ਬਿਊਰੋ ਰਿਪੋਰਟ (ਨਵੀਂ ਦਿੱਲੀ, 1 ਦਸੰਬਰ 2025): ਸੰਸਦ ਦੇ ਸਰਦ ਰੁੱਤ ਸੈਸ਼ਨ ਦੇ ਪਹਿਲੇ ਦਿਨ, ਸੋਮਵਾਰ ਨੂੰ, ਕਾਂਗਰਸ ਸਾਂਸਦ ਰੇਣੂਕਾ ਚੌਧਰੀ ਇੱਕ ਕੁੱਤਾ ਲੈ ਕੇ ਸੰਸਦ ਕੰਪਲੈਕਸ ਵਿੱਚ ਪਹੁੰਚ ਗਈ। ਇਸ ਘਟਨਾ ‘ਤੇ ਭਾਜਪਾ ਸਾਂਸਦਾਂ ਨੇ ਸਖ਼ਤ ਵਿਰੋਧ ਪ੍ਰਗਟਾਇਆ ਹੈ।
ਜਦੋਂ ਰੇਣੂਕਾ ਚੌਧਰੀ ਤੋਂ ਪੁੱਛਿਆ ਗਿਆ ਕਿ ਉਹ ਕੁੱਤੇ ਨੂੰ ਸੰਸਦ ਕਿਉਂ ਲਿਆਈ ਹੈ, ਤਾਂ ਉਨ੍ਹਾਂ ਕਿਹਾ: “ਸਰਕਾਰ ਨੂੰ ਜਾਨਵਰ ਪਸੰਦ ਨਹੀਂ ਹਨ। ਇਸ ਵਿੱਚ ਕੀ ਹਰਜ ਹੈ?” ਉਨ੍ਹਾਂ ਅੱਗੇ ਕਿਹਾ, “ਇਹ ਛੋਟਾ ਅਤੇ ਬਿਲਕੁਲ ਨੁਕਸਾਨ ਨਾ ਪਹੁੰਚਾਉਣ ਵਾਲਾ ਜਾਨਵਰ ਹੈ। ਕੱਟਣ ਵਾਲੇ ਅਤੇ ਡੱਸਣ ਵਾਲੇ ਤਾਂ ਸੰਸਦ ਵਿੱਚ ਹਨ, ਕੁੱਤੇ ਨਹੀਂ।”
ਉਨ੍ਹਾਂ ਦੇ ਇਸ ਕਦਮ ‘ਤੇ ਭਾਜਪਾ ਸਾਂਸਦ ਜਗਦੰਬਿਕਾ ਪਾਲ ਨੇ ਨਾਰਾਜ਼ਗੀ ਜ਼ਾਹਰ ਕੀਤੀ ਅਤੇ ਕਿਹਾ: “ਰੇਣੂਕਾ ਚੌਧਰੀ ਕੁੱਤਾ ਲੈ ਕੇ ਸੰਸਦ ਆਈ, ਇਹ ਗਲਤ ਹੈ। ਉਨ੍ਹਾਂ ‘ਤੇ ਕਾਰਵਾਈ ਹੋਣੀ ਚਾਹੀਦੀ ਹੈ। ਵਿਸ਼ੇਸ਼ ਅਧਿਕਾਰ ਦਾ ਮਤਲਬ ਦੁਰਵਰਤੋਂ ਨਹੀਂ ਹੁੰਦਾ।”
ਸੰਸਦ ਦੀ ਸੁਰੱਖਿਆ ਚਿੰਤਾ (ਸਿਕਿਓਰਿਟੀ ਕੰਸਰਨ) ਨੂੰ ਲੈ ਕੇ ਕਾਂਗਰਸ ਸਾਂਸਦ ਨੇ ਕਿਹਾ, “ਕਿਹੜਾ ਪ੍ਰੋਟੋਕੋਲ? ਕਿਤੇ ਕੋਈ ਕਾਨੂੰਨ ਬਣਿਆ ਹੈ ਕੀ? ਮੈਂ ਰਸਤੇ ਵਿੱਚ ਆ ਰਹੀ ਸੀ, ਉੱਥੇ ਸਕੂਟਰ ਅਤੇ ਕਾਰ ਦੀ ਟੱਕਰ ਹੋਈ। ਉਸਦੇ ਅੱਗੇ ਇਹ ਛੋਟਾ ਕਤੂਰਾ ਨਿਕਲ ਕੇ ਸਾਹਮਣੇ ਆ ਗਿਆ। ਇਹ ਚਾਰੇ ਪਾਸੇ ਸੜਕ ‘ਤੇ ਘੁੰਮ ਰਿਹਾ ਸੀ। ਮੈਂ ਸੋਚਿਆ ਇਹ ਪਹੀਏ ਹੇਠਾਂ ਆ ਜਾਵੇਗਾ, ਤਾਂ ਮੈਂ ਚੁੱਕ ਕੇ ਗੱਡੀ ਵਿੱਚ ਰੱਖ ਲਿਆ ਅਤੇ ਸੰਸਦ ਆ ਗਈ ਅਤੇ ਫਿਰ ਵਾਪਸ ਭਿਜਵਾ ਦਿੱਤਾ।”
ਉਨ੍ਹਾਂ ਕਿਹਾ ਕਿ ਗੱਡੀ ਵੀ ਗਈ ਅਤੇ ਕੁੱਤਾ ਵੀ। ਤਾਂ ਕਿਸ ਗੱਲ ਦੀ ਚਰਚਾ ਚੱਲ ਰਹੀ ਹੈ? ਅਸਲੀ ਡੰਗ ਮਾਰਨ ਵਾਲੇ ਅਤੇ ਕੱਟਣ ਵਾਲੇ ਸੰਸਦ ਵਿੱਚ ਬੈਠੇ ਹਨ, ਉਹ ਸਰਕਾਰ ਚਲਾਉਂਦੇ ਹਨ। ਉਸ ‘ਤੇ ਕੋਈ ਇਤਰਾਜ਼ ਨਹੀਂ। ਅਸੀਂ ਕਿਸੇ ਗੂੰਗੇ ਜਾਨਵਰ ਦੀ ਦੇਖਭਾਲ ਕਰਦੇ ਹਾਂ, ਉਹ ਚਰਚਾ ਦਾ ਵਿਸ਼ਾ ਬਣ ਜਾਂਦਾ ਹੈ ਅਤੇ ਸਰਕਾਰ ਕੋਲ ਕੁਝ ਹੋਰ ਨਹੀਂ ਹੈ।
ਦੱਸ ਦੇਈਏ ਸੰਸਦ ਵਿੱਚ ਪਾਲਤੂ ਜਾਨਵਰ ਲਿਆਉਣਾ ਨਿਯਮਾਂ ਦੀ ਉਲੰਘਣਾ ਮੰਨਿਆ ਜਾਂਦਾ ਹੈ। ਸੰਸਦ ਦੇ ਕਾਨੂੰਨ ਅਨੁਸਾਰ ਇਹ ਸੰਸਦ ਭਵਨ ਕੰਪਲੈਕਸ ਵਿਹਾਰ ਅਤੇ ਆਚਰਣ ਨਿਯਮ ਅਤੇ ਲੋਕ ਸਭਾ ਹੈਂਡਬੁੱਕ ਫਾਰ ਮੈਂਬਰਜ਼ ਦੇ ਤਹਿਤ ਗ਼ਲਤ ਹੈ।
