ਤਹਿਰਾਨ (22 ਅਪ੍ਰੈਲ, 2026): ਇਰਾਨ ਦੀ ਇਸਲਾਮਿਕ ਰੈਵੋਲਿਊਸ਼ਨਰੀ ਗਾਰਡ (IRGC) ਨੇ ਹੋਰਮੁਜ਼ ਸਟ੍ਰੇਟ (Hormuz Strait) ਵਿੱਚ ਭਾਰਤ ਆ ਰਹੇ ਇੱਕ ਵਪਾਰਕ ਜਹਾਜ਼ ਨੂੰ ਰੋਕ ਕੇ ਆਪਣੇ ਕਬਜ਼ੇ ਵਿੱਚ ਲੈ ਲਿਆ ਹੈ। ਇਰਾਨ ਦਾ ਇਲਜ਼ਾਮ ਹੈ ਕਿ ਇਹ ਜਹਾਜ਼ ਬਿਨਾਂ ਇਜਾਜ਼ਤ ਹੋਰਮੁਜ਼ ਦੇ ਰਸਤੇ ਤੋਂ ਗੁਜ਼ਰਨ ਦੀ ਕੋਸ਼ਿਸ਼ ਕਰ ਰਿਹਾ ਸੀ।
ਨੇਵੀਗੇਸ਼ਨ ਸਿਸਟਮ ਨਾਲ ਛੇੜਛਾੜ ਦਾ ਇਲਜ਼ਾਮ
ਲਾਈਬੇਰੀਆ ਦੇ ਝੰਡੇ ਵਾਲਾ ‘ਐਪਾਮੀਨੋਡੇਸ’ (Epaminondas) ਨਾਮਕ ਇਹ ਕੰਟੇਨਰ ਜਹਾਜ਼ ਗੁਜਰਾਤ ਦੇ ਮੁੰਦਰਾ ਪੋਰਟ ਵੱਲ ਆ ਰਿਹਾ ਸੀ। ਇਰਾਨੀ ਜਲ ਸੈਨਾ ਅਨੁਸਾਰ ਜਹਾਜ਼ ਦੇ ਨੇਵੀਗੇਸ਼ਨ ਸਿਸਟਮ ਵਿੱਚ ਛੇੜਛਾੜ ਕੀਤੀ ਗਈ ਸੀ, ਜਿਸ ਨਾਲ ਸਮੁੰਦਰੀ ਸੁਰੱਖਿਆ ਨੂੰ ਖ਼ਤਰਾ ਪੈਦਾ ਹੋ ਸਕਦਾ ਸੀ। ਕਾਰਵਾਈ ਦੌਰਾਨ IRGC ਨੇ ਜਹਾਜ਼ ਨੂੰ ਕਬਜ਼ੇ ਵਿੱਚ ਲੈ ਕੇ ਤੱਟ ਵੱਲ ਮੋੜ ਦਿੱਤਾ ਹੈ।
ਹੋਰ ਜਹਾਜ਼ਾਂ ’ਤੇ ਵੀ ਹੋਈ ਕਾਰਵਾਈ
ਇਸ ਦੇ ਨਾਲ ਹੀ ਇਰਾਨ ਨੇ ਇਜ਼ਰਾਈਲ ਨਾਲ ਸਬੰਧਤ ਇੱਕ ਹੋਰ ਜਹਾਜ਼ ‘ਫਰਾਂਸਿਸਕਾ’ ਨੂੰ ਵੀ ਕਬਜ਼ੇ ਵਿੱਚ ਲਿਆ ਹੈ। ਖ਼ਬਰਾਂ ਮੁਤਾਬਕ ‘ਯੂਫੋਰੀਆ’ ਨਾਮਕ ਇੱਕ ਹੋਰ ਜਹਾਜ਼ ‘ਤੇ ਹਮਲਾ ਵੀ ਕੀਤਾ ਗਿਆ ਹੈ। ਇਸ ਤੋਂ ਪਹਿਲਾਂ ਓਮਾਨ ਦੇ ਤੱਟ ਨੇੜੇ ਵੀ ਜਹਾਜ਼ਾਂ ’ਤੇ ਫਾਇਰਿੰਗ ਅਤੇ ਹਮਲੇ ਹੋਣ ਦੀਆਂ ਰਿਪੋਰਟਾਂ ਮਿਲੀਆਂ ਸਨ, ਜਿਸ ਨਾਲ ਖੇਤਰ ਵਿੱਚ ਤਣਾਅ ਵਧ ਗਿਆ ਹੈ।
