ ਅੱਗੇ ਭੇਜਿਆ ਜਾ ਰਿਹਾ ਹੈ ਪਰ ਬੱਸਾਂ, ਟਰੱਕ ਅਤੇ ਹੋਰ ਭਾਰੀ ਵਾਹਨ ਹਾਈਵੇਅ ਖੁੱਲ੍ਹਣ ਦੀ ਉਡੀਕ ਕਰ ਰਹੇ ਹਨ। ਬੀਤੀ ਰਾਤ ਮੰਡੀ ਵਿੱਚ ਭਾਰੀ ਮੀਂਹ ਪਿਆ। ਇਸ ਕਾਰਨ ਜ਼ਮੀਨ ਖਿਸਕ ਗਈ ਹੈ। ਮਲਬਾ ਵਾਰ-ਵਾਰ ਡਿੱਗ ਰਿਹਾ ਹੈ।
ਇਸ ਮਾਨਸੂਨ ਸੀਜ਼ਨ ਵਿੱਚ, 9 ਮੀਲ ਦੇ ਨੇੜੇ 10 ਤੋਂ ਵੱਧ ਵਾਰ ਜ਼ਮੀਨ ਖਿਸਕਣ ਦੀ ਘਟਨਾ ਵਾਪਰੀ ਹੈ। ਜਿਸ ਕਾਰਨ ਹਾਈਵੇਅ ਕਈ ਘੰਟੇ ਬੰਦ ਰਿਹਾ। ਇਸੇ ਤਰ੍ਹਾਂ 4 ਮੀਲ ਅਤੇ 6 ਮੀਲ ਵਿੱਚ ਵੀ ਹਾਈਵੇਅ ਨੂੰ ਕਈ ਵਾਰ ਬੰਦ ਕੀਤਾ ਗਿਆ।
ਮਨਾਲੀ ਹੋਟਲ ਐਸੋਸੀਏਸ਼ਨ ਦੇ ਸਾਬਕਾ ਪ੍ਰਧਾਨ ਅਨੂਪ ਠਾਕੁਰ ਨੇ ਕਿਹਾ ਹੈ ਕਿ ਵੀਕਐਂਡ ਕਾਰਨ ਹੋਟਲਾਂ ਵਿੱਚ ਸੈਲਾਨੀਆਂ ਦੀ ਆਮਦ 40 ਫੀਸਦੀ ਤੱਕ ਪਹੁੰਚਣ ਦੀ ਉਮੀਦ ਹੈ। ਆਮ ਤੌਰ ’ਤੇ 15 ਸਤੰਬਰ ਤੋਂ ਬਾਅਦ ਇਹ ਕਈ ਵਾਰ 60 ਫੀਸਦੀ ਤੱਕ ਪਹੁੰਚ ਜਾਂਦੀ ਹੈ। ਉਨ੍ਹਾਂ ਦੱਸਿਆ ਕਿ ਇਨ੍ਹੀਂ ਦਿਨੀਂ ਮਨਾਲੀ ਵਿੱਚ ਮੌਸਮ ਸੁਹਾਵਣਾ ਹੈ। ਇਸ ਲਈ ਵੀਕੈਂਡ ’ਤੇ ਅੱਜ ਵੀ ਵੱਡੀ ਗਿਣਤੀ ’ਚ ਸੈਲਾਨੀਆਂ ਦੇ ਆਉਣ ਦੀ ਉਮੀਦ ਹੈ।
