ਬੰਗਲਾਦੇਸ਼ : ਮੰਗਲਵਾਰ ਨੂੰ ਬੰਗਲਾਦੇਸ਼ ਦੀ ਰਾਜਧਾਨੀ ਢਾਕਾ ਤੋਂ 40 ਕਿਲੋਮੀਟਰ ਦੂਰ ਟੋਂਗੀ ਕਸਬੇ ਵਿੱਚ ਇਜਤਿਮਾ ਦੇ ਆਯੋਜਨ ਨੂੰ ਲੈ ਕੇ ਮੌਲਾਨਾ ਦੇ ਦੋ ਸਮੂਹਾਂ ਵਿੱਚ ਹੰਗਾਮਾ ਹੋ ਗਿਆ। ਇਸ ਹੰਗਾਮੇ ਵਿੱਚ ਭਾਰਤ ਦੇ ਮੌਲਾਨਾ ਸਾਦ ਅਤੇ ਬੰਗਲਾਦੇਸ਼ ਦੇ ਮੌਲਾਨਾ ਜ਼ੁਬੈਰ ਦੇ ਸਮਰਥਕਾਂ ਵਿਚਕਾਰ ਹਿੰਸਕ ਝੜਪ ਹੋਈ। ਇਸ ਲੜਾਈ ਵਿਚ ਚਾਰ ਲੋਕਾਂ ਦੀ ਮੌਤ ਹੋ ਗਈ ਹੈ, ਇਸ ਤੋਂ ਇਲਾਵਾ ਸੌ ਤੋਂ ਵੱਧ ਲੋਕ ਜ਼ਖਮੀ ਹਨ।
ਪੁਲਿਸ ਮੁਤਾਬਕ ਦੋਵਾਂ ਧਿਰਾਂ ਨੇ 7 ਲੋਕਾਂ ਦੀ ਮੌਤ ਦਾ ਦਾਅਵਾ ਕੀਤਾ ਹੈ। ਪ੍ਰਸ਼ਾਸਨ ਨੇ ਧਾਰਾ 144 ਲਾਗੂ ਕਰ ਦਿੱਤੀ ਹੈ ਅਤੇ ਇਲਾਕੇ ‘ਚ ਫੌਜ ਤਾਇਨਾਤ ਕਰ ਦਿੱਤੀ ਹੈ। ਟੋਂਗੀ ‘ਚ ਹੋਈ ਝੜਪ ਤੋਂ ਬਾਅਦ ਜ਼ਖਮੀਆਂ ਨੂੰ ਢਾਕਾ ਦੇ ਮੈਡੀਕਲ ਕਾਲਜ ‘ਚ ਦਾਖਲ ਕਰਵਾਇਆ ਗਿਆ, ਜਿੱਥੇ ਇਕ ਵਾਰ ਫਿਰ ਦੋ ਗੁੱਟਾਂ ਵਿਚਾਲੇ ਝੜਪ ਹੋ ਗਈ।
ਬੰਗਲਾਦੇਸ਼ ਦੀ ਅੰਤਰਿਮ ਸਰਕਾਰ ‘ਚ ਗ੍ਰਹਿ ਮੰਤਰੀ ਮੁਹੰਮਦ ਜਹਾਂਗੀਰ ਆਲਮ ਨੇ ਕਿਹਾ ਕਿ 4 ਲੋਕਾਂ ਦੀ ਮੌਤ ਦਾ ਮਾਮਲਾ ਦਰਜ ਕੀਤਾ ਗਿਆ ਹੈ।
ਮੈਦਾਨ ਦੇ ਕਬਜ਼ੇ ਨੂੰ ਲੈ ਕੇ ਝੜਪ
ਬੰਗਲਾਦੇਸ਼ ਪੁਲਿਸ ਦੇ ਅਨੁਸਾਰ, ਮੌਲਾਨਾ ਸਾਦ (ਸਦਪੰਥੀ) ਦੇ ਸਮਰਥਕ ਸ਼ੁੱਕਰਵਾਰ, 20 ਦਸੰਬਰ ਤੋਂ ਟੋਂਗੀ ਮੈਦਾਨ ਵਿੱਚ 5 ਦਿਨਾਂ ਇਜਤੀਮਾ ਦਾ ਆਯੋਜਨ ਕਰਨਾ ਚਾਹੁੰਦੇ ਹਨ। ਮੌਲਾਨਾ ਜ਼ੁਬੈਰ ਦੇ ਸਮਰਥਕ ਨਹੀਂ ਚਾਹੁੰਦੇ ਕਿ ਉਹ ਇੱਥੇ ਇਜਤਿਮਾ ਕਰਵਾਏ। ਇਸ ਕਾਰਨ ਜ਼ੁਬੈਰ ਦੇ ਸਮਰਥਕਾਂ ਨੇ ਪਹਿਲਾਂ ਹੀ ਇਜਤਿਮਾ ਗਰਾਊਂਡ ’ਤੇ ਕਬਜ਼ਾ ਕਰ ਲਿਆ।
ਮੌਲਾਨਾ ਸਾਦ ਦੇ ਸਮਰਥਕ ਮੰਗਲਵਾਰ ਸਵੇਰੇ ਕਰੀਬ 3:30 ਵਜੇ ਮੈਦਾਨ ‘ਤੇ ਪਹੁੰਚ ਗਏ ਸਨ। ਇਸ ਤੋਂ ਬਾਅਦ ਝੜਪ ਸ਼ੁਰੂ ਹੋ ਗਈ। ਸਾਬਕਾ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਦੇ ਬੰਗਲਾਦੇਸ਼ ਛੱਡਣ ਤੋਂ ਬਾਅਦ ਜ਼ੁਬੈਰ ਦੇ ਸਮਰਥਕ ਦੋ ਪੜਾਵਾਂ ਵਿੱਚ ਹੋਣ ਵਾਲੇ ਟੋਂਗੀ ਇਜਤਿਮਾ ਨੂੰ ਘਟਾ ਕੇ ਇੱਕ ਪੜਾਅ ਵਿੱਚ ਕਰਨ ਦੀ ਮੰਗ ਕਰ ਰਹੇ ਹਨ।
ਜ਼ੁਬੈਰ ਦੇ ਸਮਰਥਕਾਂ ਦਾ ਦੋਸ਼ ਹੈ ਕਿ ਹਸੀਨਾ ਦੀ ਪਾਰਟੀ ਨੇ ਮੁਸਲਮਾਨਾਂ ਨੂੰ ਵੰਡਣ ਲਈ ਦੋ ਪੜਾਵਾਂ ਵਿਚ ਇਜਤਿਮਾ ਸ਼ੁਰੂ ਕੀਤਾ ਸੀ। ਦੂਜੇ ਪਾਸੇ ਜ਼ੁਬੈਰ ਸਮਰਥਕਾਂ ਨੇ ਮੌਲਾਨਾ ਸਾਦ ਦੇ ਸਮਰਥਕਾਂ ‘ਤੇ ਭਾਰਤ ਦੇ ਏਜੰਟ ਹੋਣ ਦਾ ਦੋਸ਼ ਲਗਾਇਆ ਹੈ। ਸਾਦ ਦੇ ਸਮਰਥਕਾਂ ਖਿਲਾਫ ਅਕਤੂਬਰ ਤੋਂ ਰੈਲੀਆਂ ਸ਼ੁਰੂ ਹੋ ਗਈਆਂ ਸਨ।
