ਨਵੀਂ ਦਿੱਲੀ (ਗੁਰਪ੍ਰੀਤ ਕੌਰ): ਸੰਸਦ ਸੈਸ਼ਨ ਦੇ ਛੇਵੇਂ ਦਿਨ ਸੋਮਵਾਰ ਨੂੰ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਨੇ ਕੇਂਦਰ ਸਰਕਾਰ ਦੇ ਬਜਟ ਦੀ ਤੁਲਨਾ ਮਹਾਭਾਰਤ ਦੇ ਚੱਕਰਵਿਊ ਨਾਲ ਕੀਤੀ। ਰਾਹੁਲ ਨੇ ਕਿਹਾ ਕਿ ਹਜ਼ਾਰਾਂ ਸਾਲ ਪਹਿਲਾਂ ਕੁਰੂਕਸ਼ੇਤਰ ਵਿੱਚ ਅਭਿਮੰਨਿਊ ਨੂੰ 6 ਲੋਕਾਂ ਨੇ ਚੱਕਰਵਿਊ ’ਚ ਫਸਾ ਕੇ ਮਾਰ ਦਿੱਤਾ ਸੀ। ਚੱਕਰਵਿਊ ਦਾ ਇੱਕ ਹੋਰ ਨਾਮ ਪਦਮਾਵਿਊ ਹੈ, ਜੋ ਕਮਲ ਦੇ ਫੁੱਲ ਦੀ ਸ਼ਕਲ ਵਿੱਚ ਹੁੰਦਾ ਹੈ। ਇਸ ਦੇ ਅੰਦਰ ਡਰ ਅਤੇ ਹਿੰਸਾ ਹੁੰਦੀ ਹੈ।
ਰਾਹੁਲ ਨੇ ਕਿਹਾ ਕਿ 21ਵੀਂ ਸਦੀ ਵਿੱਚ, ਇੱਕ ਨਵਾਂ ‘ਚੱਕਰਵਿਊ’ ਸਿਰਜਿਆ ਗਿਆ ਹੈ – ਉਹ ਵੀ ਕਮਲ ਦੇ ਫੁੱਲ ਦੇ ਰੂਪ ਵਿੱਚ। ਪ੍ਰਧਾਨ ਮੰਤਰੀ ਇਸ ਚਿੰਨ੍ਹ ਨੂੰ ਆਪਣੀ ਛਾਤੀ ’ਤੇ ਲਾ ਕੇ ਚੱਲਦੇ ਹਨ। ਅਭਿਮੰਨਿਊ ਨਾਲ ਜੋ ਕੀਤਾ ਗਿਆ ਉਹ ਭਾਰਤ ਨਾਲ ਕੀਤਾ ਜਾ ਰਿਹਾ ਹੈ। ਅੱਜ ਵੀ ਚੱਕਰਵਿਊ ਦੇ ਵਿਚਕਾਰ 6 ਲੋਕ ਹਨ। ਇਹ 6 ਲੋਕ ਹਨ ਨਰੇਂਦਰ ਮੋਦੀ, ਅਮਿਤ ਸ਼ਾਹ, ਮੋਹਨ ਭਾਗਵਤ, ਅਜੀਤ ਡੋਵਾਲ, ਅਡਾਨੀ ਅਤੇ ਅੰਬਾਨੀ।
ਰਾਹੁਲ ਦੇ ਏਨਾ ਕਹਿਣ ’ਤੇ ਸੱਤਾਧਾਰੀ ਪਾਰਟੀ ਦੇ ਸੰਸਦ ਮੈਂਬਰਾਂ ਨੇ ਹੰਗਾਮਾ ਕਰਨਾ ਸ਼ੁਰੂ ਕਰ ਦਿੱਤਾ। ਲੋਕ ਸਭਾ ਸਪੀਕਰ ਓਮ ਬਿਰਲਾ ਨੇ ਰਾਹੁਲ ਨੂੰ ਰੋਕਦੇ ਹੋਏ ਕਿਹਾ- ਤੁਹਾਡੇ ਮੈਂਬਰਾਂ ਨੇ ਵੀ ਕਈ ਵਾਰ ਕਿਹਾ ਹੈ ਕਿ ਸਦਨ ਦਾ ਮੈਂਬਰ ਨਾ ਹੋਣ ਵਾਲੇ ਕਿਸੇ ਵਿਅਕਤੀ ਦਾ ਨਾਂ ਨਾ ਜਾਣਿਆ ਜਾਵੇ। ਇਸ ’ਤੇ ਰਾਹੁਲ ਨੇ ਕਿਹਾ ਕਿ ਜੇਕਰ ਤੁਸੀਂ ਅਜਿਹਾ ਕਹੋਗੇ ਤਾਂ ਮੈਂ NSA, ਅੰਬਾਨੀ ਅਤੇ ਅਡਾਨੀ ਜੀ ਦੇ ਨਾਂ ਹਟਾ ਦੇਵਾਂਗਾ ਅਤੇ ਸਿਰਫ 3 ਨਾਂ ਲਵਾਂਗਾ।
46 ਮਿੰਟ ਦੇ ਭਾਸ਼ਣ ’ਚ ਰਾਹੁਲ ਨੇ 4 ਵਾਰ ਅਡਾਨੀ-ਅੰਬਾਨੀ ਦਾ ਨਾਂ ਲਿਆ। ਦੋ ਵਾਰ ਮੂੰਹ ’ਤੇ ਉਂਗਲੀ ਰੱਖੀ। ਰਾਹੁਲ ਨੇ ਹਲਵਾ ਸਮਾਰੋਹ ਦਾ ਪੋਸਟਰ ਲਹਿਰਾਇਆ। ਇਹ ਵੇਖ ਕੇ ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਣ ਨੇ ਸਿਰ ਫੜ ਲਿਆ। ਸਪੀਕਰ ਨੇ ਰਾਹੁਲ ਨੂੰ 4 ਵਾਰ ਰੋਕਿਆ।
ਰਾਹੁਲ ਗਾਂਧੀ ਨੇ ਸੰਸਦ ’ਚ ਦਿਖਾਈ ਇੱਕ ਤਸਵੀਰ, ਮੱਥਾ ਫੜ ਕੇ ਹੱਸਣ ਲੱਗੀ ਵਿੱਤ ਮੰਤਰੀ
ਰਾਹੁਲ ਗਾਂਧੀ ਨੇ ਕਿਹਾ ਕਿ ਦਲਿਤ, ਆਦਿਵਾਸੀ ਅਤੇ ਪਿਛੜੇ ਵਰਗ ਦੇ ਲੋਕ ਭਾਰਤ ਦੀ ਮੁੱਖ ਤਾਕਤ ਹਨ। ਇਹ ਸਮੂਹ ਸਾਡੀ ਆਬਾਦੀ ਦਾ 73% ਬਣਦੇ ਹਨ ਅਤੇ ਉਹ ਕਾਰੋਬਾਰਾਂ, ਕਾਰਪੋਰੇਟ ਭਾਰਤ ਅਤੇ ਸਰਕਾਰਾਂ ਵਿੱਚ ਪ੍ਰਤੀਨਿਧਤਾ ਨਹੀਂ ਕਰਦੇ ਹਨ। ਜਦੋਂ ਗਾਂਧੀ ਨੇ ਆਪਣੇ ਦਾਅਵਿਆਂ ਦਾ ਸਮਰਥਨ ਕਰਨ ਲਈ ਇੱਕ ਫੋਟੋ ਦਿਖਾਈ, ਤਾਂ ਸਪੀਕਰ ਓਮ ਬਿਰਲਾ ਨੇ ਰੋਕ ਦਿੱਤਾ।
ਫਿਰ ਉਨ੍ਹਾਂ ਕਿਹਾ ਕਿ ਲੋਕ ਸਭਾ ਦੇ ਕੈਮਰੇ ਪੱਖਪਾਤੀ ਹਨ ਕਿਉਂਕਿ ਉਹ ਸਦਨ ਵਿੱਚ ਜੋ ਤਸਵੀਰ ਦਿਖਾਉਣਾ ਚਾਹੁੰਦੇ ਹਨ, ਉਹ ਨਹੀਂ ਦਿਖਾਉਂਦੇ। ਗਾਂਧੀ ਜੋ ਤਸਵੀਰ ਦਿਖਾਉਣਾ ਚਾਹੁੰਦੇ ਹਨ, ਉਹ ਬਜਟ ਹਲਵਾ ਸਮਾਰੋਹ ਦੀ ਹੈ। ਉਨ੍ਹਾਂ ਕਿਹਾ ਕਿ ਮੈਨੂੰ ਤਸਵੀਰ ਵਿੱਚ ਇੱਕ ਵੀ ਆਦਿਵਾਸੀ, ਦਲਿਤ ਜਾਂ ਓਬੀਸੀ ਅਧਿਕਾਰੀ ਨਜ਼ਰ ਨਹੀਂ ਆ ਰਿਹਾ। ਰਾਹੁਲ ਗਾਂਧੀ ਦੇ ਇਸ ਬਿਆਨ ’ਤੇ ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਨੇ ਆਪਣੇ ਸਿਰ ’ਤੇ ਦੋਵੇਂ ਹੱਥ ਰੱਖ ਲਏ ਅਤੇ ਮੁਸਕਰਾਉਣ ਲੱਗ ਪਈ। ਇਹ ਦੇਖ ਕੇ ਰਾਹੁਲ ਗਾਂਧੀ ਨੇ ਕਿਹਾ ਕਿ ਉਹ ਮੁਸਕਰਾ ਰਹੇ ਹਨ ਪਰ ਇਹ ਕੋਈ ਹੱਸਣ ਵਾਲੀ ਗੱਲ ਨਹੀਂ ਹੈ।
ਮੋਦੀ ਸਰਕਾਰ ਨੇ ਮਿਡਲ ਕਲਾਸ ਦੀ ਪਿੱਠ ’ਚ ਛੁਰਾ ਮਾਰਿਆ – ਰਾਹੁਲ ਗਾਂਧੀ
ਰਾਹੁਲ ਗਾਂਧੀ ਨੇ ਸੱਤਾਧਾਰੀ ਪੱਖ ਨੂੰ ਕਿਹਾ ਕਿ ਇਸ ਬਜਟ ਵਿੱਚ ਤੁਸੀਂ ਮੱਧ ਵਰਗ ਦੀ ਪਿੱਠ ਅਤੇ ਸੀਨੇ ਵਿੱਚ ਛੁਰਾ ਮਾਰਿਆ ਹੈ। INDIA ਗਠਜੋੜ ਲਈ ਫਾਇਦਾ ਇਹ ਹੈ ਕਿ ਮੱਧ ਵਰਗ ਤੁਹਾਨੂੰ ਛੱਡ ਕੇ ਸਾਡੇ ਕੋਲ ਆ ਰਿਹਾ ਹੈ। ਤੁਸੀਂ ਚੱਕਰਵਿਊ ਬਣਾਉਣ ਦਾ ਕੰਮ ਕਰਦੇ ਹੋ, ਅਸੀਂ ਇਸ ਨੂੰ ਤੋੜਨ ਦਾ ਕੰਮ ਕਰ ਰਹੇ ਹਾਂ। ਕੀ ਤੁਸੀਂ ਸੋਚਦੇ ਹੋ ਕਿ ਗਰੀਬ ਲੋਕ ਸੁਪਨੇ ਨਾ ਦੇਖ ਸਕਣ?
ਇੰਡੀਆ ਬਲਾਕ ਦੀ ਗਾਰੰਟੀ, MSP ਲਾਗੂ ਕਰਕੇ ਰਹਾਂਗੇ – ਰਾਹੁਲ ਗਾਂਧੀ
ਰਾਹੁਲ ਗਾਂਧੀ ਨੇ ਆਪਣੇ ਭਾਸ਼ਣ ਦੌਰਾਨ ਕਿਸਾਨਾਂ ਦੇ ਹੱਕ ਵਿੱਚ ਕਿਹਾ ਕਿ ਕਿਸਾਨ ਜੋ ਸਰਕਾਰ ਤੋਂ ਐਮਐਸਪੀ ਦੀ ਮੰਗ ਕਰ ਰਹੇ ਸਨ, ਸਾਨੂੰ ਲੱਗਦਾ ਸੀ ਕਿ ਜੇਕਰ ਸਰਕਾਰ ਨੇ ਬਜਟ ਵਿੱਚ ਇਸ ਲਈ ਕੋਈ ਵਿਵਸਥਾ ਕੀਤੀ ਹੁੰਦੀ ਤਾਂ ਚੱਕਰਵਿਊ ਵਿੱਚ ਫਸੇ ਕਿਸਾਨ ਬਾਹਰ ਨਿਕਲ ਸਕਦੇ ਸਨ। ਪਰ ਮੋਦੀ ਸਰਕਾਰ ਨੇ ਅਜਿਹਾ ਨਹੀਂ ਕਿਤਾ। ਅਜਿਹਾ ਕਹਿੰਦਿਆਂ ਰਾਹੁਲ ਨੇ ਐਲਾਨ ਕੀਤਾ ਕਿ ਮੈਂ ਇੱਥੇ ਇੰਡੀਆ ਬਲਾਕ ਦੀ ਤਰਫੋਂ ਗਾਰੰਟੀ ਦਿੰਦਾ ਹਾਂ ਕਿ ਅਸੀਂ ਇਸਨੂੰ ਇਸ ਸਦਨ ਵਿੱਚ ਪਾਸ ਕਰਕੇ ਤੁਹਾਨੂੰ (ਕਿਸਾਨਾਂ ਨੂੰ) ਦੇਵਾਂਗੇ।
ਅਸੀਂ ਇਸ ਸਦਨ ਵਿੱਚ ਜਾਤੀ ਜਨਗਣਨਾ ਪਾਸ ਕਰਾਂਗੇ: ਰਾਹੁਲ ਗਾਂਧੀ
ਰਾਹੁਲ ਗਾਂਧੀ ਨੇ ਕਿਹਾ ਕਿ ਅਸੀਂ ਬੀਜੇਪੀ ਦੁਆਰਾ ਬਣਾਏ ਇਸ ਚੱਕਰਵਿਊ ਨੂੰ ਤੋੜਾਂਗੇ। ਅਜਿਹਾ ਕਰਨ ਦਾ ਸਭ ਤੋਂ ਵਧੀਆ ਤਰੀਕਾ ਜਾਤੀ ਜਨਗਣਨਾ ਹੋਵੇਗਾ, ਜਿਸ ਤੋਂ ਤੁਸੀਂ (ਸੱਤਾਧਾਰੀ ਪਾਰਟੀ) ਡਰਦੇ ਹੋ। ਅਸੀਂ ਇਸ ਸਦਨ ਵਿੱਚ ਜਾਤੀ ਜਨਗਣਨਾ ਪਾਸ ਕਰਵਾਵਾਂਗੇ, ਚਾਹੇ ਤੁਸੀਂ ਇਸ ਨੂੰ ਪਸੰਦ ਕਰੋ ਜਾਂ ਨਾ।
ਰਾਹੁਲ ਦਾ ਦਾਅਵਾ – ਭਾਜਪਾ ਸਰਕਾਰ ਦੇ ਕਾਰਜਕਾਲ ਦੌਰਾਨ 70 ਪੇਪਰ ਲੀਕ ਹੋਏ
ਰਾਹੁਲ ਗਾਂਧੀ ਨੇ ਕਿਹਾ ਕਿ ਪਿਛਲੇ 10 ਸਾਲਾਂ ’ਚ ਭਾਜਪਾ ਸਰਕਾਰ ਦੇ ਕਾਰਜਕਾਲ ’ਚ 70 ਪੇਪਰ ਲੀਕ ਹੋਏ ਹਨ। ਸਦਨ ਨੇ ਇਸ ਦਾ ਵਿਰੋਧ ਕੀਤਾ। ਉਨ੍ਹਾਂ ਕਿਹਾ ਕਿ ਪ੍ਰੀਖਿਆ ਪੇਪਰ ਲੀਕ ਨੌਜਵਾਨਾਂ ਲਈ ਸਭ ਤੋਂ ਅਹਿਮ ਮੁੱਦਾ ਹੈ, ਪਰ ਵਿੱਤ ਮੰਤਰੀ ਨੇ ਆਪਣੇ ਭਾਸ਼ਣ ਵਿੱਚ ਇੱਕ ਵਾਰ ਵੀ ਇਸ ਦਾ ਜ਼ਿਕਰ ਨਹੀਂ ਕੀਤਾ। ਉਨ੍ਹਾਂ ਕਿਹਾ ਕਿ ਇਸ ਦੀ ਬਜਾਏ, ਉਨ੍ਹਾਂ (ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ) ਨੂੰ ਸਿੱਖਿਆ ਲਈ ਜੋ ਪੈਸਾ ਅਲਾਟ ਕਰਨਾ ਚਾਹੀਦਾ ਸੀ, ਉਹ 20 ਸਾਲਾਂ ਵਿੱਚ ਇਸ ਖੇਤਰ ਲਈ ਸਭ ਤੋਂ ਘੱਟ ਹੈ।
ਉਮੀਦ ਸੀ ਕਿ ਇਹ ਬਜਟ ਇਸ ਚੱਕਰਵਿਊ ਦੀ ਤਾਕਤ ਨੂੰ ਕਮਜ਼ੋਰ ਕਰੇਗਾ: ਰਾਹੁਲ ਗਾਂਧੀ
ਲੋਕ ਸਭਾ ਵਿੱਚ ਵਿਰੋਧੀ ਧਿਰ ਦੇ ਲੀਡਰ ਨੇ ਕਿਹਾ ਕਿ ਉਨ੍ਹਾਂ ਨੂੰ ਉਮੀਦ ਸੀ ਕਿ ਇਹ ਬਜਟ ਇਸ ਚੱਕਰਵਿਊ ਦੀ ਤਾਕਤ ਨੂੰ ਕਮਜ਼ੋਰ ਕਰੇਗਾ। ਇਹ ਬਜਟ ਇਸ ਦੇਸ਼ ਦੇ ਕਿਸਾਨਾਂ ਦੀ ਮਦਦ ਕਰੇਗਾ, ਇਸ ਦੇਸ਼ ਦੇ ਨੌਜਵਾਨਾਂ ਦੀ ਮਦਦ ਕਰੇਗਾ, ਇਸ ਦੇਸ਼ ਦੇ ਮਜ਼ਦੂਰਾਂ ਅਤੇ ਛੋਟੇ ਵਪਾਰੀਆਂ ਦੀ ਮਦਦ ਕਰੇਗਾ। ਪਰ ਜੋ ਮੈਂ ਦੇਖਿਆ ਹੈ ਉਹ ਇਹ ਹੈ ਕਿ ਇਸ ਬਜਟ ਦਾ ਇੱਕੋ-ਇੱਕ ਉਦੇਸ਼ ਇਸ ਢਾਂਚੇ ਨੂੰ ਮਜ਼ਬੂਤ ਕਰਨਾ ਹੈ- ਇੱਕ ਅਜਾਰੇਦਾਰੀ ਕਾਰੋਬਾਰ ਦਾ ਢਾਂਚਾ, ਇੱਕ ਸਿਆਸੀ ਅਜਾਰੇਦਾਰੀ ਦਾ ਢਾਂਚਾ ਜੋ ਲੋਕਤੰਤਰੀ ਢਾਂਚੇ ਅਤੇ ਡੂੰਘੇ ਰਾਜ ਅਤੇ ਏਜੰਸੀਆਂ ਨੂੰ ਤਬਾਹ ਕਰ ਦਿੰਦਾ ਹੈ। ਨਤੀਜਾ ਇਹ ਹੈ – ਭਾਰਤ ਨੂੰ ਰੁਜ਼ਗਾਰ ਦੇਣ ਵਾਲਿਆਂ, ਛੋਟੇ ਅਤੇ ਦਰਮਿਆਨੇ ਕਾਰੋਬਾਰਾਂ ’ਤੇ ਨੋਟਬੰਦੀ, ਜੀਐਸਟੀ ਅਤੇ ਟੈਕਸ ਅੱਤਵਾਦ ਦੁਆਰਾ ਹਮਲਾ ਕੀਤਾ ਗਿਆ ਹੈ।
