ਦੱਖਣੀ ਭਾਰਤ ਵਿੱਚ ਉੱਤਰ-ਪੂਰਬੀ ਮਾਨਸੂਨ ਪੂਰੇ ਜ਼ੋਰ ‘ਚ ਹੈ। ਤਾਮਿਲਨਾਡੂ ਵਿੱਚ ਭਾਰੀ ਬਾਰਿਸ਼ ਕਾਰਨ ਕਈ ਜ਼ਿਲ੍ਹਿਆਂ ਵਿੱਚ ਹੜ੍ਹ ਵਰਗੀ ਸਥਿਤੀ ਬਣੀ ਹੋਈ ਹੈ। ਚੇਨਈ, ਤੰਜਾਵੁਰ, ਕੁੱਡਾਲੋਰ, ਵਿੱਲੂਪੁਰਮ, ਤਿਰੂਵੱਲੂਰ, ਕਾਂਚੀਪੁਰਮ, ਤਿਰੂਵਰੂਰ ਤੇ ਨਾਗਾਪੱਟੀਨਮ ਵਿੱਚ ਭਾਰੀ ਮੀਂਹ ਪਿਆ। ਚੇਨਈ ਦੇ ਸਾਰੇ ਸਕੂਲ ਬੰਦ ਹਨ। ਕਾਵੇਰੀ ਡੈਲਟਾ ਖੇਤਰ ਵਿੱਚ ਝੋਨੇ ਦੀਆਂ ਫ਼ਸਲਾਂ ਪੂਰੀ ਤਰ੍ਹਾਂ ਡੁੱਬ ਗਈਆਂ। ਮਯੀਲਾਦੁਥੁਰਾਈ ਜ਼ਿਲ੍ਹੇ ਵਿੱਚ 50,000 ਏਕੜ ਫ਼ਸਲ ਪ੍ਰਭਾਵਿਤ ਹੋਈ।
ਵਿੱਲੂਪੁਰਮ ਬੱਸ ਅੱਡੇ ‘ਤੇ ਪਾਣੀ ਭਰਨ ਨਾਲ ਯਾਤਰੀਆਂ ਨੂੰ ਮੁਸ਼ਕਲ ਆਈ। ਇਰੋਡ ਵਿੱਚ ਦਰੱਖਤ ਡਿੱਗਣ ਨਾਲ ਟ੍ਰੈਫਿਕ ਜਾਮ ਹੋਇਆ, ਕੁੱਡਾਲੋਰ ਵਿੱਚ ਮਿੱਟੀ ਦਾ ਘਰ ਢਹਿ ਗਿਆ। ਚੇਨਈ ਕਾਰਪੋਰੇਸ਼ਨ ਨੇ 106 ਰਾਹਤ ਰਸੋਈਆਂ ਸ਼ੁਰੂ ਕੀਤੀਆਂ। ਕੇਂਬਰੰਬੱਕਮ, ਪੁਜ਼ਲ ਤੇ ਪੂੰਡੀ ਡੈਮਾਂ ਤੋਂ ਵਾਧੂ ਪਾਣੀ ਛੱਡਿਆ ਜਾ ਰਿਹਾ ਹੈ।
ਕੇਰਲ ਵਿੱਚ ਭਾਰੀ ਬਾਰਿਸ਼ ਤੇ ਤੇਜ਼ ਹਵਾਵਾਂ ਕਾਰਨ ਇਡੁੱਕੀ, ਪਲੱਕੜ, ਮਲੱਪੁਰਮ ਤੇ ਪਠਾਨਮਥਿੱਟਾ ਜ਼ਿਲ੍ਹਿਆਂ ਦੇ ਸਕੂਲ-ਕਾਲਜ ਬੰਦ ਹਨ। ਇਡੁੱਕੀ ਦੇ ਪਹਾੜੀ ਇਲਾਕਿਆਂ ਵਿੱਚ ਰਾਤ ਦੀ ਯਾਤਰਾ ‘ਤੇ ਪਾਬੰਦੀ ਹੈ। 10 ਜ਼ਿਲ੍ਹਿਆਂ—ਪਠਾਨਮਥਿੱਟਾ, ਅਲਾਪੁਝਾ, ਕੋਟਾਯਮ, ਇਡੁੱਕੀ, ਏਰਨਾਕੁਲਮ, ਤ੍ਰਿਸੂਰ, ਪਲੱਕੜ, ਮਲੱਪੁਰਮ, ਕੋਝੀਕੋਡ ਤੇ ਵਾਇਨਾਡ—ਲਈ ਸੰਤਰੀ ਅਲਰਟ ਹੈ।
ਆਂਧਰਾ ਪ੍ਰਦੇਸ਼ ਦੇ ਤਿਰੂਪਤੀ ਵਿੱਚ ਸੜਕਾਂ ‘ਤੇ 2-3 ਫੁੱਟ ਪਾਣੀ ਭਰ ਗਿਆ। ਛੇ ਜ਼ਿਲ੍ਹਿਆਂ—ਪ੍ਰਕਾਸ਼ਮ, ਨੇਲੋਰ, ਕਡਪਾ, ਅੰਨਾਮਲਾਈ, ਤਿਰੂਪਤੀ ਤੇ ਚਿਤੂਰ—ਲਈ ਰੈੱਡ ਅਲਰਟ, ਚਾਰ ਜ਼ਿਲ੍ਹਿਆਂ—ਕੁਰਨੂਲ, ਨੰਦਿਆਲ, ਅਨੰਤਪੁਰ ਤੇ ਸ੍ਰੀ ਸਤਿਆਸਾਈ—ਲਈ ਸੰਤਰੀ ਅਲਰਟ ਹੈ।
ਤਾਮਿਲਨਾਡੂ ਦੇ ਚੇਨਈ, ਤਿਰੂਵੱਲੁਰ, ਕਾਂਚੀਪੁਰਮ, ਤੰਜਾਵੁਰ, ਤਿਰੂਵਰੂਰ, ਨਾਗਾਪੱਟੀਨਮ ਤੇ ਕਰਾਈਕਲ ਲਈ ਰੈੱਡ ਅਲਰਟ ਜਾਰੀ ਹੈ। ਕੇਰਲ ਤੇ ਤਾਮਿਲਨਾਡੂ ਸਰਕਾਰਾਂ ਨੇ ਜ਼ਿਲ੍ਹਾ ਪ੍ਰਸ਼ਾਸਨ ਨੂੰ 24 ਘੰਟੇ ਨਿਗਰਾਨੀ ਦੇ ਨਿਰਦੇਸ਼ ਦਿੱਤੇ ਹਨ। SDRF ਹਾਈ ਅਲਰਟ ‘ਤੇ ਹੈ।
